ಕನಕದಾಸ ಜಯಂತಿ ಆಚರಣೆ

ಪುತ್ತೂರು: ಪ್ರೀತಿಯ ಸಂಸ್ಕೃತಿ ಕೇವಲ ಪುಸ್ತಕಕ್ಕೆ ಸೀಮಿತವಾದ ದಿನಗಳಿವು. ಈ ನಡುವೆಯೂ ಕತ್ತಿಯನ್ನು ತೋರಿಸುವ ಸಂಸ್ಕೃತಿ ತಪ್ಪಿಸುವ ಪ್ರಯತ್ನ ಕನಕ ಚಿಂತನೆಗಳಿಂದ ಸಾಧ್ಯವಿದೆ ಎಂದು ರಾಮಕುಂಜದ ಶ್ರೀ ರಾಮಕುಂಜೇಶ್ವರ ಕಾಲೇಜಿನ ಉಪನ್ಯಾಸಕ ಗಣರಾಜ್ ಕುಂಬ್ಳೆ ಹೇಳಿದರು.

ಅವರು ಪುತ್ತೂರು ತಾಲೂಕು ರಾಷ್ಟ್ರೀಯ ಹಬ್ಬಗಳ ಆಚರಣಾ ಸಮಿತಿ ವತಿಯಿಂದ ಶನಿವಾರ ಪುತ್ತೂರು ಪುರಭವನದಲ್ಲಿ ನಡೆದ ಕನಕದಾಸ ಜಯಂತಿ ಕಾರ್ಯಕ್ರಮದಲ್ಲಿ ‘ಕನಕ ಸಂಸ್ಮರಣೆ’ ಉಪನ್ಯಾಸ ನೀಡಿದರು. ಭೌತಿಕ ಸಂಗತಿಗಳಲ್ಲಿ ಆಡಂಬರದ ಪೂಜೆ, ಪುರಸ್ಕಾರಕ್ಕೆ ಅವಕಾಶ ನೀಡದೇ ಭಗವಂತನು ಎಲ್ಲರನ್ನು ನೋಡಿಕೊಳ್ಳುತ್ತಾನೆ. ನಮ್ಮೊಳಗಿನ ಅಹಂಕಾರ ಬಿಡಬೇಕು ಎಂದು ಸಾರಿದವರು ಕನಕರು ಎಂದು ಹೇಳಿದರು. ಶಾಂತಿ ಹಾಗೂ ಯುದ್ಧ ಎರಡು ಕಾಲಘಟ್ಟದ ಸಮಾಜಕ್ಕೆ ಕನಕದಾಸರ ಸಂದೇಶ ಪ್ರಸ್ತುತ. ಶಾಂತಿ ತಂದು ಕೊಡಲಾರೆ, ಯುದ್ಧ ಬಿಡಲಾರೆ ಎಂಬ ಇಬ್ಬಂದಿ ಸ್ಥಿತಿಗೆ ಕನಕದಾಸರ ಸಂಘರ್ಷ ಹೀನವಾದ ಸಂದೇಶ ಪರಿಹಾರ ನೀಡಲಿದೆ ಎಂದರು.

ಸಹಾಯಕ ಪೊಲೀಸ್ ಅಧೀಕ್ಷಕ ಸಿ.ಬಿ.ರಿಷ್ಯಂತ್ ಮಾತನಾಡಿ, ಕನಕನಾಯಕ ಎನ್ನುವ ಹೆಸರಿನ ಮೂಲಕ ಗುರುತಿಸಿಕೊಂಡು ಪರಿವರ್ತನೆಗೊಂಡು ಕನಕದಾಸರಾದ ಸಂತಶ್ರೇಷ್ಠರು ಸಾರಿದ ಸಮಾನತೆಯ ಸರಳ ಬದುಕನ್ನು ನಾವೆಲ್ಲರೂ ಪಾಲನೆ ಮಾಡಬೇಕು ಎಂದರು.

ಅಧ್ಯಕ್ಷತೆ ವಹಿಸಿದ್ದ ಸಹಾಯಕ ಆಯುಕ್ತ ಸತೀಶ್ ಕುಮಾರ್ ಡಿ.ಎಂ. ಮಾತನಾಡಿ, ಸಮಾಜದ ಅಸಮಾನತೆ ತೊಲಗಿಸಲು ಕೀರ್ತನೆಯನ್ನು ಜಗತ್ತಿಗೆ ಸಾರಿದ ಕನಕದಾಸರು, ಕುಲ ಮತ್ತು ಜಾತಿಯ ನಿರ್ಬಂಧಗಳ ನಡುವಿನ ಸಾಕಷ್ಟು ಕಲಹಗಳನ್ನು ಕೊನೆಗೊಳಿಸಲು ಅಡಿಪಾಯ ಹಾಕಿಕೊಟ್ಟರು. ವಿದ್ಯಾರ್ಥಿಗಳ ಶೈಕ್ಷಣಿಕ ಪ್ರವಾಸವನ್ನು ಕನಕದಾಸರ ಹುಟ್ಟೂರಾದ ಬಾಡ ಗ್ರಾಮಕ್ಕೆ ಇಟ್ಟರೆ ಉತ್ತಮ. ಕೀರ್ತನೆಗಳಲ್ಲಿ ಉಲ್ಲೇಖಿಸಿದ ಕಾಗಿನೆಲೆ ಆದಿ ಕೇಶವನ ಬೇಡಗಿ ತಾಲೂಕಿನ ಕಾಗಿನೆಲೆಗೂ ಪ್ರವಾಸ ಕೈಗೊಳ್ಳುವಂತೆ ಸಲಹೆ ನೀಡಿದರು.

ತಿಮ್ಮಪ್ಪ ನಾಯ್ಕ ಕನಕದಾಸರಾದ ಕುರಿತು ಮಾಹಿತಿ ನೀಡಿದರು. ಉಪತಹಶೀಲ್ದಾರ್ ಶ್ರೀಧರ್ ಕೆ, ಮಂಜುನಾಥ್, ಸದಾಶಿವ ಉಪ್ಪಿನಂಗಡಿ, ಕಂದಾಯ ಅಧಿಕಾರಿ ದಯಾನಂದ್, ಸಿಬಂದಿ ಹರೀಶ್ ಉಪಸ್ಥಿತರಿದ್ದರು.

ನೆಲ್ಲಿಕಟ್ಟೆ ಶಿವರಾಮ ಕಾರಂತ ಪ್ರೌಢಶಾಲೆ, ಸುದಾನ ವಸತಿಯುತ ಶಾಲೆ, ಶ್ರೀ ರಾಮಕೃಷ್ಣ ಪ್ರೌಢಶಾಲಾ ವಿದ್ಯಾರ್ಥಿಗಳು ನಾಡಗೀತೆ, ರೈತಗೀತೆ, ರಾಷ್ಟ್ರಗೀತೆ ಹಾಡಿದರು.

ತಹಶೀಲ್ದಾರ್ ಸಣ್ಣರಂಗಯ್ಯ ಸ್ವಾಗತಿಸಿ, ಕ್ಷೇತ್ರ ಶಿಕ್ಷಣಾಧಿಕಾರಿ ಶಶಿಧರ್ ಜಿ.ಎಸ್ ವಂದಿಸಿದರು. ಪ್ರೊ.ಬಿ.ಜೆ.ಸುವರ್ಣ ಕಾರ್ಯಕ್ರಮ ನಿರೂಪಿಸಿದರು.