ಹತ್ಯೆ ಖಂಡಿಸಿ ಬೆಳ್ತಂಗಡಿ ಶಾಂತಿಯುತ ತಾಲೂಕು ಸಂಪೂರ್ಣ ಬಂದ್

ಬೆಳ್ತಂಗಡಿ : ವಿಶ್ವ ಹಿಂದು ಪರಿಷದ್‌ನ ಮಡಿಕೇರಿ ಜಿಲ್ಲಾ ಸಂಘಟನಾ ಕಾರ್ಯದರ್ಶಿ ದೇವಪಂಡ ಕುಟ್ಟಪ್ಪ ಸೇರಿ ಮೂವರು ಹಿಂದುಗಳ ಹತ್ಯೆ ಹಾಗೂ ಬಿ.ಸಿ.ರೋಡ್‌ನಲ್ಲಿ ಗುರುವಾರ ಸಂಜೆ ನಡೆದ ಯುವಕನ ಬರ್ಭರ ಹತ್ಯೆ ಖಂಡಿಸಿ ಬೆಳ್ತಂಗಡಿ ತಾಲೂಕು ಸಂಪೂರ್ಣ ಬಂದ್ ಸಂಪೂರ್ಣ ಶಾಂತಿಯುತವಾಗಿ ನಡೆದಿದೆ.

ತಾಲೂಕಿನಲ್ಲಿ ಬೆಳಗ್ಗಿನಿಂದಲೇ ಬಸ್ ಸಂಚಾರ ಸ್ಥಗಿತ ಗೊಂಡಿತ್ತು. ಶಾಲಾ ಕಾಲೇಜುಗಳಿಗೆ ರಜೆ ಸಾರಲಾಗಿದ್ದ ಹಿನ್ನಲೆಯಲ್ಲಿ ಪೇಟೆಗಳಲ್ಲಿ ಜನಸಂಚಾರ ತೀರಾ ಕಡಿಮೆಯಾಗಿತ್ತು. ಬೆಳಿಗ್ಗೆ ಕೆಲವೆಡೆ ಅಂಗಡಿ ಮುಂಗಟ್ಟುಗಳು ಬಾಗಿಲು ತೆರೆದಿದ್ದರೂ ಬಂದ್ ಬೆಂಬಲಿಗರು ತೆರೆದಿದ್ದ ಅಂಗಡಿಗಳನ್ನು ಮುಚ್ಚಿಸಿದರು. ಆಟೋರಿಕ್ಷಾಗಳು ರಸ್ತೆಗೆ ಇಳಿಯಲಿಲ್ಲ ಖಾಸಗಿ ಹಾಗೂ ಸರಕಾರಿ ಬಸ್‌ಗಳು ಸಂಚಾರ ನಡೆಸಲೇ ಇಲ್ಲ. ಬೆರಳೆಣಿಕೆಯ ಖಾಸಗಿ ವಾಹನಗಳು ಹಾಗೂ ದ್ವಿಚಕ್ರ ವಾಹನಗಳು ರಸ್ತೆಯಲ್ಲಿ ಸಂಚರಿಸುತ್ತಿದ್ದವು. ತಾಲೂಕಿನ ಪ್ರಮುಖ ಪೇಟೆಗಳಾದ ಧರ್ಮಸ್ಥಳ, ಉಜಿರೆ, ಚಾರ್ಮಾಡಿ, ಕಕ್ಕಿಂಜೆ, ಸೋಮಂತಡ್ಕ, ಬೆಳ್ತಂಗಡಿ, ಗುರುವಾಯನಕರೆ, ಗೇರುಕಟ್ಟೆ, ಮಡಂತ್ಯಾರು, ಅಳದಂಗಡಿ, ನಾರಾವಿ, ವೇಣೂರು ಮತ್ತಿತರ ಕಡೆ ಯಾವುದೇ ಅಂಗಡಿ ವ್ಯವಹಾರವಾಗಲಿ, ರಿಕ್ಷಾ ಬಸ್ಸು ಸಂಚಾರವಾಗಲಿ ಇರಲಿಲ್ಲ. ನಾಗರಿಕರು ಸ್ವಯಂಪ್ರೇರಿತರಾಗಿ ಬಂದ್‌ನಲ್ಲಿ ಪಾಲ್ಗೊಂಡು ಘಟನೆಯನ್ನು ಖಂಡಿಸಿದರು. ಕೇಲವೇ ಗಂಟೆಗಳ ಮೊದಲು ಬಂದ್ ಕರೆಗೆ ನೀಡಲಾಗಿದ್ದರೂ ಹಿಂದೂಗಳು ಶೀಘ್ರವಾಗಿ ಸ್ಪಂದಿಸಿ ಬಂದ್ ಅಭೂತಪೂರ್ವ ಯಶಸ್ಸು ಕಾಣುವಂತೆ ಮಾಡಿದ್ದಾರೆ.

ಧರ್ಮಸ್ಥಳದಲ್ಲಿ ಅಂಗಡಿಗಳು ಬಂದ್ ಆಗಿದ್ದ ಹಿನ್ನಲೆಯಲ್ಲಿ ಹೊರಗಿನಿಂದ ಬಂದಿದ್ದ ಯಾತ್ರಿಕರು ಪರದಾಡುವಂತಾಯಿತು. ಧರ್ಮಸ್ಥಳದಿಂದ ರಾಜ್ಯದ ವಿವಿಧ ಭಾಗಗಳಿಗೆ ಹೊರಡಬೇಕಾಗಿದ್ದ ಬಸ್ ಗಳು ಸಂಚಾರ ಆರಂಭಿಸದ ಹಿನ್ನಲೆಯಲ್ಲಿ ಬೇರೆ ಬೇರೆ ಊರುಗಳಿಗೆ ತೆರಳಬೇಕಾದ ಯಾತ್ರಿಕರು ಸಂಕಷ್ಟ ಅನುಭವಿಸಿದರು. ಸಂಜೆಯ ವೇಳೆಗೆ ಕೆಲವೊಂದು ಬಸ್‌ಗಳು ಸಂಚಾರ ಆರಂಭಿಸಿದರೂ ಹೆಚ್ಚಿನ ಬಸ್‌ಗಳು ರಸ್ತೆಗೆ ಇಳಿಯಲೇ ಇಲ್ಲ. ಸಂಜೆಯ ವೇಳೆಗೂ ಮಂಗಳೂರಿಗೆ ಯಾವುದೇ ಬಸ್‌ಗಳು ಹೊರಡದ ಹಿನ್ನಲೆಯಲ್ಲಿ ತುರ್ತಾಗಿ ಮಂಗಳೂರಿಗೆ ತೆರಳಬೇಕಾಗಿದ್ದ ಸಾರ್ವಜನಿಕರು ಪರದಾಡುವಂತಾಯಿತು.

ಬಂದ್ ಹಿನ್ನಲೆಯಲ್ಲಿ ತಾಲೂಕಿನಾಧ್ಯಂತ ಬಿಗು ಪೋಲೀಸ್ ಬಂದೋಬಸ್ತ್ ಏರ್ಪಡಿಸಲಾಗಿತ್ತು. ಬೆಳಿಗ್ಗೆ ಬೆಳ್ತಂಗಡಿ ನಗರದಲ್ಲಿ ಪ್ರತಿಭಟನೆ ನಡೆಸಲು ಪ್ರಯತ್ನಿಸಿದ ತಂಡವನ್ನು ಪೋಲೀಸರು ಚದುರಿಸಿದರು. ನಿಷೇಧಾಜ್ಞೆಯ ಹಿನ್ನಲೆಯಲ್ಲಿ ಯಾವುದೇ ಪ್ರತಿಭಟನೆಗೆ ಪೋಲೀಸರು ಅವಕಾಶ ನೀಡಲಿಲ್ಲ. ವಿವಿಧೆಡೆಗಳಲ್ಲಿ ಬಂದ್ ಬೆಂಬಲಿಗರು ಟಯರ್‌ಗಳಿಗೆ ಬೆಂಕಿ ಹಚ್ಚಿ ವಾಹನ ಸಂಚಾರಕ್ಕೆ ಅಡ್ಡಿಪಡಿಸಿದರು. ಪೋಲೀಸರು ಕೂಡಲೇ ಮಧ್ಯಪ್ರವೇಶಿಸಿ ರಸ್ತೆಗಳನ್ನು ಸಂಚಾರಕ್ಕೆ ಯೋಗ್ಯಗೊಳಿಸಿದರು. ತಾಲೂಕಿಲ್ಲಿ ಯಾವುದೇ ಅಹಿತಕರ ಘಟನೆಗಳು ನಡೆದಿರುವ ಬಗ್ಗೆ ವರದಿಯಾಗಿಲ್ಲ.

. ಜಿಲ್ಲಾಡಳಿತ ನಿಷೇಧಾಜ್ಞೆ ಹೇರಿದ್ದರಿಂದ ಶಾಲೆ, ಕಾಲೇಜುಗಳಿಗೆ ರಜೆ ಸಾರಲಾಗಿತ್ತು. ಸರಕಾರಿ, ಖಾಸಗಿ ಕಚೇರಿಗಳಲ್ಲಿ ಯಾವುದೇ ಕೆಲಸಕಾರ್ಯಗಳು ನಡೆಯಲಿಲ್ಲ.
ಅಳದಂಗಡಿಯಲ್ಲಿ ಲಾಠಿ ಚಾರ್ಜ್- ಅಳದಂಗಡಿಯ ಯುವಕರು ಖಾಸಗಿ ಬಸ್ಸುಗಳನ್ನು ನಿಲ್ಲಿಸಿ ಸಂಚಾರ ಸ್ಥಗಿತಗೊಳಿಸಿದ್ದರು. ಬಸ್‌ನವರು ಪೋಲಿಸರಿಗೆ ಸುದ್ದಿ ಮುಟ್ಟಿಸಿದ್ದರು. ಪೋಲಿಸರು ಬಂದು ಲಾಠಿ ಚಾರ್ಜ ನಡೆಸಿದರು. ಆದರೆ ಯುವಕರಿಗೆ ಪೋಲಿಸರ ಆಗಮನವ ಸುದ್ದಿ ಮೊದಲೇ ತಿಳಿದ್ದಿದ್ದರಿಂದ ಅಲ್ಲಿ ಯಾರೂ ಇರಲಿಲ್ಲ. ಪೋಲಿಸರು ಗಾಳಿಯಲ್ಲಿ ಲಾಠಿ ಬೀಸಿ ತೆರಳಿದರು.