ದೀಪಾವಳಿಗಾಗಿ ಮಕ್ಕಳು ವಿನ್ಯಾಸಗೊಳಿಸಿದರು ಸೋಲಾರ್ ಲ್ಯಾಂಟರ್ನ್

ದೀಪಾವಳಿ ಸಂಭ್ರಮಕ್ಕೆ ಇನ್ನು ಕೆಲವೇ ದಿನಗಳು ಬಾಕಿ ಇವೆ, ಮನೆಯಂಗಳವನ್ನು ಕೆಲವರು ಹಣತೆಯ ದೀಪಗಳಿಂದ ಸಿಂಗರಿಸಿದರೆ, ಇನ್ನು ಕೆಲವರು ಜಗಮಗಿಸುವ ವಿದ್ಯುತ್ ಅಲಂಕಾರಕ್ಕೆ ಮೊರೆ ಹೋಗುತ್ತಾರೆ. ಒಟ್ಟಿನಲ್ಲಿ ಬೆಳಕಿನ ಹಬ್ಬವನ್ನು ತಮ್ಮ ತಮ್ಮ ಅನುಕೂಲಕ್ಕೆ ತಕ್ಕಂತೆ ಜನರು ಆಚರಿಸುತ್ತಾರೆ.

ಆದರೆ ಈ ಬಾರಿಯ ದೀಪಾವಳಿಯನ್ನು ಪ್ರಕೃತಿ ಸ್ನೇಹಿಯಾಗಿ ಆಚರಿಸಲು ನಿರ್ಧರಿಸಿರುವ ಮುಸ್ಕಾನ್ ಟುಟ್ಟನ್, ಶರ್ದುಲ್ ದತರ್, ಪಾರ್ಥ್ ಶಿಂಧೆ ಎಂಬ ಮೂವರು 14 ವರ್ಷ ವಯಸ್ಸಿನ ಮಕ್ಕಳು ಸೋಲಾರ್‌ನಿಂದ ಉರಿಯುವ ಲ್ಯಾಂಪ್ ಮತ್ತು ಲ್ಯಾಂಟರ್ನ್‌ಗಳನ್ನು ವಿನ್ಯಾಸಗೊಳಿಸಿದ್ದಾರೆ.

ದೀಪಾವಳಿಗೆ ವಿಶೇಷವಾಗಿ ಏನಾದರು ಕಾರ್ಯ ಮಾಡಬೇಕು ಎಂದು ಈ ಮೂರು ಮಕ್ಕಳು ಕಳೆದ 10 ತಿಂಗಳಿನಿಂದ ಯೋಜನೆ ರೂಪಿಸುತ್ತಿದ್ದರು, ಆದರೆ ಕೊನೆಗೆ ಎಲ್ಲಾ ಐಡಿಯಾವನ್ನು ಬದಿಗೊತ್ತಿ ಸೋಲಾರ್ ಲ್ಯಾಂಪ್ ತಯಾರಿಸಿದರು.

ಮಿನಿಚರ್ ಸೋಲಾರ್ ಪ್ಯಾನಲ್ ಮಾದರಿಯನ್ನು ಬಳಸಿ, ಅದನ್ನು ಸಾಮಾನ್ಯ ಲ್ಯಾಂಟರ್ನ್ ನ ಹೊರಭಾಗಕ್ಕೆ ಜೋಡಿಸಿದರು. ಇದನ್ನು ಕಿಟಕಿ, ಬಾಲ್ಕನಿ, ಟೆರೆಸ್‌ನಲ್ಲಿ ಇಟ್ಟಾಗ ಮಿನಿ ಸೋಲಾರ್ ಪ್ಯಾನಲ್ ಸೂರ್ಯನ ಕಿರಣವನ್ನು ಹೀರಿ ಅದು ಎಲ್‌ಇಡಿ ಬಲ್ಬ್ ಮೂಲಕ ಲ್ಯಾಂಟರ್ನ್, ಲ್ಯಾಂಪ್‌ಗೆ ಬೆಳಕು ನೀಡುತ್ತದೆ.

ಲ್ಯಾಂಟರ್ನ್‌ಗೆ ಬ್ಯಾಟರಿಯನ್ನೂ ಅಳವಡಿಸಲಾಗಿದ್ದು, 8 ರಿಂದ 10 ಗಂಟೆಗಳ ಕಾಲ ಇದು ಉರಿಯುತ್ತದೆ. ಈ ಬ್ಯಾಟರಿಗೆ 25 ವರ್ಷಗಳ ಬಾಳಿಕೆ ಇದೆ. ಹೀಗಾಗಿ ದೀಪಾವಳಿಗೆಂದು ತಯಾರಿಸಲಾದ ಈ ಸೋಲಾರ್ ಲ್ಯಾಂಟರ್ನ್‌ಗಳನ್ನು ಇತರ ಹಬ್ಬಗಳಿಗೂ ಬಳಸುವುದಕ್ಕೆ ಯಾವುದೇ ಅಡ್ಡಿಯಿಲ್ಲ.

ಸೋಲಾರ್ ಪ್ಯಾನೆಲ್ ತುಂಬಾ ದುಬಾರಿಯಾದ ಹಿನ್ನಲೆಯಲ್ಲಿ ಅವರು ಚೀನಾದ ಮಿನಿಚರ್‌ಗಳನ್ನು ಬಳಸಿದರು. ಮಕ್ಕಳ ಈ ಕಾರ್ಯಕ್ಕೆ ಅವರ ಶಿಕ್ಷಕರು ಸಾಥ್ ನೀಡಿದ್ದರು.

ಒಟ್ಟಿನಲ್ಲಿ 3 ಮಕ್ಕಳು ಸೇರಿ ಈ ಬಾರಿಯ ದೀಪಾವಳಿಯಲ್ಲಿ ವಿದ್ಯುತ್ ಉಳಿತಾಯವಾಗುವಂತೆ ಮಾಡಿದ್ದಾರೆ. ಅಷ್ಟೇ ಅಲ್ಲದೇ ಪ್ರಕೃತಿ ಸ್ನೇಹಿ ಬೆಳಕನ್ನು ನೀಡಿದ್ದಾರೆ.