ಶ್ರೀಲಂಕಾಗೆ ನೆರವು ಸಾಗಿಸಲು ಭಾರತ ಬಿಡುತ್ತಿಲ್ಲ ಎಂದ ಪಾಕ್‌: ʼಹಾಸ್ಯಾಸ್ಪದʼ ಎಂದ ಭಾರತ

ನವದೆಹಲಿ: ಚಂಡಮಾರುತ ಪೀಡಿತ ಶ್ರೀಲಂಕಾಕ್ಕೆ ಮಾನವೀಯ ನೆರವು ನೀಡಲು ಭಾರತದ ವಾಯುಪ್ರದೇಶವನ್ನು ಬಳಸಲು ನಾವು ಮಾಡಿದ್ದ ವಿನಂತಿಯನ್ನು ನವದೆಹಲಿ ನಿರಾಕರಿಸಿದೆ ಎಂಬ ಪಾಕಿಸ್ಥಾನದ ಹೇಳಿಕೆಯನ್ನು ಭಾರತ ಮಂಗಳವಾರ “ಹಾಸ್ಯಾಸ್ಪದ” ಎಂದು ತಳ್ಳಿಹಾಕಿದೆ.

“ಪಾಕಿಸ್ಥಾನದ ವಿದೇಶಾಂಗ ಸಚಿವಾಲಯದ ಹಾಸ್ಯಾಸ್ಪದ ಹೇಳಿಕೆಯನ್ನು ನಾವು ತಿರಸ್ಕರಿಸುತ್ತೇವೆ, ಇದು ಭಾರತ ವಿರೋಧಿ ತಪ್ಪು ಮಾಹಿತಿಯನ್ನು ಹರಡುವ ಮತ್ತೊಂದು ಪ್ರಯತ್ನವಾಗಿದೆ” ಎಂದು ವಿದೇಶಾಂಗ ಸಚಿವಾಲಯದ (ಎಂಇಎ) ವಕ್ತಾರ ರಣಧೀರ್ ಜೈಸ್ವಾಲ್ ಹೇಳಿದ್ದಾರೆ.

ಶ್ರೀಲಂಕಾಕ್ಕೆ ಮಾನವೀಯ ನೆರವು ಸಾಗಿಸುವ ಪಾಕಿಸ್ಥಾನಿ ವಿಮಾನಕ್ಕೆ ಓವರ್‌ಫ್ಲೈಟ್ ಕ್ಲಿಯರೆನ್ಸ್ ಕೋರಿಕೆಯನ್ನು ಸೋಮವಾರ ಮಧ್ಯಾಹ್ನ 1 ಗಂಟೆ ಸುಮಾರಿಗೆ ಇಸ್ಲಾಮಾಬಾದ್‌ನಲ್ಲಿರುವ ಭಾರತೀಯ ಹೈಕಮಿಷನ್ ಸ್ವೀಕರಿಸಿದೆ. ಮಾನವೀಯ ನೆರವಿನ ತುರ್ತುಸ್ಥಿತಿಯನ್ನು ಗಮನದಲ್ಲಿಟ್ಟುಕೊಂಡು, ಭಾರತ ಸರ್ಕಾರವು ಅದೇ ದಿನ ವಿನಂತಿಯನ್ನು ತ್ವರಿತವಾಗಿ ಪ್ರಕ್ರಿಯೆಗೊಳಿಸಿತು ಮತ್ತು ಡಿಸೆಂಬರ್ 1 ರಂದು ಸಂಜೆ 5:30 ಕ್ಕೆ ಪ್ರಸ್ತಾಪಿಸಲಾದ ಪ್ರಯಾಣ ವೇಳಾಪಟ್ಟಿಯ ಪ್ರಕಾರ ಓವರ್‌ಫ್ಲೈಟ್ ಅನುಮತಿಯನ್ನು ನೀಡಿತು” ಎಂದು ಜೈಸ್ವಾಲ್ ಹೇಳಿದ್ದಾರೆ.

“ಈ ಸವಾಲಿನ ಸಮಯದಲ್ಲಿ ಶ್ರೀಲಂಕಾದ ಜನರಿಗೆ ಲಭ್ಯವಿರುವ ಎಲ್ಲಾ ವಿಧಾನಗಳ ಮೂಲಕ ಸಹಾಯ ಮಾಡಲು ಭಾರತ ಬದ್ಧವಾಗಿದೆ” ಎಂದು ಅವರು ಸ್ಪಷ್ಟಪಡಿಸಿದ್ದಾರೆ.

ಚಂಡಮಾರುತ ಪೀಡಿತ ಶ್ರೀಲಂಕಾಕ್ಕೆ ತನ್ನ ಪರಿಹಾರ ಕಾರ್ಯಾಚರಣೆಗಳು ಭಾರತದ “ಸಹಕಾರದ ಕೊರತೆಯಿಂದ ಅಡ್ಡಿಯಾಗುತ್ತಿವೆ. ಭಾರತವು ತನ್ನ ವಾಯುಪ್ರದೇಶವನ್ನು ಬಳಸಲು ಅನುಮತಿಯನ್ನು ವಿಳಂಬ ಮಾಡುತ್ತಿದೆ” ಎಂದು ಪಾಕಿಸ್ಥಾನ ಆರೋಪಿಸಿದ ಕೆಲವೇ ಗಂಟೆಗಳ ನಂತರ ಜೈಸ್ವಾಲ್ ಅವರ ಹೇಳಿಕೆಗಳು ಬಂದಿವೆ.

“ಪಾಕಿಸ್ಥಾ ನದಿಂದ ಶ್ರೀಲಂಕಾಕ್ಕೆ ಮಾನವೀಯ ಸಹಾಯವನ್ನು ಭಾರತ ನಿರ್ಬಂಧಿಸುತ್ತಲೇ ಇದೆ. ಪಾಕಿಸ್ಥಾನದ ಮಾನವೀಯ ನೆರವು ಹೊತ್ತು ಶ್ರೀಲಂಕಾಕ್ಕೆ ಹೋಗುತ್ತಿದ್ದ ವಿಶೇಷ ವಿಮಾನವು ಭಾರತದಿಂದ ವಿಮಾನ ಅನುಮತಿಗಾಗಿ ಕಾಯುತ್ತಾ 60 ಗಂಟೆಗಳಿಗೂ ಹೆಚ್ಚು ಕಾಲ ವಿಳಂಬವನ್ನು ಎದುರಿಸುತ್ತಿದೆ” ಎಂದು ಪಾಕಿಸ್ಥಾನದ ವಿದೇಶಾಂಗ ಕಚೇರಿ ಆರೋಪಿಸಿತ್ತು. ಈ ಆರೋಪವನ್ನು ಭಾರತ ಸಾರಸಗಟಾಗಿ ನಿರಾಕರಿಸಿದೆ.

ಚಂಡಮಾರುತದಿಂದ ಉಂಟಾದ ಪ್ರವಾಹ, ಭೂಕುಸಿತ ಮತ್ತು ಮೂಲಸೌಕರ್ಯ ಕುಸಿತದಿಂದ ಶ್ರೀಲಂಕಾ ತತ್ತರಿಸಿದೆ. ದ್ವೀಪ ರಾಷ್ಟ್ರವು ವಿನಾಶದಿಂದ ಚೇತರಿಸಿಕೊಳ್ಳಲು ಸಹಾಯ ಮಾಡಲು ಭಾರತವು ಆಪರೇಷನ್ ಸಾಗರ್ ಬಂಧುವನ್ನು ಪ್ರಾರಂಭಿಸಿದೆ.

ಶ್ರೀಲಂಕಾ ಅಧಿಕಾರಿಗಳ ಪ್ರಕಾರ, ಮಂಗಳವಾರ ಬೆಳಿಗ್ಗೆವರೆಗೆ ಭೀಕರ ಪ್ರವಾಹ ಮತ್ತು ಭೂಕುಸಿತದಲ್ಲಿ ಕನಿಷ್ಠ 410 ಜನರು ಸಾವನ್ನಪ್ಪಿದ್ದಾರೆ ಮತ್ತು 336 ಜನರು ಕಾಣೆಯಾಗಿದ್ದಾರೆ.