ಇಸ್ರೇಲಿನಲ್ಲಿ ಹೊಸ ಸರ್ಕಾರ ರಚನೆ, ಮೋದಿ ಅಭಿನಂದನೆಗೆ ಧನ್ಯವಾದ ಹೇಳಿದ ನೆತನ್ಯಾಹು

ನವದೆಹಲಿ: ಇಸ್ರೇಲ್ ಪ್ರಧಾನಮಂತ್ರಿ ಬೆಂಜಮಿನ್ ನೆತನ್ಯಾಹು ಅವರು ಇಸ್ರೇಲಿನಲ್ಲಿ ನೂತನ ಸರ್ಕಾರವನ್ನು ರಚನೆ ಮಾಡಿದ್ದಾರೆ. ಈ ಹಿನ್ನೆಲೆಯಲ್ಲಿ ಪ್ರಧಾನಿ ನರೇಂದ್ರ ಮೋದಿ ಅವರು ಅವರಿಗೆ ಅಭಿನಂದನೆಗಳನ್ನು ಸಲ್ಲಿಸಿದ್ದಾರೆ. ಆತ್ಮೀಯ ಗೆಳೆಯ ಮೋದಿಯವರ ಅಭಿನಂದನೆಗೆ ನೆತನ್ಯಾಹು ಅವರು ಧನ್ಯವಾದಗಳನ್ನು ಅರ್ಪಣೆ ಮಾಡಿದ್ದಾರೆ.

ನೆತನ್ಯಾಹು ಅವರ ನೇತೃತ್ವದಲ್ಲಿ ಇಸ್ರೇಲ್‌ನಲ್ಲಿ ಭಾನುವಾರ ನೂತನ ಸರ್ಕಾರವನ್ನು ರಚನೆ ಮಾಡಲಾಗಿದೆ. ಈ ಮೂಲಕ ಅಲ್ಲಿ ಸೃಷ್ಟಿಯಾಗಿದ್ದ ದೀರ್ಘಕಾಲದ ರಾಜಕೀಯ ಬಿಕ್ಕಟ್ಟು ಅಂತ್ಯವಾಗಿದೆ. ಒಂದರ ಮೇಲೊಂದರಂತೆ ಅಲ್ಲಿ ಒಟ್ಟು ಮೂರು ಸಾರ್ವತ್ರಿಕ ಚುನಾವಣೆಗಳನ್ನು ನಡೆಸಲಾಗಿದ್ದರೂ ಸ್ಪಷ್ಟ ಫಲಿತಾಂಶ ಸಿಕ್ಕಿರಲಿಲ್ಲ. ಹೀಗಾಗಿ ಇಸ್ರೇಲ್ 500 ದಿನಗಳ ಕಾಲ ಕೇರ್ ಟೇಕರ್ ಸರ್ಕಾರದ ಅಡಿಯಲ್ಲಿ ಇರಬೇಕಾಯಿತು.

ಭಾನುವಾರ ಇಸ್ರೇಲಿ ಸಂಸತ್ತಿನಲ್ಲಿ ವಿಶ್ವಾಸಮತ ಯಾಚನೆ ನಡೆದಿದ್ದು, ಈ ಸಂದರ್ಭದಲ್ಲಿ 73 ಮತಗಳು ನೂತನ ಸರಕಾರದ ಪರವಾಗಿ ಬಿದ್ದಿದೆ ಮತ್ತು 46 ಮತಗಳು ವಿರುದ್ಧವಾಗಿ ಬಿದ್ದಿವೆ.

ನೆತನ್ಯಾಹು ಅವರು ಹೊಸ ಸರ್ಕಾರವನ್ನು ರಚನೆ ಮಾಡಿದ ಹಿನ್ನೆಲೆಯಲ್ಲಿ ಪ್ರಧಾನಿ ನರೇಂದ್ರ ಮೋದಿ ಅವರು ಅಭಿನಂದನೆಗಳನ್ನು ತಿಳಿಸಿದ್ದಾರೆ. “ಇಸ್ರೇಲಿನಲ್ಲಿ ಐದನೇ ಬಾರಿಗೆ ಸರಕಾರ ರಚನೆ ಮಾಡುತ್ತಿರುವ ನನ್ನ ಗೆಳೆಯ ನೆತನ್ಯಾಹು ಅವರಿಗೆ ಅಭಿನಂದನೆಗಳು” ಎಂದು ಹಿಬ್ರ್ಯೂ ಮತ್ತು ಇಂಗ್ಲೀಷ್ ಭಾಷೆಯಲ್ಲಿ ಮೋದಿ ಟ್ವೀಟ್ ಮಾಡಿದ್ದರು. ನೆತನ್ಯಾಹು ಅವರಿಗೆ ಅಭಿನಂದನೆ ತಿಳಿಸಿದ ಮೊದಲ ಜಾಗತಿಕ ನಾಯಕ ಮೋದಿ ಆಗಿದ್ದಾರೆ.

ಮೋದಿಯವರ ಅಭಿನಂದನೆಗೆ ಧನ್ಯವಾದಗಳನ್ನು ಅರ್ಪಣೆ ಮಾಡಿರುವ ನೇತನ್ಯಾಹು, “ಆತ್ಮೀಯ ಗೆಳೆಯ ಭಾರತದ ಪ್ರಧಾನಮಂತ್ರಿ ಅವರಿಗೆ ಧನ್ಯವಾದ. ನಮ್ಮ ನಡುವಣ ಮಹತ್ವದ ಬಾಂಧವ್ಯವನ್ನು ಮುಂದುವರೆಸುತ್ತೇವೆ” ಎಂದಿದ್ದಾರೆ.