‘ಎದ್ದು ನಿಂತು ಮೋದಿಗೆ 5 ನಿಮಿಷ ಗೌರವಿಸಿ’ ಎಂಬ ಪೋಸ್ಟರ್ ಬಗ್ಗೆ ತೀವ್ರ ಅಸಮಾಧಾನ ವ್ಯಕ್ತಪಡಿಸಿದ ಮೋದಿ

ನವದೆಹಲಿ : ಕೊರೋನಾವೈರಸ್ ಸಾಂಕ್ರಾಮಿಕ ರೋಗದಿಂದ ಭಾರತವನ್ನು ಸುರಕ್ಷಿತವಾಗಿಸುವ ಸಲುವಾಗಿ ಅವಿರತವಾಗಿ ಶ್ರಮಿಸುತ್ತಿರುವ ಪ್ರಧಾನಿ ನರೇಂದ್ರ ಮೋದಿಯವರಿಗೆ ಎದ್ದು ನಿಂತು 5 ನಿಮಿಷ ಗೌರವ ಸಲ್ಲಿಸಬೇಕು ಎಂದು ಜನರಲ್ಲಿ ಮನವಿ ಮಾಡಿಕೊಂಡಿದ್ದ ಪೋಸ್ಟರ್ ಬಗ್ಗೆ ಸ್ವತಃ ಮೋದಿ ಅವರೇ ಅಸಮಾಧಾನವನ್ನು ವ್ಯಕ್ತಪಡಿಸಿದ್ದಾರೆ.

ಒಂದು ವೇಳೆ ಯಾರಿಗಾದರೂ ನನ್ನ ಮೇಲೆ ಅಷ್ಟೊಂದು ಪ್ರೀತಿ ಇದ್ದರೆ, ಅವರು ಒಂದು ಬಡ ಕುಟುಂಬದ ಜವಾಬ್ದಾರಿಯನ್ನು ಕನಿಷ್ಠ ಸಾಂಕ್ರಾಮಿಕ ರೋಗದ ಬಿಕ್ಕಟ್ಟು ಮುಗಿಯುವವರೆಗೆ ಆದರೂ ವಹಿಸಿಕೊಳ್ಳಲಿ. ಇದಕ್ಕಿಂತ ದೊಡ್ಡ ಗೌರವ ನನಗೆ ಬೇರೆ ಯಾವುದೂ ಇಲ್ಲ ಎಂದು ಮೋದಿ ಹೇಳಿದ್ದಾರೆ.

ಏಪ್ರಿಲ್ 12 ರಂದು ಸಂಜೆ 5 ಗಂಟೆಗೆ 5 ನಿಮಿಷಗಳ ಕಾಲ ಬಾಲ್ಕನಿಯಲ್ಲಿ ನಿಂತು ಎಲ್ಲರೂ ಪ್ರಧಾನಿಗೆ ಗೌರವವನ್ನು ಸೂಚಿಸಬೇಕು ಎಂಬ ಪೋಸ್ಟರ್‌ಗಳು ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡುತ್ತಿವೆ.

“ಈ ಮನುಷ್ಯ ನಮ್ಮ ದೇಶಕ್ಕಾಗಿ ನಮಗಾಗಿ ಸಾಕಷ್ಟನ್ನು ಮಾಡಿದ್ದಾರೆ. ಈ ಭಾನುವಾರ ಏಪ್ರಿಲ್ 12 ಕ್ಕೆ ಸಂಜೆ 5 ಗಂಟೆಗೆ ಎಲ್ಲರೂ ಎದ್ದು ನಿಂತು ಪ್ರಧಾನಮಂತ್ರಿಗೆ ಗೌರವ ಸೂಚಿಸುವ” ಎಂದು ಪೋಸ್ಟರ್­ನಲ್ಲಿ ಸೂಚಿಸಲಾಗಿದೆ.

ಆದರೆ ಪ್ರಧಾನ ಮಂತ್ರಿ ಪೋಸ್ಟರ್ ಬಗ್ಗೆ ಅಸಮಾಧಾನವನ್ನು ವ್ಯಕ್ತಪಡಿಸಿದ್ದಾರೆ. ಟ್ವೀಟ್ ಮಾಡಿರುವ ಮೋದಿ, “ಕೆಲವರು 5 ನಿಮಿಷ ನಿಂತು ಮೋದಿಯವರನ್ನು ಸನ್ಮಾನಿಸುವ ಬಗ್ಗೆ ಮಾತನಾಡುತ್ತಿದ್ದಾರೆ ಎಂಬ ವಿಷಯ ನನ್ನ ಗಮನಕ್ಕೆ ಬಂದಿದೆ. ಮೇಲ್ನೋಟಕ್ಕೆ ಇದು ಮೋದಿಯನ್ನು ವಿವಾದಕ್ಕೆ ಸಿಲುಕಿಸುವ ಪಿತೂರಿ ಎಂದು ತೋರುತ್ತಿದೆ. ಆದರೆ ಎಲ್ಲರಲ್ಲೂ ನನ್ನ ವಿನಂತಿ ಏನೆಂದರೆ, ನಿಮಗೆ ನನ್ನನ್ನು ಸನ್ಮಾನಿಸುವ ಇಚ್ಛೆ ಇದ್ದರೆ ದಯಮಾಡಿ ಕರೋನಾ ಬಿಕ್ಕಟ್ಟು ಮುಗಿಯುವವರೆಗೆ ಒಂದು ಬಡ ಕುಟುಂಬದ ಜವಾಬ್ದಾರಿಯನ್ನು ವಹಿಸಿಕೊಳ್ಳಿ. ಇದಕ್ಕಿಂತ ದೊಡ್ಡ ಸನ್ಮಾನ ನನಗೆ ಬೇರೊಂದಿಲ್ಲ” ಎಂದಿದ್ದಾರೆ.

हो सकता है कि यह किसी की सदिच्छा हो, तो भी मेरा आग्रह है कि यदि सचमुच में आपके मन में इतना प्यार है और मोदी को सम्मानित ही करना है तो एक गरीब परिवार की जिम्मेदारी कम से कम तब तक उठाइए, जब तक कोरोना वायरस का संकट है। मेरे लिए इससे बड़ा सम्मान कोई हो ही नहीं सकता।

— Narendra Modi (@narendramodi) April 8, 2020