ಪ್ಲಾಸ್ಟಿಕ್ ತಿನ್ನುವ ಬ್ಯಾಕ್ಟೀರಿಯಾ ಕಂಡುಹಿಡಿದ ನೊಯ್ಡಾ ಪ್ರಾಧ್ಯಾಪಕಿ

ಇಂದು ಎಲ್ಲಾ ದೇಶಗಳನ್ನು ಅತಿಯಾಗಿ ಪೀಡಿಸುವ ದೊಡ್ಡ ಸಮಸ್ಯೆಯೆಂದರೆ ಪ್ಲಾಸ್ಟಿಕ್ ತ್ಯಾಜ್ಯಗಳ ನಿರ್ವಹಣೆ. ನಾವೆಲ್ಲರೂ ನಿಧಾನಗತಿಯಲ್ಲಿ ಏಕ-ಬಳಕೆಯ ಪ್ಲಾಸ್ಟಿಕ್‌ಗಳಿಂದ ದೂರ ಸರಿಯುತ್ತಿರುವ ಈ ಸಂದರ್ಭದಲ್ಲಿ, ಪ್ರಸ್ತುತ ಅಸ್ತಿತ್ವದಲ್ಲಿರುವ ಪ್ಲಾಸ್ಟಿಕ್ ತ್ಯಾಜ್ಯವನ್ನು ಹೇಗೆ ನಿಭಾಯಿಸಬೇಕು ಎಂಬ ಬಗ್ಗೆ ವಿಸ್ತೃತವಾಗಿ ಚಿಂತನೆಯನ್ನು ನಡೆಸುವ ಅವಶ್ಯಕತೆ ಇದೆ.

ವಿಜ್ಞಾನಿಗಳ ತಂಡವೊಂದರ ಆವಿಷ್ಕಾರವು ವಿಶ್ವದ ಪ್ಲಾಸ್ಟಿಕ್ ಸಮಸ್ಯೆಯನ್ನು ಪರಿಹರಿಸಲು ಸಹಾಯ ಮಾಡುವ ನಿರೀಕ್ಷೆಯನ್ನು ಹುಟ್ಟು ಹಾಕಿದೆ. ಈ ತಿಂಗಳ ಆರಂಭದಲ್ಲಿ, ಗ್ರೇಟರ್ ನೋಯ್ಡಾದ ಶಿವ ನಾಡರ್ ವಿಶ್ವವಿದ್ಯಾಲಯದ ಲೈಫ್ ಸೈನ್ಸಸ್ ಸ್ಕೂಲ್ ಆಫ್ ನ್ಯಾಚುರಲ್ ಸೈನ್ಸಸ್ (ಸೋಎನ್ಎಸ್) ವಿಭಾಗದ ಸಹಾಯಕ ಪ್ರಾಧ್ಯಾಪಕಿ ಡಾ. ರಿಚಾ ಪ್ರಿಯದರ್ಶಿನಿ ನೇತೃತ್ವದ ಸಂಶೋಧಕರ ಗುಂಪು ಪ್ಲಾಸ್ಟಿಕ್ ತಿನ್ನುವ ಬ್ಯಾಕ್ಟೀರಿಯಾವನ್ನು ಕಂಡುಹಿಡಿದಿದೆ!

ಪ್ಲಾಸ್ಟಿಕ್‌ಗಳು ಸಂಕೀರ್ಣ ಪಾಲಿಮರ್‌ಗಳಾಗಿವೆ – ಇದು ನೀರಿನಲ್ಲಿ ಕರಗದೇ ಇರುವ ಅಣುಗಳ ಸರಪಳಿಗಳಾಗಿವೆ. ಈ ಸರಪಳಿಗಳ ಬಲವು ಪ್ಲಾಸ್ಟಿಕ್ ಅನ್ನು ಹೆಚ್ಚು ಬಾಳಿಕೆ ಬರುವಂತೆ ಮಾಡುತ್ತದೆ, ಇದು ನೈಸರ್ಗಿಕವಾಗಿ ಕೊಳೆಯಲೂ ಬಹಳ ಸಮಯ ತೆಗೆದುಕೊಳ್ಳುತ್ತದೆ.

ತಮ್ಮ ಸಂಶೋಧನೆಯ ಬಗ್ಗೆ ಮಾಹಿತಿಯನ್ನು ನೀಡಿರುವ ಡಾ. ಪ್ರಿಯದರ್ಶಿನಿ, “ಸುಮಾರು ಎರಡು ವರ್ಷಗಳ ಹಿಂದೆ, ಶಿವ ನಾಡರ್ ವಿಶ್ವವಿದ್ಯಾಲಯದಲ್ಲಿನ ನಮ್ಮ ತಂಡ ವಿಶ್ವವಿದ್ಯಾಲಯಕ್ಕೆ ಹತ್ತಿರವಿರುವ ಗದ್ದೆಗಳ ಬಯೋಟಾವನ್ನು ಅನ್ವೇಷಿಸಲು ಪ್ರಾರಂಭಿಸಿದೆವು. ನಾವು ಸಂಗ್ರಹಿಸಿದ ಎಲ್ಲದರಿಂದ ನಾವು ತಳಿಗಳನ್ನು ಸ್ಯಾಂಪಲ್ ಮಾಡುತ್ತಿದ್ದೇವೆ.”

ಗದ್ದೆಗಳು ಸಾಮಾನ್ಯವಾಗಿ ವೈವಿಧ್ಯಮಯ ಪರಿಸರ ವ್ಯವಸ್ಥೆಯನ್ನು ಹೊಂದಿರುತ್ತವೆ, ಆದರೆ ಅವು ತುಲನಾತ್ಮಕವಾಗಿ ಪರಿಶೋಧಿಸಲ್ಪಟ್ಟಿಲ್ಲ ಎಂದು ಅವರು ಹೇಳುತ್ತಾರೆ. ಗದ್ದೆಗಳನ್ನು ಅನ್ವೇಷಿಸಿದಾಗ, ಅವರು ವಿಶಿಷ್ಟವಾದ ಸ್ವರೂಪ ಹೊಂದಿರುವ ಪ್ಲಾಸ್ಟಿಕ್ ಅನ್ನು ತಿನ್ನುವ ಬ್ಯಾಕ್ಟೀರಿಯಾವನ್ನು ಪತ್ತೆ ಮಾಡುತ್ತಾರೆ.

ಈ ಬ್ಯಾಕ್ಟೀರಿಯಾದ ಬಗ್ಗೆ ಇನ್ನಷ್ಟು ಮಾಹಿತಿ ಕಲೆ ಹಾಕಲು ಪ್ರಿಯದರ್ಶಿನಿ ಅವರ ನೇತೃತ್ವದ ಸಂಶೋಧಕರ ತಂಡ ಮುಂದಾಯಿತು.

ಈ ಬ್ಯಾಕ್ಟೀರಿಯಾಗಳು ಪಾಲಿಸ್ಟೈರೀನ್ ಅನ್ನು ಕೆಳಮಟ್ಟಕ್ಕಿಳಿಸುವ ಕಿಣ್ವಗಳನ್ನು ಹೊಂದಿರುತ್ತವೆ ಮತ್ತು ನಂತರ ತಮ್ಮನ್ನು ತಾವು ಬೆಳೆಯಲು ಮತ್ತು ಉಳಿಸಿಕೊಳ್ಳಲು ಅವನತಿ ಹೊಂದಿದ ವಸ್ತುವನ್ನು ಬಳಸುತ್ತವೆ ಎಂದು ಅವರು ಹೇಳುತ್ತಾರೆ.

ಬ್ಯಾಕ್ಟೀರಿಯಾ – ಎಕ್ಸಿಗುಬ್ಯಾಕ್ಟೀರಿಯಂ ಸಿಬಿರಿಕಮ್ ಸ್ಟ್ರೈನ್ ಡಿಆರ್ 11 ಮತ್ತು ಎಕ್ಸಿಗುಬ್ಯಾಕ್ಟೀರಿಯಂ ಉಂಡೆ ಸ್ಟ್ರೈನ್ ಡಿಆರ್ 14 – ಎರಡು ವಿಶಿಷ್ಟ ಗುಣಗಳನ್ನು ಹೊಂದಿವೆ. ಪಾಲಿಸ್ಟೈರೀನ್­ನ ಮೇಲ್ಮೈಯನ್ನು ನೆಲೆಯನ್ನಾಗಿ ಮಾಡುವ ಸಾಮರ್ಥ್ಯವು ಸಣ್ಣ ಸೀಮಿತ ಜಾಗದಲ್ಲಿ ವೇಗವಾಗಿ ಬೆಳೆಯಲು ಅನುವು ಮಾಡಿಕೊಡುತ್ತದೆ. ಇದು ಪಾಲಿಸ್ಟೈರೀನ್‌ನ ಅವನತಿಗೆ ಸಹಾಯ ಮಾಡುತ್ತದೆ. ಇತರ ಗುಣವೆಂದರೆ, ಈ ಬ್ಯಾಕ್ಟೀರಿಯಾಗಳು ಯಾವುದೇ ಪೂರ್ವ-ಚಿಕಿತ್ಸೆಯಿಲ್ಲದೆ ಪಾಲಿಸ್ಟೈರೀನ್ ಮೇಲ್ಮೈಯನ್ನು ನೆಲೆಯನ್ನಾಗಿ ಮಾಡಲು ಸಮರ್ಥವಾಗಿವೆ ಎಂದು ಡಾ ಪ್ರಿಯದರ್ಶಿನಿ ತಿಳಿಸುತ್ತಾರೆ.

ಬ್ಯಾಕ್ಟೀರಿಯಾವು ಪ್ಲಾಸ್ಟಿಕ್‌ನೊಂದಿಗೆ ಸಂಪರ್ಕಕ್ಕೆ ಬಂದಾಗ, ಅದು ಇಂಗಾಲದ ಮೂಲವಾಗಿ ಬಳಸುತ್ತದೆ ಮತ್ತು ಪಾಲಿಸ್ಟೈರೀನ್‌ನ ಭೌತಿಕ ಗುಣಲಕ್ಷಣಗಳನ್ನು ಬದಲಿಸುವ ಬಯೋಫಿಲ್ಮ್‌ಗಳನ್ನು ರಚಿಸುತ್ತದೆ ಮತ್ತು ಪಾಲಿಮರ್ ಸರಪಳಿಗಳನ್ನು ಮುರಿಯಲು ಜಲವಿಚ್ಛೇದಕ ಕಿಣ್ವಗಳ ಬಿಡುಗಡೆಯೊಂದಿಗೆ ನೈಸರ್ಗಿಕ ಅವನತಿಯ ಪ್ರಕ್ರಿಯೆಯನ್ನು ಪ್ರಾರಂಭಿಸುತ್ತದೆ.

“ನಾವು ಗಟ್ಟಿಯಾದ ಪ್ಲಾಸ್ಟಿಕ್ ಅನ್ನು ಪರಿಶೀಲಿಸಿದ್ದೇವೆ ಮತ್ತು ಇದು ಒಂದು ರೀತಿಯ ಆಕ್ಸಿಡೀಕರಣ ಪ್ರಕ್ರಿಯೆಯಿಂದ ಅವನತಿಯನ್ನು ನಿರ್ವಹಿಸಬಲ್ಲವು ಆದರೆ ಈ ಅವನತಿಗೆ ಕಾರಣವೇನು ಎಂಬ ಬಗ್ಗೆ ನಿಖರವಾದ ಸಂಶೋಧನೆಯು ನಡೆಯುತ್ತಿದೆ” ಎಂದು ಡಾ .ಪ್ರಿಯದರ್ಶಿನಿ ತಿಳಿಸುತ್ತಾರೆ.

ಈ ಸಂಶೋಧನೆಯನ್ನು ಪ್ರತಿಷ್ಠಿತ ವೈಜ್ಞಾನಿಕ ಜರ್ನಲ್, RSC (ರಾಯಲ್ ಸೊಸೈಟಿ ಆಫ್ ಕೆಮಿಸ್ಟ್ರಿ) ಅಡ್ವಾನ್ಸಸ್­ನಲ್ಲಿ ಪ್ರಕಟಿಸಲಾಗಿದೆ. ಈ ಬ್ಯಾಕ್ಟೀರಿಯಂ ಅನ್ನು ಪ್ರತ್ಯೇಕಿಸಲು ತಂಡವು ಹೇಗೆ ಯಶಸ್ವಿಯಾಯಿತು ಮತ್ತು ಅದರ ಕಾರ್ಯಗಳನ್ನು ಹೇಗೆ ಗುರುತಿಸಿತು ಎಂಬುದನ್ನು ಇದರಲ್ಲಿ ವಿವರಿಸಲಾಗಿದೆ.

ಶಿವ ನಾಡರ್ ವಿಶ್ವವಿದ್ಯಾಲಯದ ಭೌತಶಾಸ್ತ್ರ ವಿಭಾಗದ ಸಹಾಯಕ ಪ್ರಾಧ್ಯಾಪಕ ಡಾ.ಸುಸಂತಾ ಸಿನ್ಹಾ ರಾಯ್ ಅವರೊಂದಿಗೆ ಡಾ. ಪ್ರಿಯದರ್ಶಿನಿ ಅವರು ಪ್ಲಾಸ್ಟಿಕ್ ಮೇಲೆ ಈ ಬ್ಯಾಕ್ಟೀರಿಯಾ ಹೇಗೆ ಪರಿಣಾಮ ಬೀರುತ್ತದೆ ಎಂಬುದನ್ನು ಅರ್ಥಮಾಡಿಕೊಳ್ಳಲು ಬ್ಯಾಕ್ಟೀರಿಯಂನ ಭೌತಿಕ ಗುಣಲಕ್ಷಣಗಳನ್ನು ಅಧ್ಯಯನ ಮಾಡುವುದನ್ನು ಮುಂದುವರೆಸಿದ್ದಾರೆ.

ಈ ಆವಿಷ್ಕಾರದ ಭವಿಷ್ಯ ಏನು ಎಂದು ಕೇಳಿದಾಗ, ಡಾ. ಪ್ರಿಯದರ್ಶಿನಿ, “ಈ ಸಮಯದಲ್ಲಿ ನಾವು ಇನ್ನೂ ಸಂಶೋಧನೆ ನಡೆಸುತ್ತಿದ್ದೇವೆ ಮತ್ತು ಏನಾಗುತ್ತಿದೆ ಎಂಬುದರ ಕುರಿತು ಹೆಚ್ಚಿನ ಮಾಹಿತಿಯನ್ನು ನಾನು ಈಗ ಬಹಿರಂಗಪಡಿಸಲು ಸಾಧ್ಯವಿಲ್ಲ. ನಮಗೆ ತಿಳಿದಿರುವುವಂತೆ ಇದು ಸಾಮರ್ಥ್ಯವನ್ನು ಹೊಂದಿದೆ ಮತ್ತು ಆದ್ದರಿಂದ ನಾವು ಈ ಸಮಯದಲ್ಲಿ ವಿವಿಧ ಪ್ರಯೋಗಗಳನ್ನು ನಡೆಸುತ್ತಿದ್ದೇವೆ” ಎಂದಿದ್ದಾರೆ.

ಇದು ಒಂದು ದೊಡ್ಡ ಆವಿಷ್ಕಾರವಾಗಿದ್ದು ಅದು ನಮ್ಮ ಪ್ಲಾಸ್ಟಿಕ್ ಸಮಸ್ಯೆಗಳಿಗೆ ಹೊಸ ಮತ್ತು ಉತ್ತಮ ಪರಿಹಾರಗಳನ್ನು ನೀಡುತ್ತದೆ ಎಂಬುದರಲ್ಲಿ ಯಾವುದೇ ಅನುಮಾನವಿಲ್ಲ.