ನ್ಯೂಸ್ ಪೇಪರ್, ತರಕಾರಿ-ಹಣ್ಣು ಬೀಜಗಳಿಂದ ಪರಿಸರ ಸ್ನೇಹಿ ಪೆನ್ ತಯಾರಿಸಿದ ಒರಿಸ್ಸಾದ ಆವಿಷ್ಕಾರಿಗಳು

ಭುವನೇಶ್ವರ: ಒರಿಸ್ಸಾದ ಭುವನೇಶ್ವರ ಮೂಲದ ಆವಿಷ್ಕಾರಿಗಳಾದ ಪ್ರೇಮ್ ಪಾಂಡೆ ಮತ್ತು ಎಂ.ಡಿ ಅಹ್ಮದ್ ರಾಝಾ ಎಂಬುವವರು ಪ್ಲಾಸ್ಟಿಕ್ ಪೆನ್ನುಗಳಿಗೆ ಪರ್ಯಾಯವಾಗಿ, ನ್ಯೂಸ್ ಪೇಪರ್, ತರಕಾರಿ-ಹಣ್ಣು ಮತ್ತು ಹೂವಿನ ಬೀಜಗಳನ್ನು ಬಳಸಿ ಬಿಸಾಕಬಲ್ಲಂತಹ ಪರಿಸರ ಸ್ನೇಹಿಯಾದ ಪೆನ್ನುಗಳನ್ನು ತಯಾರಿಸಿದ್ದಾರೆ.

ಪ್ಲಾಸ್ಟಿಕ್ ಬಳಕೆಯಿಂದಾಗಿ ಹೆಚ್ಚುತ್ತಿರುವ ಸಮಸ್ಯೆಗಳು ಮತ್ತು ಪರಿಸರದ ಮೇಲೆ ಅದು ಬೀರುವ ದುಷ್ಪರಿಣಾಮಗಳನ್ನು ಗಮನದಲ್ಲಿಟ್ಟುಕೊಂಡು, ಪಾಂಡೆ ಮತ್ತು ರಾಝಾ ಈ “ಪರಿಸರ ಸ್ನೇಹಿ ಪೆನ್”ಗಳನ್ನು ಕಂಡು ಹಿಡಿದಿದ್ದಾರೆ. ಈ ಪೆನ್­ಗಳ ಮೂಲಕ ಪ್ಲಾಸ್ಟಿಕ್ ಪೆನ್ನುಗಳ ಪ್ರಾಬಲ್ಯವನ್ನು ಕುಗ್ಗಿಸಲು ಪ್ರಯತ್ನಿಸಿದ್ದಾರೆ. ಇವರಿಬ್ಬರು ಸ್ಥಾಪನೆ ಮಾಡಿರುವ ಸ್ಟಾರ್ಟ್­ ಅಪ್­ ‘ಲಿಖ್ನಾ’ ಈ ಪೆನ್ನುಗಳನ್ನು ತಯಾರಿಸುತ್ತದೆ.

ಈ ಪೆನ್ನುಗಳಲ್ಲಿ ಎರಡು ಮಾದರಿಗಳಿವೆ. ಒಂದು ತರಕಾರಿ, ಹಣ್ಣು ಮತ್ತು ಹೂವಿನ ಬೀಜಗಳನ್ನು ಒಳಗೊಂಡಿರುತ್ತದೆ. ಈ ಪೆನ್ನನ್ನು ಎಸೆದ ನಂತರ ಅದು ಸಸ್ಯಗಳಾಗಿ ರೂಪುಗೊಳ್ಳಬಹುದು, ಯಾಕೆಂದರೆ ಅದರೊಳಗೆ ಬೀಜಗಳಿರುತ್ತವೆ. ಇನ್ನೊಂದನ್ನು ಬೀಜಗಳಿಲ್ಲದೆ ತಯಾರಿಸಲಾಗುತ್ತದೆ. ಮೊದಲ ಮಾದರಿಯ ಪೆನ್ನಿನ ಬೆಲೆ ರೂ. 5 ಮತ್ತು ಇನ್ನೊಂದು ಪೆನ್ನಿನ ಬೆಲೆ 7 ರೂಪಾಯಿ.

“ಪ್ಲಾಸ್ಟಿಕ್ ನಮ್ಮ ಪರಿಸರಕ್ಕೆ ಸಾಕಷ್ಟು ಹಾನಿಯುಂಟು ಮಾಡುತ್ತಿರುವುದರಿಂದ ನಾವು ಪ್ಲಾಸ್ಟಿಕ್ ಪೆನ್ನುಗಳಿಗೆ ಪರ್ಯಾಯವಾಗಿ ಪರಿಸರ ಸ್ನೇಹಿ, ಬಳಸಿ ಎಸೆಯುವಂತಹ ಪೆನ್ನುಗಳನ್ನು ತಯಾರಿಸಲು ಪ್ರಯತ್ನಿಸಿದೆವು. ಈ ಪೆನ್ನುಗಳಲ್ಲಿ ಪ್ಲಾಸ್ಟಿಕ್ ಮರುಪೂರಣ ಇರುವುದರಿಂದ ಇವುಗಳು ಸಂಪೂರ್ಣ ಪ್ಲಾಸ್ಟಿಕ್ ಮುಕ್ತವಾಗಿಲ್ಲ, ಆದರೆ ಪೆನ್ನಿನ ದೇಹವನ್ನು ನ್ಯೂಸ್ ಪೇಪರ್­ಗಳಿಂದ ರಚನೆ ಮಾಡಲಾಗಿದೆ. ಆದ್ದರಿಂದ ಶೇ.100ರಷ್ಟು ಪ್ಲಾಸ್ಟಿಕ್ ಹೊಂದಿರುವ ಸಾಮಾನ್ಯ ಪೆನ್ನುಗಳಿಗೆ ಹೋಲಿಸಿದರೆ, ನಮ್ಮ ಪೆನ್ನುಗಳಲ್ಲಿ ಕೇವಲ ಶೇ. 10 ರಷ್ಟು ಪ್ಲಾಸ್ಟಿಕ್ ಇದೆ. ನಮ್ಮ ಮುಂದಿನ ಗುರಿ ಪ್ಲಾಸ್ಟಿಕ್ ಮರುಪೂರಣವನ್ನು ತೆಗೆದು ಹಾಕುವುದು ಮತ್ತು ಆ ಮೂಲಕ ಪೆನ್ನನ್ನು ಒಳಗೆ ಮತ್ತು ಹೊರಗೆ ಸಂಪೂರ್ಣವಾಗಿ ಪರಿಸರ ಸ್ನೇಹಿ ಪೆನ್ನನ್ನಾಗಿ ಮಾಡುವುದು” ಎಂದು ಪ್ರೇಮ್ ಪಾಂಡೆ ಹೇಳಿದ್ದಾರೆ.

“ಸಾಮಾನ್ಯವಾಗಿ ಬಳಸಿ ಎಸೆಯುವ ಪೆನ್ನುಗಳಿಗಿಂತ ಈ ಪೆನ್ನು ಸಾಕಷ್ಟು ಭಿನ್ನವಾಗಿದೆ, ಜನರು ಈ ಪೆನ್ನುಗಳನ್ನು ಮಡಕೆ ಅಥವಾ ಮಣ್ಣಿನಲ್ಲಿ ಹೂತು ಹಾಕಬಹುದು ಮತ್ತು ವಾರಗಳಲ್ಲಿ ಅದು ಸಸ್ಯವಾಗಿ ಮೊಳಕೆಯೊಡೆಯುತ್ತದೆ. ಈ ಪೆನ್ನುಗಳಿಗೆ ಭಾರತದಲ್ಲಿ ಮಾತ್ರವಲ್ಲದೆ ಜರ್ಮನಿ ಮತ್ತು ಆಸ್ಟ್ರೇಲಿಯಾದಿಂದಲೂ ಉತ್ತಮ ಪ್ರಶಂಸೆಗಳು ಬರುತ್ತಿವೆ. ಈ ಪೆನ್ನುಗಳು ಅಲ್ಲಿನ ಮಾರುಕಟ್ಟೆಗಳಲ್ಲೂ ಈಗ ಲಭ್ಯವಿದೆ” ಎಂದು ರಾಝಾ ಹೇಳಿದ್ದಾರೆ.