ಉದ್ಯೋಗದಲ್ಲಿ ಜೀವನ ಮೌಲ್ಯಗಳ ಮೂಲಕ ಸಂತೃಪ್ತಿಯನ್ನು ಪಡೆಯಲು ಸಾಧ್ಯ

ಬೆಳ್ತಂಗಡಿ : ನಾವು ಮಾಡುವ ಉದ್ಯೋಗದಲ್ಲಿ ಜೀವನ ಮೌಲ್ಯಗಳನ್ನು ಅಳವಡಿಸಿಕೊಂಡು, ನೈಪುಣ್ಯತೆಯನ್ನು ಸಾಧಿಸಿಕೊಂಡು ಸೇವಾ ಬದ್ಧತೆಯಿಂದ ಕೆಲಸ ನಿರ್ವಹಿಸುವ ಮೂಲಕ ಜೀವನದಲ್ಲಿ ಸಂತೃಪ್ತಿಯನ್ನು ಕಾಣಲು ಸಾಧ್ಯ ಎಂದು ಶ್ರೀ ಧರ್ಮಸ್ಥಳ ಮಂಜುನಾಥೇಶ್ವರ ಶಿಕ್ಷಣ ಸಂಸ್ಥೆಗಳ ಹಿರಿಯ ಉಪಾಧ್ಯಕ್ಷ ಪ್ರೊ.ಎಸ್.ಪ್ರಭಾಕರ್ ಅವರು ಅಭಿಪ್ರಾಯಪಟ್ಟರು.

ಪ್ರೊ.ಎಸ್.ಪ್ರಭಾಕರ್ ಅವರು ಬೆಳ್ತಂಗಡಿ ರೋಟರಿ ಕ್ಲಬ್ ಇಂದು ಉಜಿರೆಯ ಮಂಜುಶ್ರೀ ಮುದ್ರಣಾಲಯದ ಸಿಬ್ಬಂದಿಗಳಿಗಾಗಿ ಆಯೋಜಿಸಿದ ವೃತ್ತಿಯ ಉತ್ಕೃಷ್ಟತೆಗಾಗಿ ಚತುರ್ವಿಧ ಪರೀಕ್ಷೆ ಕಾರ್ಯಾಗರದಲ್ಲಿ ಸಮಾರೋಪ ಭಾಷಣ ಮಾತನಾಡುತ್ತಿದ್ದರು. ಕೆಲಸ ಮಾಡುವ ಸಂಸ್ಥೆಯನ್ನು ನನ್ನ ಸಂಸ್ಥೆ ಎಂಬ ಭಾವನೆಯಿಂದ ತೊಡಗಿಸಿಕೊಂಡಾಗ ಸಂಸ್ಥೆಯ ಉದ್ದೇಶವೇ ನಮ್ಮ ಉದ್ದೇಶ ಆಗಿ ಕೆಲಸ ಎನ್ನುವುದು ಸೇವೆಯ ರೂಪ ಪಡೆಯುತ್ತದೆ.

ದರಿಂದ ಸಂಸ್ಥೆಯೂ ಬೆಳೆಯುತ್ತದೆ, ಅದರೊಂದಿಗೆ ನಾವೂ ಬೆಳೆಯುತ್ತೇವೆ ಎಂದು ತಿಳಿಸಿದರು ನಾವು ಮಾಡುವ ಕೆಲಸವನ್ನು ಪ್ರೀತಿಸಿ, ಸಹೋದ್ಯೋಗಿಗಳು ಮತ್ತು ಗ್ರಾಹಕರೊಂದಿಗೆ ಉತ್ತಮ ಸಂಬಂಧ ಬೆಳೆಸುವುದರ ಮೂಲಕ ಉದ್ಯೋಗ ಮತ್ತು ಜೀವನದಲ್ಲಿ ತೃಪ್ತಿಯನ್ನು ಕಾಣಲು ಸಾಧ್ಯ. ಚತುರ್ವಿಧ ಪರೀಕ್ಷೆಗೆ ಅನುಗುಣವಾಗಿ ನಾವು ಆಲೋಚಿಸುವ, ಹೇಳುವ ಮತ್ತು ಮಾಡುವ ಕೆಲಸಗಳು ಸತ್ಯ, ನ್ಯಾಯುತವಾಗಿದ್ದು, ಉತ್ತಮ ಸಂಬಂಧ ಬೆಳೆಸಿ, ಎಲ್ಲರಿಗೂ ಪ್ರಯೋಜನಕಾರಿಯಾಗುವಂತಾದಾಗ ಮಾತ್ರ ನಾವು ಸಮಾಜಮುಖಿಯಾಗಿ ಬೆಳೆದು ಜೀವನದಲ್ಲಿ ಸಂತೃಪ್ತಿಯನ್ನು ಪಡೆಯಲು ಸಾಧ್ಯ ಎಂದು ಬೆಳ್ತಂಗಡಿ ರೋಟರಿ ಅಧ್ಯಕ್ಷ ಡಾ.ಎ.ಜಯ ಕುಮಾರ ಶೆಟ್ಟಿ ಅವರು ಪ್ರಾಸ್ತಾವಿಕವಾಗಿ ಮಾತನಾಡುತ್ತಾ ತಿಳಿಸಿದರು.

ಬೆಳ್ತಂಗಡಿ ರೋಟರಿಯ ವೃತ್ತಿ ಸೇವೆಯ ನಿರ್ದೇಶಕ ಹಾಗೂ ನ್ಯಾಯವಾದಿ ಧನಂಜಯ ರಾವ್.ಬಿ.ಕೆ ಅವರು ಮಾತನಾಡುತ್ತಾ ಕೆಲಸದಲ್ಲಿ ಅಂಧಾನುಕರಣೆ ಸಲ್ಲ. ಕೆಲಸ ಮಾಡುವಾಗ ಒತ್ತಡವನ್ನು ತಂದುಕೊಳ್ಳದೆ ಯೋಚಿಸಿ, ಹೊಸತನವನ್ನು ಅಳವಡಿಸಿಕೊಳ್ಳಬೇಕು. ಕೆಲಸವನ್ನು ಪ್ರೀತಿಸಿದಾಗ ಮಾತ್ರ ನಾವು ಜೀವನದಲ್ಲಿ ಸಾಧನೆ ಮಾಡಲು ಸಾಧ್ಯ ಹಾಗೂ ಸಮಾಜಕ್ಕೆ ಕೊಡುಗೆಯನ್ನು ನೀಡಲು ಸಾಧ್ಯ ಎಂದು ತಿಳಿಸಿದರು. ಉಜಿರೆ ರುಡ್ಸೆಟ್ ಸಂಸ್ಥೆಯ ಅಧ್ಯಾಪಕರಾದ ಜೇಮ್ಸ್ ಹಾಗೂ ಅನಸೂಯಾ ಚಟುವಟಿಕೆಗಳ ಮೂಲಕ ಕೆಲಸದಲ್ಲಿ ಒತ್ತಡ ನಿರ್ವಹಣಾ ವಿಧಾನಗಳ ಬಗ್ಗೆ ತಿಳಿಸಿದರು. ರೋಟರಿ ಸದಸ್ಯರಾದ ಅರುಣ್ ಕುಮಾರ್ ಹಾಗೂ ಅಮರನಾಥ್ ಪ್ರಸಾದ್ ಕಾರ್ಯಕ್ರಮದಲ್ಲಿ ಉಪಸ್ಥಿತರಿದ್ದರು. ಕಾರ್ಯಾಗಾರದಲ್ಲಿ ಮಂಜುಶ್ರೀ ಮುದ್ರಣಾಲಯದ ಸಿಬ್ಬಂದಿ ಭಾಗವಹಿಸಿದ್ದರು. ಮಂಜುಶ್ರೀ ಮುದ್ರಣಾಲಯದ ವ್ಯವಸ್ಥಾಪಕ ಶೇಖರ್ ಅವರು ವಂದಿಸಿದರು.