ಭಾರತಕ್ಕೆ ಬೇಷರತ್ತು ಸಹಾಯ ಮಾಡಲು ಸಿದ್ಧರಿದ್ದೇವೆ ಎಂದ ಇಸ್ರೇಲ್

ನವದೆಹಲಿ: ತನ್ನನ್ನು ತಾನು ಸ್ವರಕ್ಷಣೆ ಮಾಡಿಕೊಳ್ಳುವಲ್ಲಿ, ಅದರಲ್ಲೂ ಪ್ರಮುಖವಾಗಿ ಭಯೋತ್ಪಾದನೆ ವಿರುದ್ಧ ಹೋರಾಡುವಲ್ಲಿ ಭಾರತಕ್ಕೆ ಬೇಷರತ್ತು ಬೆಂಬಲ ನೀಡುವುದಾಗಿ ಇಸ್ರೇಲ್ ಹೇಳಿದೆ, ತನ್ನ ಸಹಾಯಕ್ಕೆ ಯಾವುದೇ ಮಿತಿಯೂ ಇಲ್ಲ ಎಂಬುದಾಗಿ ಅದು ಭರವಸೆಯಿತ್ತಿದೆ. ಭಯೋತ್ಪಾದನೆಯ ವಿರುದ್ಧ ಇಸ್ರೇಲ್ ಮಾದರಿಯ ದಾಳಿಗಳನ್ನು ನಡೆಸುವ ಬಗ್ಗೆ ಭಾರತ ಚಿಂತನೆ ನಡೆಸುತ್ತಿರುವ ಸಂದರ್ಭದಲ್ಲಿ ಇಸ್ರೇಲ್‌ನಿಂದ ಇಂತಹ ಭರವಸೆ ಸಿಕ್ಕಿರುವುದು ಅತೀ ಮಹತ್ವ ಪಡೆದುಕೊಂಡಿದೆ.

ಭಾರತಕ್ಕೆ ಹೊಸದಾಗಿ ನಿಯೋಜನೆಗೊಂಡಿರುವ ಇಸ್ರೇಲ್ ರಾಯಭಾರಿ ರೋನ್ ಮಲ್ಕಾ ಅವರು ಈ ಭರವಸೆಯನ್ನು ನೀಡಿದ್ದಾರೆ. ಭಾರತಕ್ಕೆ ಎಷ್ಟರ ಮಟ್ಟಿಗೆ ಇಸ್ರೇಲ್ ಸಹಾಯ ಮಾಡಬಲ್ಲದು ಎಂಬ ಬಗ್ಗೆ ಕೇಳಲಾದ ಪ್ರಶ್ನೆಗೆ ಅವರು ಈ ಉತ್ತರವನ್ನು ನೀಡಿದೆ.

ಕಳೆದ ಗುರುವಾರ, ಪಾಕಿಸ್ಥಾನ ಮೂಲದ ಜೈಶೇ ಮೊಹಮ್ಮದ್ ಉಗ್ರ ಸಂಘಟನೆ ಆತ್ಮಾಹುತಿ ದಾಳಿಯನ್ನು ನಡೆಸಿ 40 ಸಿಆರ್‌ಪಿಎಫ್ ಯೋಧರನ್ನು ಹತ್ಯೆ ಮಾಡಿದೆ. ಆ ಬಳಿಕ ಇಸ್ರೇಲ್ ಮಾದರಿಯನ್ನು ಬಳಸಿಕೊಂಡು ಭಯೋತ್ಪಾದನೆಯನ್ನು ಎದುರಿಸುವಂತೆ ಸರ್ಕಾರದ ಮೇಲೆ ತೀವ್ರ ಒತ್ತಡ ಬೀಳುತ್ತಿದೆ. ಇಸ್ರೇಲ್ ಮಿಲಿಟರಿ ನಿಖರ ಮತ್ತು ತ್ವರಿತವಾದ ದಾಳಿಗಳಿಗೆ ಹೆಸರುವಾಸಿಯಾಗಿದೆ.

‘ಸ್ವರಕ್ಷಣೆಗಾಗಿ ಭಾರತಕ್ಕೆ ಬೇಕಾದ ಅಗತ್ಯಗಳಿಗೆ ಮಿತಿಯಿಲ್ಲ. ನಮ್ಮ ಆಪ್ತ ಸ್ನೇಹಿತ ಭಾರತಕ್ಕೆ ಸಹಾಯ ಮಾಡಲು, ಅದರಲ್ಲೂ ಮುಖ್ಯವಾಗಿ ಭಯೋತ್ಪಾದನೆಯ ವಿರುದ್ಧ ಹೋರಾಡುವಲ್ಲಿ ಸಹಾಯ ಮಾಡಲು ಸಿದ್ಧರಿದ್ದೇವೆ. ಕೇವಲ ಭಾರತ ಮತ್ತು ಇಸ್ರೇಲ್‌ಗೆ ಮಾತ್ರವಲ್ಲ ಭಯೋತ್ಪಾದನೆ ಜಗತ್ತಿಗೆ ಒಂದು ದೊಡ್ಡ ಸಮಸ್ಯೆಯಾಗಿದೆ’ ಎಂದು ಮಲ್ಕಾ ಹೇಳಿದ್ದಾರೆ.

‘ನಮ್ಮ ಜ್ಞಾನವನ್ನು ಹಂಚಿಕೊಳ್ಳಿ, ನಮ್ಮ ತಂತ್ರಜ್ಞಾನವನ್ನು ಹಂಚಿಕೊಳ್ಳಿ ಯಾಕೆಂದರೆ ನಾವು ನಮ್ಮ ಅತೀ ಪ್ರಮುಖ ಸ್ನೇಹಿತನಿಗೆ ನಿಜವಾಗಿಯೂ ಸಹಾಯ ಮಾಡಲು ಬಯಸುತ್ತಿದ್ದೇವೆ’ ಎಂದಿದ್ದಾರೆ.

52 ವರ್ಷದ ಮಲ್ಕಾ ಅವರೂ ಇಸ್ರೇಲ್ ಸೇನೆಯಲ್ಲಿದ್ದವರು, ಬಳಿಕ ಅಲ್ಲಿಂದ ಪೂರ್ಣ ಪ್ರಮಾಣದ ಕೊಲೊನಿಯಲ್ ಆಗಿ ನಿವೃತ್ತರಾದರು. ‘ಭಾರತ ನಮಗೆ ಅತ್ಯಂತ ಮುಖ್ಯ ಪಾಲುದಾರ, ಅತೀ ಮುಖ್ಯ ಸ್ನೇಹಿತ ಮತ್ತು ಭಾರತದೊಂದಿಗೆ ಮೈತ್ರಿ ಮತ್ತು ಬಾಂಧವ್ಯವವನ್ನು ಇನ್ನಷ್ಟು ವೃದ್ಧಿಸಬೇಕಿದೆ. ನಮ್ಮ ತಂತ್ರಜ್ಞಾನಗಳನ್ನು ಅವರೊಂದಿಗೆ ಹಂಚಿಕೊಳ್ಳಬೇಕಿದೆ’ ಎಂದು ಇಸ್ರೇಲ್ ಪ್ರಧಾನಿ ಬೆಂಜಮಿನ್ ನೆತನ್ಯಾಹು ತಮಗೆ ಹೇಳಿರುವುದಾಗಿ ಮಲ್ಕಾ ಹೇಳಿದ್ದಾರೆ.