ಪೂಜಾರಿಯವರು ಜನರಿಗೆ ಸತ್ಯ ವಿಚಾರ ತಿಳಿಸಲಿ – ಬಿಜೆಪಿ

ಮಂಗಳೂರು : 69 ವರ್ಷ ಕಾಲ ದೇಶವನ್ನು ಕಾಂಗ್ರೆಸ್ ಆಳುತ್ತಿದ್ದಾಗ ನೆರೆಕರೆಯ ದೇಶಗಳಲ್ಲಿ ಗಡಿ ತಂಟೆ ಉಂಟಾದಾಗ ಭಾರತ ವಿಶ್ವ ಸಂಸ್ಥೆಗೆ ದೂರು ಕೊಡುತ್ತಿತ್ತು. ಮೋದಿಯವರು ದೇಶದ ಪ್ರಧಾನಿಯಾದ ನಂತರ ಗಡಿ ತಂಟೆಗಳು ಉಂಟಾದಾಗ ಅದನ್ನು ಸಮರ್ಪಕವಾಗಿ ಎದುರಿಸಿದ ಪರಿಣಾಮ ನೆರೆಕರೆಯ ದೇಶಗಳು ವಿಶ್ವಸಂಸ್ಥೆಗೆ ಮೊರೆ ಹೋಗುತ್ತಿವೆ.

ಕರ್ನಾಟಕದಲ್ಲಿ ಆಹಾರ ಪಡಿತರ ವ್ಯವಸ್ಥೆಗೋಸ್ಕರ ಕೇಂದ್ರ ಸರಕಾರ ರಾಜ್ಯಕ್ಕೆ ವರ್ಷವೊಂದರ 2.24 ಲಕ್ಷ ಟನ್ ಅಕ್ಕಿ ಮತ್ತು 1.6 ಲಕ್ಷ ಟನ್ ಗೋಧಿ ಒದಗಿಸುತ್ತದೆ. ಇವೆಲ್ಲವನ್ನೂ ಕೇಂದ್ರ ಸರಕಾರ ಮುಕ್ತ ಮಾರುಕಟ್ಟೆಯಲ್ಲಿ ಅಕ್ಕಿಗೆ ಕೆ.ಜಿ. ಒಂದರಂತೆ ರೂ.28 ರಂತೆ ಖರೀದಿಸಿ, ರೂ. 3 ರಂತೆ ಮತ್ತು ಗೋಧಿ ಕೆ.ಜಿ. ಒಂದಕ್ಕೆ ರೂ. 24ಕ್ಕೆ ಖರೀದಿಸಿ, ಕೆ.ಜಿ.ಒಂದರ 2 ರೂ.ಗಳಂತೆ ಕರ್ನಾಟಕಕ್ಕೆ ಒದಗಿಸುತ್ತದೆ. ಅಂದರೆ ಕೇಂದ್ರ ಸರಕಾರ ಅಕ್ಕಿಯಲ್ಲಿ ಕೆ.ಜಿ.ಒಂದರ 25 ರೂ.ನಂತೆ ಗೋಧಿ ಕೆ.ಜಿ. ಒಂದರ 22 ರೂ.ಗಳಂತೆ ಸಹಾಯಧನ ಒದಗಿಸುತ್ತದೆ.

ಇದನ್ನು ರಾಜ್ಯ ಸರಕಾರ ಪಡಿತರ ಚೀಟಿಯ ಆಧಾರದಲ್ಲಿ ಬಿಪಿಎಲ್ ಕಾರ್ಡುದಾರರಿಗೆ ಧರ್ಮಾರ್ಥ ಒದಗಿಸಿ, ಎಪಿಎಲ್ ಕಾರ್ಡುದಾರರಿಗೆ ಹೆಚ್ಚಿನ ದರವನ್ನು ವಸೂಲು ಮಾಡುತ್ತಿದೆ. ಶ್ರೀಸಾಮಾನ್ಯನಿಗೆ ರಾಜ್ಯ ಸರಕಾರಕ್ಕಿಂತ ಕೇಂದ್ರಸರಕಾರ ಹೆಚ್ಚಿನ ಸಬ್ಸಿಡಿ ಹಣವನ್ನು ಒದಗಿಸುತ್ತಿದೆ. ಈ ವಿಷಯದಲ್ಲಿ ರಾಜ್ಯ ಸರಕಾರ ಕೇವಲ ಪೋಸ್ಟ್‌ಮ್ಯಾನ್ ಕೆಲಸ ಮಾತ್ರ ಮಾಡುತ್ತಿರುವುದು ಪೂಜಾರಿಯವರಿಗೆ ತಿಳಿದ ವಿಷಯವಾಗಿದೆ.

ಇಡೀ ಜಗತ್ತು ಅಚ್ಚರಿ ಪಡುವ ರೀತಿಯಲ್ಲಿ ಮೋದಿ ಸರಕಾರ ಯಶಸ್ವಿಯಾಗಿ ಆಡಳಿತ ನಿರ್ವಹಿಸುತ್ತಿರುವಾಗ ಕೇಂದ್ರದ ಮಾಜಿ ಸಚಿವ ಜನಾರ್ಧನ ಪೂಜಾರಿಯವರು ಅನಗತ್ಯ ಟೀಕೆ ಮಾಡುತ್ತಿರುವುದು ಅವರಿಗೆ ಶೋಭೆ ತರುವ ವಿಷಯವಲ್ಲ ಎಂದು ಜಿಲ್ಲಾ ವಕ್ತಾರ ಮಾಜಿ ಶಾಸಕ ಕೆ.ಜಯರಾಮ್ ಶೆಟ್ಟಿ ಪತ್ರಿಕಾ ಹೇಳಿಕೆಯೊಂದರಲ್ಲಿ ತಿಳಿಸಿರುವರು.