ರೂ.1600 ಕೋಟಿ ಮೌಲ್ಯದ ಕಂಪನಿ ಮಾಲೀಕನಾದ ಕಾರ್ಮಿಕ

ಕಷ್ಟಗಳು ಮನುಷ್ಯನನ್ನು ಇನ್ನಷ್ಟು ಬಲಿಷ್ಟಗೊಳಿಸುತ್ತದೆ ಎಂಬ ಮಾತಿದೆ. ಧೈರ್ಯ ಮತ್ತು ಪರಿಶ್ರಮ ಇದ್ದರೆ ಎಂತಹ ಸವಾಲುಗಳನ್ನೂ ಎದುರಿಸಬಹುದು ಎಂಬುದಕ್ಕೆ ಪ್ರತ್ಯಕ್ಷ ಸಾಕ್ಷಿಯಾಗಿದ್ದಾರೆ ಸುದೀಪ್ ದತ್ತಾ. ಇಂದಿನ ಪ್ರಸಿದ್ಧ ಉದ್ಯಮಿಯಾಗಿರುವ ಇವರು ಒಂದು ಕಾಲದಲ್ಲಿ ಹೊಟ್ಟೆ ತುಂಬುವಷ್ಟು ಉಣ್ಣಲು ಹಣವಿಲ್ಲದಿದ್ದ ಕಾರ್ಮಿಕ.

ತಂದೆ ಮತ್ತು ಸಹೋದರನ ಸಾವಿನ ಆಘಾತ, ಕುಟುಂಬದ ಜವಾಬ್ದಾರಿ ಹೊರಬೇಕಾಗಿದ್ದ ಅನಿವಾರ್ಯತೆಯಲ್ಲಿದ್ದ ಸಂದರ್ಭ ಸ್ನೇಹಿತರ ಮಾತು ಕೇಳಿ ಪಶ್ಚಿಮಬಂಗಾಳದಿಂದ ಮುಂಬಯಿಗೆ 16ನೇ ವಯಸ್ಸಿನಲ್ಲಿ ಬಂದ ಇವರು ರೈಲ್ವೇ ಸ್ಟೇಶನ್‌ನಲ್ಲಿ ಖಾಲಿ ಹೊಟ್ಟೆಯಲ್ಲಿ ಕೆಲ ದಿನಗಳನ್ನು ದೂಡಿದ ಬಳಿಕ ಅಲ್ಯೂಮೀನಿಯಂ ಪ್ಯಾಕೇಜ್ ಇಂಡಸ್ಟ್ರೀ ಒಂದರಲ್ಲಿ ದಿನಕ್ಕೆ 15 ರೂಪಾಯಿ ಸಂಬಳಕ್ಕೆ ಕೆಲಸಕ್ಕೆ ಸೇರಿದ್ದರು. ಹಣವನ್ನು ಉಳಿತಾಯ ಮಾಡಿ ತಾಯಿಗೆ ಕಳುಹಿಸಬೇಕು ಎಂಬ ಕಾರಣಕ್ಕೆ 43 ಕಿಲೋಮೀಟರ್ ನಡೆದೇ ಕೆಲಸಕ್ಕೆ ಹೋಗುತ್ತಿದ್ದರು. ಉಸಿರಾಡಲು ಕಷ್ಟ ಎಂಬಂತಿದ್ದ ಕೋಣೆಯಲ್ಲಿ ದಿನದೂಡುತ್ತಿದ್ದರು.

ಆದರೆ ಒಂದು ದಿನ ಇವರ ಕಂಪನಿಯೇ ಮುಚ್ಚಿ ಹೋಯಿತು. ಕಾರ್ಮಿಕರ ಕೆಲಸವೂ ಹೋಯಿತು. ಆದರೆ ಈ ಕಂಪನಿ ಬಂದ್ ಆಗಿದ್ದೇ ಸುದೀಪ್ತಾ ಅವರಿಗೆ ವರದಾನವಾಯಿತು. ಕೂಡಿಟ್ಟ ಅಷ್ಟೋ ಇಷ್ಟೋ ಹಣ ಸೇರಿಸಿ, ತುಸು ಹಣವನ್ನು ಸ್ನೆಹಿತರಿಂದ ಪಡೆದು ತಮ್ಮದೇ ಮಾಲೀಕನಿಂದ ಈ ಕೈಗಾರಿಕೆಯ ಯುನಿಟ್‌ನ್ನು 16 ಸಾವಿರ ರೂಪಾಯಿಗೆ ಖರೀದಿ ಮಾಡಿದರು.

ಪರಿಶ್ರಮದ ಫಲವಾಗಿ ಕಂಪನಿ ಲಾಭದತ್ತ ಹೊರಳಿತು. ಹಲವಾರು ಮಂದಿಗೆ ಉದ್ಯೋಗವನ್ನೂ ನೀಡಿದರು. ಉತ್ತಮ ಸಂವಹನ ಕಲೆ ಹೊಂದಿದ್ದ ಇವರ ಶ್ರಮದಿಂದಾಗಿ ನೆಸ್ಲೆ, ಸನ್ ಫಾರ್ಮಾ, ಸಿಪ್ಲಾ ಮುಂತಾದ ಪ್ರಸಿದ್ಧ ಕಂಪನಿಗಳು ಇವರಿಗೆ ಸಣ್ಣ ಪುಟ್ಟ ಆರ್ಡರ್ ನೀಡಲು ಆರಂಭಿಸಿತು. ದೊಡ್ಡ ದೊಡ್ಡ ಕಂಪನಿಗಳು ಇವರ ವಿರುದ್ಧ ಕುತಂತ್ರ ಮಾಡಲಾರಂಭಿಸಿದರೂ ಇವರ ಪರಿಶ್ರಮದ ಮುಂದೆ ಅವುಗಳು ಮಂಡಿಯೂರಲೇ ಬೇಕಾಯಿತು.

ಇಂದು ಅವರ ಕಂಪನಿಯ ಮೌಲ್ಯ 1600.79 ಕೋಟಿ. ಇಂದು ಅವರ ಬಳಿ ಐಷಾರಾಮಿ ಜೀವನ ನಡೆಸಲು ಬೇಕಾದ ಎಲ್ಲಾ ಸೌಕರ್ಯವೂ ಇದೆ. ಆದರೆ ತಾವು ಬೆಳೆದು ಬಂದ ದಾರಿಯನ್ನು ಅವರು ಮರೆತಿಲ್ಲ. ಗಳಿಸಿದ್ದನ್ನು ಸಮಾಜಕ್ಕೆ ನೀಡುತ್ತಿದ್ದಾರೆ. ತಮ್ಮದೇ ಆದ ಫೌಂಡೇಶನ್ ಆರಂಭಿಸಿ ಸಮಾಜ ಸೇವೆ ಮಾಡುತ್ತಿದ್ದಾರೆ.