ಸಾಮಾಜಿಕ ಬದ್ಧತೆಯ ಅದ್ಭುತ ಮರಳು ಶಿಲ್ಪಿ ಸುದರ್ಶನ್ ಪಟ್ನಾಯಕ್

ಸುದರ್ಶನ್ ಪಟ್ನಾಯಕ್ ಒರಿಸ್ಸಾ ಮೂಲದ ಖ್ಯಾತ ಮರಳು ಶಿಲ್ಪಿ. ಇದೀಗ ಅವರು ದೇಶ ಮಾತ್ರವಲ್ಲ ವಿದೇಶದಲ್ಲೂ ತಮ್ಮ ಕಲಾ ಪ್ರತಿಭೆಯನ್ನು ಪ್ರದರ್ಶಿಸಿ ಮನ್ನಣೆಗಳಿಸುತ್ತಿದ್ದಾರೆ. ಇತ್ತೀಚಿಗೆ ನಡೆದ ಮಾಸ್ಕೋ ಸ್ಯಾಂಡ್ ಆರ್ಟ್ ಚಾಂಪಿಯನ್‌ಶಿಪ್‌ನಲ್ಲಿ ಬಂಗಾರದ ಪದಕವನ್ನೂ ಇವರು ಗೆದ್ದುಕೊಂಡಿದ್ದಾರೆ.

ಪ್ರತಿ ವಿಶೇಷ ದಿನಗಳಲ್ಲೂ ಅದಕ್ಕೆ ಅನುಗುಣವಾದ ಮರಳು ಶಿಲ್ಪವನ್ನು ರಚಿಸುವ, ತನ್ನ ಶಿಲ್ಪಗಳ ಮೂಲಕ ಸಮಾಜಿಕ ಜಾಗೃತಿ, ಅರಿವುಗಳನ್ನು ಮೂಡಿಸುವ ಇವರು ಒರ್ವ ಸ್ವ-ಕಲಿಕಾ ಕಲಾವಿದ. ಯಾರ ಬಳಿಯೂ ತರಬೇತಿ ಪಡೆಯದೇ ಸ್ವತಃ ತಾನೇ ಕಲಿತು ಇವರು ಇಂದು ದೇಶದ ಅತಿ ಪ್ರಮುಖ ಮರಳು ಶಿಲ್ಪಿ ಎನಿಸಿಕೊಂಡಿದ್ದಾರೆ.

ಬಾಲ್ಯದಲ್ಲಿ ತನ್ನ ಮನೆಯಲ್ಲಿನ ಬಡತನವೇ ಅವರನ್ನು ಒರ್ವ ಮರಳು ಕಲಾವಿದನನ್ನಾಗಿಸಿತು. ಬೇರೆ ಕಲೆಗಳಿಗೆ ಪರಿಕರಗಳ ಅಗತ್ಯವಿದೆ, ಅದನ್ನು ಖರೀದಿಸಲು ಅವರ ಬಳಿ ಹಣವಿರಲಿಲ್ಲ, ಹಾಗಾಗಿಯೇ ಅವರು ಮರಳುಗಳ ಮೇಲೆ ತಮ್ಮ ಕಲಾ ಪ್ರೇಮವನ್ನು ವ್ಯಕ್ತಪಡಿಸಲು ಆರಂಭಿಸಿದರು. ಅದೇ ಇಂದು ಅವರನ್ನೊಬ್ಬ ಶ್ರೇಷ್ಠ ಕಲಾವಿದರ ಸಾಲಿನಲ್ಲಿ ನಿಲ್ಲಿಸಿದೆ.

ಬಂಗಾಳ ಕೊಲ್ಲಿ ಸಮೀಪದ ಒರಿಸ್ಸಾ ನಾಡಲ್ಲಿ ಜಗನ್ನಾಥನ ಸನ್ನಿಧಿ ಪುರಿಯಲ್ಲಿ ಹುಟ್ಟಲು ನಿಜಕ್ಕೂ ಪಟ್ನಾಯಕ್ ಪುಣ್ಯ ಮಾಡಿದ್ದರು. ಮರಳುಗಳ ರಾಶಿಯಲ್ಲೇ ಅವರು ಬೆಳೆದರು. ಅಲ್ಲಿನ ಮರಳುಗಳೂ ಶಿಲ್ಪ ರಚನೆಗೆ ಪೂರಕವಾಗಿರುವುದು ಅವರಿಗೆ ಮತ್ತಷ್ಟು ಉತ್ತೇಜನ ನೀಡಿತು. ಒರಿಸ್ಸಾದ ಸಂಸ್ಕೃತಿ, ಪರಂಪರೆಗಳೂ ಅವರ ಕಲೆಗೆ ಸ್ಫೂರ್ತಿ ತುಂಬಿದವು.
ಅಂತಾರಾಷ್ಟ್ರೀಯ ಮನ್ನಣೆ ಪಡೆದಿದ್ದರೂ ಭಾರತದಲ್ಲಿ ಮರಳು ಶಿಲ್ಪಗಳನ್ನು ತೋರಿಸುವುದಕ್ಕೆ ಇನ್ನೂ ಸಾಕಷ್ಟು ಜಾಗವಿದೆ ಎಂದು ಹೇಳುವ ಪಟ್ನಾಯಕ್, ಮರುಳು ಶಿಲ್ಪವನ್ನು ಪ್ರಚುರಪಡಿಸಬೇಕಾಗಿದೆ, ಈ ಶಿಲ್ಪಗಳು ಭಾರತಕ್ಕೆ ಹೆಮ್ಮೆ ತಂದು ಕೊಡಬಲ್ಲವು ಎನ್ನುತ್ತಾರೆ.

ಕಾರ್ಮಿಕರ ದಿನಾಚರಣೆ, ದೆಹಲಿ ಗ್ಯಾಂಗ್ ರೇಪ್, ಸುನಾಮಿ, ನೇಪಾಳ ಭೂಕಂಪ ಹೀಗೆ ಹಲವಾರು ವಿಷಯಗಳ ಬಗ್ಗೆ ಮರಳು ಶಿಲ್ಪದ ಮೂಲಕ ಜಾಗೃತಿ ಮೂಡಿಸುವುದು ಮಾತ್ರವಲ್ಲದೇ, ಅಬ್ದುಲ್ ಕಲಾಂ, ಗಾಂಧೀಜಿ ಸೇರಿದಂತೆ ಹಲವಾರು ಗಣ್ಯರ ಚಿತ್ರವನ್ನೂ ಮರಳಲ್ಲಿ ಮೂಡಿಸುವ ಇವರು ಒಬ್ಬ ಸಾಮಾಜಿಕ ಬದ್ಧತೆ ಇರುವ ಅದ್ಭುತ ಕಲಾವಿದ.