ಹುಬ್ಬಳ್ಳಿ: ಕೇಂದ್ರ ಸರ್ಕಾರದ ಮಹಾತ್ವಾಕಾಂಕ್ಷಿ ಯೋಜನೆ ಸ್ಟಾರ್ಟ್ ಅಪ್ ಅಡಿ ನೊಂದಾವಣಿಗೊಂಡ ಕರ್ನಾಟಕದ ಮೊದಲ ಉದ್ಯಮವೇ ನ್ಯೂಲೈಟ್ ಬ್ರಿಕ್ಸ್ ಉದ್ಯಮ.
ಹಾವೇರಿ ಜಿಲ್ಲೆ ರಾಣೆಬೆನ್ನೂರು ತಾಲ್ಲೂಕಿನ ದೇವರಗುಡ್ಡದ ಬಳಿ ಈ ಉದ್ಯಮಕ್ಕೆ ನಾಂದಿ ಹಾಡಲಾಗಿದೆ. ಮಂಜುನಾಥ ಬೊಮ್ಮಣ್ಣವರ, ನವೀನ ಹನಗೋಡಿಮಠ ಹಾಗೂ ನಿರಂಜನ ಪೂಜಾರ ಇದರ ರೂವಾರಿಗಳು.
ಪರಿಸರ ಸ್ನೇಹಿ
ಸಾಮಾನ್ಯವಾಗಿ ಮನೆ ಕಟ್ಟಲು ಕೆಂಪು ಇಟ್ಟಿಗೆ, ಕಲ್ಲು ಹಾಗೂ ಉಸುಕುಗಳನ್ನು ಬಳಸುತ್ತಾರೆ. ಆದರೆ ಕೆಂಪು ಇಟ್ಟಿಗೆಯನ್ನು ತಯಾರಿಸುವ ವಿಧಾನ ಗಮನಿಸಿದಾಗ ಅದು ಖಂಡಿತ ಪರಿಸರಕ್ಕೆ ಹಾನಿಕರ ಎಂಬುದು ನಿರಂಜನ ಪೂಜಾರ ಅವರ ಅಭಿಮತ.
ಲೈಟ್ ಬ್ರಿಕ್ಸ್ ತಯಾರಿಕೆಗೆ ಜಲ್ಲಿಕಲ್ಲು ಅಥವಾ ಮರಳಿನ ಅಗತ್ಯವೇ ಇಲ್ಲ. ಉಷ್ಣ ವಿದ್ಯುತ್ ಸ್ಥಾವರದ ಫ್ಲೈಆಶ್ ಹಾಗೂ ಸಿಮೆಂಟ್ ಇದ್ದರೆ ಸಾಕು. ಮರಳು ಹಾಗೂ ಜಲ್ಲಿಕಲ್ಲಿನ ಅಂಶ ಇಲ್ಲದ್ದರಿಂದ ಈ ಇಟ್ಟಿಗೆಗಳು ಭಾರವೂ ಇರುವುದಿಲ್ಲ. ಇದರ ತಯಾರಿಕಾ ವಿಧಾನವೂ ಸರಳ. ಶ್ರಮ ಹಾಗೂ ಖರ್ಚೂ ಕಡಿಮೆಯಂತೆ. ಕೆಂಪು ಇಟ್ಟಿಗೆಗೆ ಹೋಲಿಸಿದರೆ, ಹೊಸ ಬಗೆಯ ಇಟ್ಟಿಗೆಗಳ ಬಾಳಿಕೆ ಹೆಚ್ಚು ಎನ್ನುತ್ತಾರೆ ಪೂಜಾರ ಅವರು.
ಕಾಲಕ್ಕನುಗುಣವಾಗಿ ಈ ಮನೆಯು ಒಂದು ರೀತಿ ಹವಾನಿಯಂತ್ರಿತವಂತೆ. ಮನೆ ಕಟ್ಟಲು ಈ ಇಟ್ಟಿಗೆಯನ್ನು ಬಳಸುವುದರಿಂದ ಶೇ.30 ರಷ್ಟು ಖರ್ಚನ್ನು ಉಳಿತಾಯ ಮಾಡಬಹುದು. ಅಲ್ಲದೇ ಶ್ರಮವೂ ಕಡಿಮೆಯಂತೆ.
ಮುಂದುವರಿದ ದೇಶಗಳಲ್ಲಿ ಈ ಇಟ್ಟಿಗೆಯ ಬಳಕೆ ಸಾಕಷ್ಟಿದೆ. ನಮ್ಮಲ್ಲಿ ಈ ಕುರಿತು ಜಾಗೃತಿ ಅಗತ್ಯವಿದೆ. ಮೆಟ್ರೊ ಸಿಟಿಗಳ ಇಂಜಿನಿಯರ್‍ಸ್‌ಗೆ ಇದರ ಬಳಕೆ ಬಗ್ಗೆ ಗೊತ್ತು. ಆದರೆ ಗ್ರಾಮೀಣ ಪ್ರದೇಶದಲ್ಲಿ ಇದರ ಮಹತ್ವದ ಅರಿವಿಲ್ಲ. ಇಟ್ಟಿಗೆಯೂ ಹಗುರವಾಗಿರುವುದರಿಂದ ಜನರ ವಿಶ್ವಾಸ ಗಳಿಸುವುದೂ ತುಸು ಸವಾಲಿನ ಕೆಲಸವೇ ಆಗಿದೆ ಎನ್ನುತ್ತಾರೆ ನಿರಂಜನ ಪೂಜಾರ.
ಅನೇಕ ಜನರು ನಮ್ಮ ಉದ್ಯಮವನ್ನು ನೋಡಿಕೊಂಡು ಹೋಗುತ್ತಿದ್ದಾರೆ. ಬೇಡಿಕೆ ತಕ್ಕಮಟ್ಟಿಗೆ ಇದೆ. ಆದರೆ ಇನ್ನು ಕೆಲವೇ ವರ್ಷಗಳಲ್ಲಿ ನಮ್ಮಲ್ಲಿಯೂ ಈ ಕುರಿತು ಜಾಗೃತಿ ಮೂಡುವಲ್ಲಿ ಎರಡು ಮಾತಿಲ್ಲ. ದೂರದೃಷ್ಟಿಯಿಂದಲೇ ಈ ಉದ್ಯಮ ಆರಂಭಿಸಲು ಮನಸ್ಸು ಮಾಡಿದೆವು. ಸರ್ಕಾರದ ಕೆಲವು ಯೋಜನೆಗಳೊಂದಿಗೆ, ಇಂಜಿನಿಯರ್‍ಸ್ ಅಸೋಸಿಯೇಷನ್ ಸಹಕಾರದ ನಿರೀಕ್ಷೆಯಲ್ಲಿದ್ದೇವೆ. ಸಿವಿಲ್ ಇಂಜಿನಿಯರಿಂಗ್ ವಿದ್ಯಾರ್ಥಿಗಳೂ ಕೂಡಾ ಈ ಕುರಿತು ಅಧ್ಯಯನ ಪ್ರಯುಕ್ತ ಭೇಟಿಯಾಗಲೂ ಇಲ್ಲಿ ಅವಕಾಶವಿದೆ ಎನ್ನುತ್ತಾರೆ ಅವರು.
ಕೆಂಪು ಇಟ್ಟಿಗೆಯಂತೆ ಸುಡುವ ವಿಧಾನವಿಲ್ಲ. ಯಾವುದೇ ನದಿ, ಹಳ್ಳ, ಕೊಳ್ಳಗಳ ಬದಿಯ ಮರಳನ್ನು ತರುವ ಅಗತ್ಯವೂ ಇಲ್ಲ ಎನ್ನುವ ಅವರು, ಇದೊಂದು ಪಕ್ಕಾ ಪರಿಸರ ಸ್ನೇಹಿ ಬ್ರಿಕ್ಸ್ ಉದ್ಯಮ ಎಂದು ಅಭಿಪ್ರಾಯಪಡುತ್ತಾರೆ.
ಹೆಚ್ಚಿನ ಮಾಹಿತಿಗೆ ನಿರಂಜನ ಕುಮಾರ್ ಅವರನ್ನು 9164582650 ಸಂಪರ್ಕಿಸಬಹುದು.
News13
ಸಮಾಜದ ಉತ್ತಮ ಸುದ್ದಿಗಳನ್ನು ನಾವು ನಿಮ್ಮ ಮುಂದಿಡುವ ಪ್ರಯತ್ನವನ್ನು ಮಾಡುತ್ತಿದ್ದೇವೆ. ಪ್ರೋತ್ಸಾಹಿಸಿ, ಸ್ವೀಕರಿಸಿ. ನೀವು ಸ್ವೀಕರಿಸಿದಾಗ ನಾವು ಬೆಳೆಯಬಹುದು. ಒಳ್ಳೆಯ ಸುದ್ದಿಗಳಿಗೆ ಸಮಾಜ ತೆರೆದುಕೊಂಡಿದೆ ತಲುಪಿಸುವವರು ನಾವಾಗಬಾರದೇಕೆ?
ನ್ಯೂಸ್ 13 ಸಮಾಜದ ಧನಾತ್ಮಕ ಸುದ್ದಿಗಳನ್ನು ಹಾಗೂ ರಾಷ್ಟ್ರೀಯ ವಿಚಾರಗಳನ್ನು ನಿಮಗೆ ತಲುಪಿಸುವ ಪ್ರಯತ್ನ ಮಾಡುತ್ತದೆ. ಈ ರೀತಿ ಇನ್ನಷ್ಟು ಉತ್ತಮ ಸುದ್ದಿಗಳನ್ನು ತಲುಪಿಸಲು ನಿಮ್ಮ ಸಹಕಾರವನ್ನು ಅಪೇಕ್ಷಿಸುತ್ತಿದ್ದೇವೆ. ಈ ಕಾರ್ಯದಲ್ಲಿ ನೀವೂ ನಮ್ಮೊಂದಿಗೆ ಜೊತೆಯಾಗಿ.
News13 strives to publish and promote positive news/happenings and nationalistic thoughts. Join hands with us in this constructive cause. We hope and expect your co-operation in this objective of broadcasting news that shall keep up with quality journalism.
