ಪ್ರಯಾಣಿಕ ವಿಮಾನ ಹಾರಿಸಲು ಸಜ್ಜಾಗಿದ್ದಾಳೆ ಅತಿ ಕಿರಿಯ ಪೈಲೆಟ್

ಮುಂಬಯಿ: ತನ್ನ 16ನೇ ವಯಸ್ಸಿಗೆ ಸ್ಟುಡೆಂಟ್ ಪೈಲೆಟ್ ಲೈಸೆನ್ಸ್ ಪಡೆದುಕೊಂಡಿದ್ದ ಅಯೇಷಾ ಅಜೀಝ್ ಇದೀಗ ಪ್ರಯಾಣಿಕ ವಿಮಾನವನ್ನು ಹಾರಿಸಲು ಸಜ್ಜಾಗಿದ್ದಾಳೆ.

2011ರಲ್ಲಿ ಈಕೆ ಸ್ಟುಡೆಂಟ್ ಪೈಲೆಟ್ ಲೈಸೆನ್ಸ್ ಪಡೆದುಕೊಂಡಿದ್ದು, ಇದೀಗ ಆಕೆಗೆ 21 ವರ್ಷ ತುಂಬಿದೆ. ಹೀಗಾಗಿ ಪ್ರಯಾಣಿಕ ವಿಮಾನ ಹಾರಾಟದ ಲೈಸೆನ್ಸ್ ಪಡೆದುಕೊಂಡಿದ್ದಾಳೆ.

ವರ್ಲಿ ಬ್ಯುಸಿನೆಸ್‌ಮ್ಯಾನ್ ಅಬ್ದುಲ್ ಅಜೀಝ್ ಅವರ ಪುತ್ರಿ ಆಗಿರುವ ಆಯೇಷಾ ಬಾಲ್ಯದಲ್ಲೇ ಹಾರುವ ಕನಸು ಕಂಡಿದ್ದವಳು. ತಾಯಿಯೊಂದಿಗೆ ತಮ್ಮ ಮೂಲ ಊರು ಕಾಶ್ಮೀರಕ್ಕೆ ವಿಮಾನದಲ್ಲಿ ಪ್ರಯಾಣಿಸುವಾಗ ಪೈಲೆಟ್ ಆಗುವ ಆಕೆಯ ಕನಸು ಗರಿಗೆದರುತ್ತಿದ್ದವು. ಆಕೆಯ ಕನಸಿಗೆ ನೀರೆರೆದು ಪೋಷಿಸಿದ ತಂದೆ ವಿಮಾನಯಾನ ತರಬೇತಿಯನ್ನು ಕೊಡಿಸಿದರು.

ಬಾಂಬೆ ಫ್ಲೈಯಿಂಗ್ ಕ್ಲಬ್‌ನಲ್ಲಿ ಆವಿಯೇಷನ್ ತರಬೇತಿ ಪೂರ್ಣಗೊಳಿಸಿರುವ ಆಕೆ ಈಗಾಗಲೇ ಸಿಂಗಲ್ ಎಂಜಿನ್ ಏರ್‌ಕ್ರಾಫ್ಟ್‌ನ್ನು 200 ಗಂಟೆಗಳ ಕಾಲ ಹಾರಿಸಿದ್ದಾಳೆ.

ಮುಸ್ಲಿಂ ಯುವತಿ ಹಿಜಬ್ ಇಲ್ಲದೆ ವಿಮಾನ ಓಡಿಸುತ್ತಾಳೆ ಎಂಬುದು ಕೆಲವರ ಕೊಂಕು ಮಾತಿಗೆ ಕಾರಣವಾಗಿತ್ತು, ಆದರೆ ಬಹಳಷ್ಟು ಮಂದಿ ಈಕೆಗೆ ಬೆಂಬಲವಾಗಿ ನಿಂತಿದ್ದಾರೆ.

‘ಮಹಿಳೆಯರು ತಮ್ಮ ಕಂಫರ್ಟ್ ಝೋನ್‌ನಿಂದ ಹೊರಬಂದು, ಸವಾಲುಗಳನ್ನು ಎದುರಿಸಬೇಕು. ವೈದ್ಯೆ, ಶಿಕ್ಷಕಿ, ಗೃಹಿಣಿ ಮಾತ್ರವಲ್ಲದೇ ಸವಾಲುಗಳನ್ನು ಹೊಂದಿರುವ ಕಾರ್ಯಕ್ಷೇತ್ರಗಳನ್ನೂ ಆಯ್ಕೆ ಮಾಡಿಕೊಳ್ಳಬೇಕು’ ಎಂದು ಆಯೇಷಾ ಎಲ್ಲಾ ಮಹಿಳೆಯರಿಗೆ ಕಿವಿಮಾತು ಹೇಳುತ್ತಾಳೆ.