ವಾಲಿಬಾಲ್‌ನಲ್ಲಿ ಧಾರವಾಡ, ಬೆಂಗಳೂರು ತಂಡ ಚಾಂಪಿಯನ್

ಹುಬ್ಬಳ್ಳಿ: ನಗರದ ನೆಹರು ಮೈದಾನದಲ್ಲಿ ರಾಜ್ಯ ಒಲಿಂಪಿಕ್ ಕ್ರೀಡಾಕೂಟದ ಅಂಗವಾಗಿ ನಡೆದ ವಾಲಿಬಾಲ್ ಫೈನಲ್ ಪಂದ್ಯಾವಳಿಗಳಲ್ಲಿ ಧಾರವಾಡ ಮತ್ತು ಬೆಂಗಳೂರು ತಂಡಗಳು ಚಾಂಪಿಯನ್ ಆಗಿ ಹೊರ ಹೊಮ್ಮಿದವು.

ಮೊದಲು ನಡೆದ ಬಹು ನಿರೀಕ್ಷಿತ ಪಂದ್ಯದಲ್ಲಿ ಧಾರವಾಡ(ಬ್ಯಾಹಟ್ಟಿ) ತಂಡವು ಬಳ್ಳಾರಿ ತಂಡದ ಎದುರಾಳಿಗಳಾಗಿ ಅಂಕಣಕ್ಕೆ ಬಂದು ತನ್ನ ಆಟ ಆರಂಭಿಸಿತು. ತನ್ನ ಮೊದಲ ಸೆಟ್‌ನಲ್ಲಿ 25-20 ಅಂತರದಿಂದ 5 ಅಂಕಗಳೊಂದಿಗೆ ಪರಾಭವಗೊಂಡಿತು.

ಎರಡನೇ ಸೆಟ್‌ನಿಂದ ಚೇತರಿಸಿಕೊಂಡ ಬ್ಯಾಹಟ್ಟಿ ಬಾಲಕಿಯರು ಹಾಗೂ ಬಳ್ಳಾರಿ ತಂಡದ ಆಟಗಾರ್ತಿಯರು ನೆಟ್‌ನ ಬಳಿ ಮಾಡಿದ ತಪ್ಪಿನ ಲಾಭ ಪಡೆದು ಎರಡನೇ ಸೆಟ್‌ನ 25-22 ಅಂತರದಿಂದ 3 ಅಂಕಗಳಿಂದ ಗೆದ್ದು ಪಂದ್ಯದಲ್ಲಿ ಸಮಬಲ ಸಾಧಿಸಿತು.

ಮೂರನೇ ಸೆಟ್‌ನಲ್ಲಿ ಬಳ್ಳಾರಿ ಆಟಗಾರ್ತಿಯರಿಗೆ ತಮ್ಮ ನಿಜ ಸಾಮರ್ಥ್ಯ ಪ್ರದರ್ಶಿಸಿದ ಬ್ಯಾಹಟ್ಟಿ ಬಾಲಕಿಯರು 5 ಅಂಕಗಳ ಮುನ್ನಡೆ ಪಡೆದು 25-20 ಅಂತರದಿಂದ ಸೆಟ್‌ಅನ್ನು ತಮ್ಮ ಮಡಿಲಿಗೆ ಹಾಕಿಕೊಂಡರು. ನಾಲ್ಕನೇ ಸೆಟ್ನಲ್ಲಿ ಭಾರಿ ಅಂತರದ ವ್ಯತ್ಯಾಸದಿಂದ ಬಳ್ಳಾರಿಯನ್ನು ಹಿಂದಿಕ್ಕಿ ಕೊನೆಯಲ್ಲಿ 25-16 ಅಂತರದಿಂದ 9 ಅಂಕಗಳೊಂದಿಗೆ ಫೈನಲ್ ಪಂದ್ಯದಲ್ಲಿ ವಿಜಯಮಾಲೆ ಧರಿಸಿದರು.

ಮೊದಲನೇ ಪುರುಷರ ಪಂದ್ಯದಲ್ಲಿ ಬೆಂಗಳೂರು ಹಾಗೂ ಚಾಮರಾಜನಗರ ತಂಡಗಳು ಚಾಂಪಿಯನ್ ಪಟ್ಟಕ್ಕೆ ಹಣಾಹಣಿ ನಡೆಸಿ ಇದರಲ್ಲಿ 25-14 ಅಂತರದಿಂದ 11 ಅಂಕಗಳ ಬೃಹತ್ ಮುನ್ನಡೆಯೊಂದಿಗೆ ಬೆಂಗಳೂರು ಚಾಂಪಿಯನ್ ಆಯಿತು.

ಫೈನಲ್ ಪಂದ್ಯಕ್ಕೂ ಮುನ್ನ ನಡೆದ ಟೂರ್ನಿ ಮೂರನೇ ಅತ್ಯುತ್ತಮ ತಂಡಕ್ಕಾಗಿ ನಡೆದ ಪುರುಷರ ವಿಭಾಗದ ಪಂದ್ಯದಲ್ಲಿ ಬಳ್ಳಾರಿ ಹಾಗೂ ಶಿವಮೊಗ್ಗ ತಂಡಗಳು ಪರಸ್ಪರ ಎದುರಾದವು.

ನಂತರದ ಪಂದ್ಯದಲ್ಲಿ ಶಿವಮೊಗ್ಗ ತಂಡವು ಬಳ್ಳಾರಿ ತಂಡವನ್ನು 3-2 ಅಂತರದ ಸೆಟ್ನಿಂದ ಮಣಿಸಿ ಮೂರನೇ ಸ್ಥಾನವನ್ನು ಪಡೆಯಿತು. ಮಹಿಳೆಯರ ವಿಭಾಗದಲ್ಲಿ ಮೈಸೂರು ಮತ್ತು ಕೋಲಾರ ತಂಡಗಳು ಸ್ಪರ್ಧಿಸಿದವು. ಕೋಲಾರ ತಂಡವು ಮೈಸೂರು ತಂಡವನ್ನು 3-0 ಅಂತರದಿಂದ ಸೋಲಿಸುವ ಮೂಲಕ ಟೂರ್ನಿಯ 3 ತಂಡವಾಗಿ ಹೊರಹೊಮ್ಮಿತು.