ಕುಸ್ತಿ : ಗ್ರೀಕೊ ರೋಮನ್ ಸ್ಪರ್ಧೆಯಲ್ಲಿ ಧರೆಪ್ಪಗೆ ಚಿನ್ನ

ಧಾರವಾಡ: ಧರೆಪ್ಪ ಹೊಸಮನಿ ಅವರು 3ನೇ ರಾಜ್ಯ ಒಲಿಂಪಿಕ್ಸ್ ಕ್ರೀಡಾಕೂಟದ ಪುರುಷರ ಕುಸ್ತಿ ಸ್ಪರ್ಧೆಯ ಗ್ರೀಕೊ ರೋಮನ್ ವಿಭಾಗದಲ್ಲಿ ಚಿನ್ನದ ಪದಕ ತಂದುಕೊಟ್ಟು ಆತಿಥೇಯ ಪ್ರೇಕ್ಷಕರಿಗೆ ಹರ್ಷ ತಂದರು.

ಕಲಾ ಭವನದ ಅಂಕಣದಲ್ಲಿ ಕಿಕ್ಕಿರಿದು ನೆರೆದಿದ್ದ ಪ್ರೇಕ್ಷಕರ ಕರತಾಡನ ಚಪ್ಪಾಳೆ ಹಾಗೂ ಸಿಳ್ಳೆಗಳಿಂದ ಉತ್ಸಾಹ ಭರಿತರಾಗಿ ಅಮೋಘ ಪ್ರದರ್ಶನದಿಂದ ಧರೆಪ್ಪ ಹೊಸಮನಿ ಅಂತಿಮ ಪಂದ್ಯದಲ್ಲಿ ಧಾರವಾಡದವರೆ ಆದ ಶಿವನಂದ ಭಂಗಿ ಅವರನ್ನು ಮಣಿಸಿ ಚಿನ್ನ ಗೆದ್ದುಕೊಂಡರು. ಶಿವಾನಂದ ಭಂಗಿ ಉತ್ತಮವಾಗಿ ಹೊರಾಟ ಮಾಡಿ ರಜತ ಹಾಗೂ ಕಂಚಿನ ಪದಕವನ್ನು ಬಾಗಲಕೋಟೆಯ ಭೀಮಾ ಜಿರಗಾರ ಮತ್ತು ಜಮಖಂಡಿಯ ಸಂಜಯ ಹಂಚಿಕೊಂಡರು.

ದಾವಣಗೆರೆಯ ಕುಸ್ತಿ ಪಟುಗಳು 86 ಕೆ.ಜಿ. ಮತ್ತು 70 ಕೆ.ಜಿ. ವಿಭಾಗದಲ್ಲಿ ಚಿನ್ನದ ಪದಕ ಪಡೆದರು. 86 ಕೆ.ಜಿ. ವಿಭಾಗದಲ್ಲಿ ದಾವಣಗೆರೆಯ ಕಿರಣ ಅವರು ಬೆಳಗಾವಿಯ ಸುನಿಲ ಫಡತಾರೆ ಮೇಲೆ ಜಯಿಸಿ ಚಿನ್ನ ಗಳಿಸಿದರೆ ಕಂಚಿನ ಪದಕಕ್ಕೆ ಬೆಳಗಾವಿಯ ಶಿವಾಜಿ ರೇವಡೆಕರ ಮತ್ತು ಸಾಗರ ಉಳ್ಳಾಗಡ್ಡಿ ಕಂಚಿನ ಪದಕ ಸಂಪಾದಿಸಿದರು. 70 ಕೆ.ಜಿ. ಫ್ರೀಸ್ಟೈಲ್ ಕುಸ್ತಿ ವಿಭಾಗದಲ್ಲಿ ದಾವಣಗೆರೆಯ ಶ್ರೀನಿವಾಸ ಮೊದಲ ಸ್ಥಾನ ಪಡೆದರು. ಬಾಗಲಕೋಟೆಯ ಮಹಾಲಿಂಗರಾಯ ರಜತ ಪದಕ ಸಂಪಾದಿಸಿದರೆ ಹಾವೇರಿಯ ಅನಿಲ ದಳವಿ ಮತ್ತು ಧಾರವಾಡದ ಸದಾಶಿವ ನಲವಡೆ ಕಂಚಿಗೆ ತೃಪ್ತಿಪಟ್ಟರು.

ಉಳಿದ ವಿಭಾಗಗಳಲ್ಲಿ 59 ಕೆ.ಜಿ. ಗ್ರೀಕೋ ರೋಮನ್ ಸ್ಪರ್ಧೆಯಲ್ಲಿ ಮನಿಸ ಗೌಡ, ಪ್ರವೀಣ ಕೊಲಂಬಿ, ಎಸ್.ಎಸ್.ಜಂಬಗಿ ಶರೀಫ ಜಮಾದಾರ, ಸದಾಶಿವ ಗೊಂಡಿ, ಪ್ರಭಾಕರ ಪಾಲಕಿ, ಪ್ರಾಥಮಿಕ ಪಂದ್ಯಗಳಲ್ಲಿ ಜಯಿಸಿ ಮುನ್ನಡೆದಿದ್ದಾರೆ. ಅದೇ ರೀತಿ 80 ಕೆ.ಜಿ. ವಿಭಾಗದಲ್ಲಿ ಧಾರವಾಡದ ಲಕ್ಷ್ಮಣ ತಳವಾರ ಮತ್ತು ದಾವಣಗೆರೆಯ ಹನುಮಂತ ಚನ್ನಾಳ ಕೂಡಾ ಮುಂದಿನ ಸುತ್ತಿಗೆ ಆಯ್ಕೆಯಾಗಿದ್ದಾರೆ.