ಪುಣ್ಚಪ್ಪಾಡಿ :ಶಾಲಾ ಪ್ರಾರಂಭೋತ್ಸವ ಅಕ್ಷರ ರಥದಲ್ಲಿ ಶಾಲೆಗೆ ಮಕ್ಕಳ ಆಗಮನ

ಸವಣೂರು : ಮಕ್ಕಳನ್ನು ಶಾಲೆಗೆ ಕಳುಹಿಸುವುದು ಎಲ್ಲರ ಜವಾಬ್ದಾರಿ.ಗ್ರಾಮೀಣ ಭಾಗದಲ್ಲಿರುವ ಸರಕಾರಿ ಶಾಲೆಗಳ ಬೆಳವಣಿಗೆಯಲ್ಲಿ ಸಮುದಾಯದ ಪಾಲ್ಗೊಳ್ಳುವಿಕೆ ಅತೀ ಅಗತ್ಯ. ಶತಮಾನೋತ್ಸವದ ಹೊತ್ತಿನಲ್ಲಿರುವ ಪುಣ್ಚಪ್ಪಾಡಿ ಶಾಲೆ ಹಲವು ವಿದ್ಯಾರ್ಥಿಗಳಿಗೆ ಬದುಕಿನ ದಾರಿ ತೋರಿಸಿದೆ ಎಂದು ಸವಣೂರು ಗ್ರಾ.ಪಂ.ಮಾಜಿ ಉಪಾಧ್ಯಕ್ಷ ಪಿ.ಡಿ.ಗಂಗಾಧರ ರೈ ಹೇಳಿದರು.

ಅವರು  ಪುಣ್ಚಪ್ಪಾಡಿ ಕಿ.ಪ್ರಾ.ಶಾಲೆಯ ಆರಂಭೋತ್ಸವದ ಸಭಾ ಕಾರ್ಯಕ್ರಮವನ್ನು ಚಿಣ್ಣರ ತಕ್ಷಶಿಲಾ ಕಲಿಕಾ ಕುಟೀರದಲ್ಲಿ ರಂಗವಲ್ಲಿಯ ನಡುವೆ ದೀಪ ಬೆಳಗಿಸುವ ಮೂಲಕ ಉದ್ಘಾಟಿಸಿದರು.

ಸವಣೂರು ಕ್ಲಸ್ಟರ್ ಸಿಆರ್‌ಪಿ ವೆಂಕಟೇಶ್ ಅನಂತಾಡಿ ಮಾತನಾಡಿ,ಮಕ್ಕಳಿಗೆ ಮನೆಯೇ ಮೊದಲ ಪಾಠಶಾಲೆ,ತಾಯಿ ಮೊದಲ ಗುರು,ತಂದೆಯ ನಂತರ ಶಿಕ್ಷಕ ಮಕ್ಕಳ ಗುರುವಾಗಿರುತ್ತಾನೆ.ಹೆತ್ತವರಿಗೆ ಜೀವನ ಮೌಲ್ಯ ಕಲಿಸುವ ಜವಾಬ್ದಾರಿ ಇದೆ. ಶಾಲೆಯೆಂಬುದು ಸಮಾಜದ ಪ್ರತಿರೂಪ. ಶಾಲೆ ಬೆಳವಣಿಗೆಯಾದರೆ ಊರೇ ಬೆಳವಣಿಗೆಯಾಗುತ್ತದೆ ಎಂದರು.ಪ್ರಸ್ತುತ ಎಲ್ಲೆಡೆ ನೀರಿನ ಹಾಹಾಕಾರ ತಲೆದೋರಿದೆ.ಭವಿಷ್ಯದ ಹಿತದೃಷ್ಠಿಯಿಂದ ಪ್ರತಿಯೊಬ್ಬರು ನೀರಿಂಗಿಸುವ ಕುರಿತು ಅಸ್ಥೆ ವಹಿಸಬೇಕು.ಜಲಮರು ಪೂರಣ,ಇಂಗುಗುಂಡಿ ನಿರ್ಮಾಣ ಕಾರ್ಯ ಮಾಡಬೇಕಿದೆ ಎಂದು ವೆಂಕಟೇಶ್ ಹೇಳಿದರು.

ಸಭಾಕಾರ್ಯಕ್ರಮಕ್ಕೆ ಮುನ್ನ ಶಾಲೆಗೆ ಹೊಸದಾಗಿ ಸೇರ್ಪಡೆಯಾಗುವ ಮಕ್ಕಳನ್ನು ಮನೆಯಿಂದ ಅಕ್ಷರರಥ ದ ಮೂಲಕ ಶಾಲೆಗೆ ಕರೆತಂದ ಮಕ್ಕಳನ್ನು ಆರತಿ ಬೆಳಗಿಸಿ ತಿಲಕ ಇಟ್ಟು ಬರಮಾಡಿಕೊಳ್ಳಲಾಯಿತು. ಅಕ್ಷರ ರಥಕ್ಕೆ ಸವಣೂರು ಗ್ರಾ.ಪಂ.ಅಧ್ಯಕ್ಷೆ ಇಂದಿರಾ ಬಿ.ಕೆ. ಚಾಲನೆ ನೀಡಿ ಶುಭ ಹಾರೈಸಿದರು.

ಕಾರ್ಯಕ್ರಮದ ಅಧ್ಯಕ್ಷತೆಯನ್ನು ಶಾಲಾಭಿವೃದ್ಧಿ ಸಮಿತಿ ಅಧ್ಯಕ್ಷ ಮೋನಪ್ಪ ಗೌಡ ವಹಿಸಿದ್ದರು. ವೇದಿಕೆಯಲ್ಲಿ ಲಿಂಗಪ್ಪ ರೈ ಚೆಂಬುತ್ತೋಡಿ ಉಪಸ್ಥಿತರಿದ್ದರು. ಶಿಕ್ಷಕ ಯತೀಶ್ ಕುಮಾರ್ ಸ್ವಾಗತಿಸಿ ,ಮುಖ್ಯಗುರು ರಶ್ಮಿತಾ ಎನ್ ಇಂದ್ರ ವಂದಿಸಿದರು.