ಕುಕ್ಕಿಪಾಡಿಯಲ್ಲಿ ಸಾಂಸ್ಕೃತಿಕ ಉತ್ಸವ ಉದ್ಟಾಟಿಸಿ ಡಾ. ಕೈರೋಡಿ

ಬಂಟ್ವಾಳ : ಕಳೆದ ಎರಡು ದಶಕಗಳಿಂದೀಚೆಗೆ ಯಾಂತ್ರಿಕವಾಗಿ, ಸೌಲಭ್ಯ ಕೇಂದ್ರಿತವಾಗಿ ಸಾಕಷ್ಟು ಆಶಾದಾಯಕ ಬೆಳವಣಿಗೆಯಾಗಿದೆ. ಆದರೆ ಮನುಷ್ಯ ಮನುಷ್ಯನೊಂದಿಗೆ ಅರಿತು ಬೆರೆತು ಬದುಕುವ ವಾತಾವರಣ ಕ್ಷಿಣಿಸುತ್ತಿವೆ. ಸ್ವಾರ್ಥಪರ ಹಾಗೂ ಸಂಕುಚಿತ ಮನೋಭಾವ ಬಿತ್ತುವ ಸಂಗತಿಗಳೇ ವಿಜೃಂಭಿಸುತ್ತಿವೆ. ಎಂದು ಮೂಡುಬಿದಿರೆ ಆಳ್ವಾಸ್ ಶಿಕ್ಷಣ ಪ್ರತಿಷ್ಠಾನದ ಪ್ರಾಧ್ಯಾಪಕ ಡಾ. ಯೋಗೀಶ್ ಕೈರೋಡಿ ನುಡಿದರು.

ಅವರು ಬಂಟ್ವಾಳ ತಾಲೂಕಿನ ಕುಕ್ಕಿಪಾಡಿಯ ನೇಲ್ಯಕುವೇರಿನಲ್ಲಿ ಯುವ ಫ್ರೆಂಡ್ಸ್ ಬಳಗದ ವತಿಯಿಂದ ನಡೆದ ಸಾಂಸ್ಕೃತಿಕ ಉತ್ಸವವನ್ನು ಉದ್ಟಾಟಿಸಿ ಮಾತನಾಡುತ್ತಿದ್ದರು.ಭತ್ತದ ಕೃಷಿಯಲ್ಲಿ ಹಾಸು ಹೊಕ್ಕಾಗಿದ್ದ ಮನುಷ್ಯ ಭಾಂಧವ್ಯವಾಗಲಿ ಜನಪದ ಸಾಹಿತ್ಯವಾಗಲಿ ಇಂದು ಗ್ರಾಮೀಣ ಬದುಕಿನಲ್ಲಿ ಕಾಣುವುದು ಅಸಾಧ್ಯವಾಗಿದೆ.

ಸಂಕುಚಿತ ಸಂಘಟನೆಗಳಿಂದ ಯುವಕರು ದೂರವಿದ್ದು ಕಲೆ-ಸಾಹಿತ್ಯ ಕ್ರೀಡೆ ಹಾಗೂ ಸರ್ವಹಿತದ ಸಮಾಜಮುಖಿ ಸಂಘಟನೆಗಳಲ್ಲಿ ಯುವಕರು ತೊಡಗಿಕೊಳ್ಳಬೇಕಾಗಿದೆ. ಮನುಷ್ಯ ಸಂಬಂಧ ವೃದ್ಧಿ ವರ್ತಮಾನದ ತುರ್ತು ಅಗತ್ಯ ಎಂದರು ಸಮಾರಂಭದ ಅಧ್ಯಕ್ಷ ಸ್ಥಾನದಿಂದ ಮೂಡುಬಿದಿರೆ ರೋಟರಿ ವಿದ್ಯಾ ಸಂಸ್ಥೆಯ ಪ್ರಾಂಶುಪಾಲ ವಿನ್ಸೆಂಟ್ ಡಿಕೋಸ್ತ ರವರು ಮಾತನಾಡಿ ಗ್ರಾಮೀಣ ಪ್ರತಿಭೆಗಳು ಕಮರಿ ಹೋಗದಂತೆ ಕಾಪಾಡುವ ಕಾರ್ಯವನ್ನು ಯುವಫ್ರೆಂಡ್ಸ್ ಬಳಗ ಅತ್ಯಂತ ಬದ್ಧತೆಯಿಂದ ಮಾಡುತ್ತಿರುವುದು. ಸುತ್ಯರ್ಹ ಎಂದರು.

ದಕ್ಷಿಣ ಕನ್ನಡ ಜಿಲ್ಲಾ ಪಂಚಾಯತ್ ಸದಸ್ಯ ತುಂಗಪ್ಪ ಬಂಗೇರ, ವಾಮದಪದವು ಸರಕಾರಿ ಪ.ಪೂ. ಕಾಲೇಜಿನ ಉಪಪ್ರಾಂಶುಪಾಲ ರಾಘವೇಂದ್ರ ಬಳ್ಳಾಲ್, ಚಂದ್ರಹಾಸ ಬಂಟ್ವಾಳ, ಚಿತ್ರ ನಟಿ ಶೃತಿ ಕೋಟ್ಯಾನ್ ಮಾತನಾಡಿದರು. ವಸಂತ ಜೈನ್ ಕುಕ್ಕೇಡಿ, ಉದ್ಯಮಿ ಲಾದ್ರು ಮಿನೇಜಸ್, ಸನತ್ ಭಂಢಾರಿ, ಗ್ರಾಮ ಪಂಚಾಯತ್ ಸದಸ್ಯ ಲಿಂಗಪ್ಪ ಪೂಜಾರಿ ಮುಂತಾದವರು ಉಪಸ್ಥಿತರಿದ್ದರು.  

ಗೌರವ ಡಾಕ್ಟರೇಟ್ ಪುರಸ್ಕೃತ ಯಜಮಾನ ಇಂಡಸ್ಟ್ರೀಸ್‌ನ ವರದರಾಜ ಪೈ, ಛಾಯಗ್ರಾಹಕ ರಾಜೇಶ್ ಹಳೆಯಂಗಡಿ ಇವರನ್ನು ಸನ್ಮಾನಿಸಲಾಯಿತು. ಪ್ರದೀಪ್ ಕುಮಾರ್ ಕುಕ್ಕಿಪಾಡಿ ಸ್ವಾಗತಿಸಿದರು. ಅಶೋಕ್ ಹಲಾಯಿ ಪ್ರಸ್ತಾವನೆಗೈದರು. ರೀನಾ ಡಿಸೋಜ ಎಲ್ಪೇಲು ವಂದಿಸಿದರು. ಸಂತೋಷ್ ಸಿದ್ಧಕಟ್ಟೆ ಕಾರ್ಯಕ್ರಮ ನಿರೂಪಿಸಿದರು. ಬಳಿಕ ವಿವಿಧ ಕಲಾ ತಂಡಗಳಿಂದ ಶಾಸ್ತ್ರೀಯ-ಜಾನಪದ ನೃತ್ಯ ಪ್ರದರ್ಶನ, ಹಾಗೂ ನಾಟಕ ಪ್ರದರ್ಶನ ನಡೆಯಿತು.