ಉಚಿತ ಬಿರ್ಯಾನಿ ನೀಡಿ ಕೆರೆ ಸ್ವಚ್ಛಗೊಳಿಸಿದ ಕೋಝಿಕೋಡ್ ಜಿಲ್ಲಾಧಿಕಾರಿ

ಕೋಝಿಕೋಡ್: ಕೋಝಿಕೋಡ್ ಜಿಲ್ಲಾಧಿಕಾರಿ, ಐಎಎಸ್ ಅಧಿಕಾರಿ ಪ್ರಶಾಂತ್ ನಾಯರ್ ಜಿಲ್ಲೆಯ ಕಾರ್ಯನಿರ್ವಹಣೆಯಲ್ಲಿ ನವೀನ ಪರಿಕಲ್ಪನೆಗಳಿಗೆ ಹೆಸರುವಾಸಿ.

ಇಲ್ಲಿನ ಜನತೆಗೆ ನೀರು ಕಲ್ಪಿಸುವ ಜಿಲ್ಲೆಯ ಕೊಯಿಲಾಂಡಿ ಸಮೀಪದ ಪಿಶಾರಿಕಾವು ಸರೋವರ ಸ್ವಚ್ಛಗೊಳಿಸಲು ಸ್ಥಳೀಯರಲ್ಲಿ ಮನವಿ ಮಾಡಿ ಅದರ ಬದಲಿಯಾಗಿ ಒಂದು ಪ್ಲೇಟ್ ಉಚಿತ ಬಿರ್ಯಾನಿ ಕೂಡ ನೀಡಿದ್ದಾರೆ. ಈ ಮನವಿಗೆ ಸ್ಥಳೀಯರು ಒಪ್ಪಿಗೆ ನೀಡಿ ಸರೋವರದ ಕೊಳಚೆ ನೀರು, ಕೆಸರನ್ನು ಸ್ವಚ್ಛಗೊಳಿಸಿದ್ದಾರೆ.

ಈ 57,000 ಚದರ ಮೀಟರ್ ಸರೋವರ ಸ್ವಚ್ಛಗೊಳಿಸುವುದು ಕಷ್ಟಕರ ಕಾರ್ಯವಾಗಿದೆ. ಇನ್ನು ಸ್ವಚ್ಚಗೊಳಿಸಲು ಸಹಕರಿಸಿದ ಎಲ್ಲಾ ಕಾರ್ಯಕರ್ತರಿಗೂ ಧನ್ಯವಾದಗಳು ಎಂದು ಅವರು ತಮ್ಮ ಫೇಸ್‌ಬುಕ್‌ನಲ್ಲಿ ಪ್ರಕಟಿಸಿದ್ದಾರೆ. ಜಿಲ್ಲಾಡಳಿತದ ಬರ ನಿರ್ವಹಣೆ ನಿಧಿಯ ಒಂದು ಭಾಗವಾಗಿ ಕಾರ್ಯಕರ್ತರಿಗೆ ಬಿರ್ಯಾನಿ ವಿತರಿಸಲಾಗಿದೆ.

ನಾಗರಿಕ ಸುಧಾರಣೆಗಳಿಗೆ ಹೊಸ ಪರಿಕಲ್ಪನೆಗಳನ್ನು ತರುವಲ್ಲಿ ಹೆಸರುವಾಸಿಯಾಗಿರುವ ಜಿಲ್ಲಾಧಿಕಾರಿ ನಾಯರ್, ದೊಡ್ಡ ಮಟ್ಟದಲ್ಲಿ ಅಭಿಮಾನಿಗಳನ್ನು ಹೊಂದಿದ್ದಾರೆ. ’ಕಲೆಕ್ಟರ್ ಬ್ರೋ’ ಎಂದು ಕರೆಯಲ್ಪಡುವ ನಾಯರ್, ಗುಂಪು ನಿಧಿಸಂಗ್ರಹ (crowd funding) ಪ್ರೋತ್ಸಾಹಕ್ಕೆ ಪ್ರಸಿದ್ಧಿ ಪಡೆದಿದ್ದಾರೆ.