2 ವರ್ಷಗಳ ನಂತರ ಹಮಾಸ್‌ನಿಂದ ಇಸ್ರೇಲಿ ಒತ್ತೆಯಾಳುಗಳ ಬಿಡುಗಡೆ, ಟೆಲ್ ಅವೀವ್‌ನಲ್ಲಿ ಹರ್ಷೋದ್ಗಾರ

ಟೆಲ್ ಅವಿವ್: ಹಮಾಸ್ ಏಳು ಇಸ್ರೇಲಿ ಒತ್ತೆಯಾಳುಗಳನ್ನು ರೆಡ್ ಕ್ರಾಸ್ ವಶಕ್ಕೆ ನೀಡುವ ಮೂಲಕ ಬಿಡುಗಡೆ ಮಾಡಿದೆ, ಗಾಜಾ ಪಟ್ಟಿಯಲ್ಲಿ ಇಸ್ರೇಲ್ ಮತ್ತು ಹಮಾಸ್ ನಡುವಿನ ಎರಡು ವರ್ಷಗಳ ಯುದ್ಧದ ನಂತರ ನಡೆದ ಕದನ ವಿರಾಮದ ಭಾಗವಾಗಿ ಈ ಬಿಡುಗಡೆ ನಡೆದಿದೆ.

ಇಸ್ರೇಲಿ ಮಾಧ್ಯಮ ವರದಿಗಳ ಪ್ರಕಾರ, ಬಿಡುಗಡೆಯಾದ ಒತ್ತೆಯಾಳುಗಳಲ್ಲಿ ಗಾಲಿ ಮತ್ತು ಜಿವ್ ಬೆರ್ಮನ್, ಮಾತನ್ ಅಂಗ್ರೆಸ್ಟ್, ಅಲೋನ್ ಓಹೆಲ್, ಓಮ್ರಿ ಮಿರಾನ್, ಐಟನ್ ಮೋರ್ ಮತ್ತು ಗೈ ಗಿಲ್ಬೋವಾ-ಡಲ್ಲಾಲ್ ಸೇರಿದ್ದಾರೆ. ಅವರ ಸ್ಥಿತಿಯ ಬಗ್ಗೆ ತಕ್ಷಣದ ಮಾಹಿತಿ ಇಲ್ಲದಿದ್ದರೂ,  ಉತ್ತರ ಗಾಜಾ ಪಟ್ಟಿಯಲ್ಲಿ ಹಮಾಸ್ ಬಳಿ ಇದ್ದ ಈ ಒತ್ತೆಯಾಳುಗಳನ್ನು ರೆಡ್‌ ಕ್ರಾಸ್‌ ವಶಕ್ಕೆ ಪಡೆಯುತ್ತಿದ್ದಂತೆ ಸಾವಿರಾರು ಇಸ್ರೇಲಿಗರು ಜೋರಾಗಿ ಹರ್ಷೋದ್ಗಾರ ಮಾಡಿದ್ದಾರೆ.

ಈ ನಡುವೆ, ಪ್ಯಾಲೆಸ್ಟೀನಿಯನ್ನರು ಇಸ್ರೇಲ್ ಹಿಡಿದಿದ್ದ ನೂರಾರು ಕೈದಿಗಳ ಬಿಡುಗಡೆಗಾಗಿ ಕಾಯುತ್ತಿದ್ದರು. ಎರಡು ವರ್ಷಗಳ ಯುದ್ಧದ ನಂತರ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಮಧ್ಯಸ್ಥಿಕೆಯಲ್ಲಿ ನಡೆದ ಮಹತ್ವದ ಕದನ ವಿರಾಮವನ್ನು ಅನುಸರಿಸಿ ಒತ್ತೆಯಾಳುಗಳು ಮತ್ತು ಕೈದಿಗಳ ಪ್ರಮುಖ ವಿನಿಮಯ ನಡೆಯುತ್ತಿದೆ.

ಯುಎಸ್-ಪ್ರಸ್ತಾಪಿತ ಒಪ್ಪಂದ ಮತ್ತು ಯುದ್ಧಾನಂತರದ ಯೋಜನೆಗಳ ಕುರಿತು ಚರ್ಚಿಸಲು ಟ್ರಂಪ್ ಇತರ ನಾಯಕರೊಂದಿಗೆ ಈ ಪ್ರದೇಶಕ್ಕೆ ಹೋಗುತ್ತಿದ್ದಾರೆ. ಈಗ, ಒತ್ತೆಯಾಳುಗಳ ಬಿಡುಗಡೆಯೊಂದಿಗೆ, ಇಸ್ರೇಲ್ ಮತ್ತು ಹಮಾಸ್ ನಡುವಿನ ಅತ್ಯಂತ ಭೀಕರ ಯುದ್ಧವು ಕೊನೆಗೊಂಡಂತಾಗಿದೆ. ಆದರೆ ಪ್ಯಾಲೆಸ್ಟೀನಿಯನ್ ಪ್ರದೇಶವನ್ನು ಅವಶೇಷಗಳಾಗಿ ಈ ಯುದ್ಧ ಮಾಡಿಬಿಟ್ಟಿದ್ದು, ಗಾಜಾದ ಭವಿಷ್ಯದ ಬಗ್ಗೆ ಪ್ರಶ್ನೆಗಳು ಮೂಡಿವೆ. ಯುದ್ಧವು ಈಗ ಮುಗಿದಿರುವುದರಿಂದ, ಬರಗಾಲದಿಂದ ಬಳಲುತ್ತಿರುವ ಗಾಜಾದ ಜನರಿಗೆ ಮಾನವೀಯ ನೆರವು ಹೆಚ್ಚಾಗಿ ಬೇಕಾಗಿದೆ, ಅಲ್ಲಿ ಲಕ್ಷಾಂತರ ಜನರು ನಿರಾಶ್ರಿತರಾಗಿದ್ದಾರೆ.

ಒತ್ತೆಯಾಳುಗಳ ವಾಪಸಾತಿ ಇಸ್ರೇಲಿನ ನೋವಿನ ಅಧ್ಯಾಯವನ್ನು ಕೊನೆಯಾಗಿಸಿದೆ. ಯುದ್ಧವನ್ನು ಹುಟ್ಟುಹಾಕಿದ ಅಕ್ಟೋಬರ್ 2023 ರ ಹಮಾಸ್ ದಾಳಿಯಲ್ಲಿ ಈ ಒತ್ತೆಯಾಳುಗಳನ್ನು ಸೆರೆಹಿಡಿಯಲಾಗಿತ್ತು. ಜೀವಂತ ಒತ್ತೆಯಾಳುಗಳನ್ನು ಅಂತರರಾಷ್ಟ್ರೀಯ ರೆಡ್‌ಕ್ರಾಸ್ ಸಮಿತಿಗೆ ಹಸ್ತಾಂತರಿಸಲಾಗಿದೆ ಮತ್ತು ನಂತರ ಅದು ಇಸ್ರೇಲಿ ಮಿಲಿಟರಿಗೆ ಹಸ್ತಾಂತರಿಸುತ್ತದೆ. ಮಿಲಿಟರಿ ಅವರನ್ನು ಕುಟುಂಬಗಳಿಗೆ ಹಸ್ತಾಂತರಿಸಲಿದೆ.