ಭಾರತ-ಪಾಕ್ ಸರಣಿ: ಮಾತುಕತೆಗೆ ಭಾರತ ಆಹ್ವಾನ

ಕರಾಚಿ: ಭಾರತ ಕ್ರಿಕೆಟ್ ನಿಯಂತ್ರಣ ಮಂಡಳಿ ಅಧ್ಯಕ್ಷ ಶಶಾಂಕ್ ಮನೋಹರ್ ಅವರು ಭಾರತ-ಪಾಕ್ ಕ್ರಿಕೆಟ್ ಸರಣಿ ಕುರಿತು ಮಾತುಕತೆಗೆ ಪಿಸಿಬಿಯನ್ನು ಆಹ್ವಾನಿಸಿದ್ದಾರೆ ಎಂದು ಪಾಕಿಸ್ಥಾನ ಕ್ರಿಕೆಟ್ ಮಂಡಳಿ (ಪಿಸಿಬಿ) ಅಧ್ಯಕ್ಷ ಶಹರ್ಯಾರ್ ಖಾನ್ ಹೇಳಿದ್ದಾರೆ. ಆದರೆ ಎರಡು ದೇಶಗಳ ವೈಷಮ್ಯದ ರಾಜಕೀಯ ಸಂಬಂಧಗಳ ಹಿನ್ನೆಲೆಯಲ್ಲಿ ಇದರ ಭವಿಷ್ಯ ಅನಿಶ್ಚಿತವಾಗಿದೆ ಎಂದು ಅವರು ಹೇಳಿದ್ದಾರೆ.

ಅಂತಾರಾಷ್ಟ್ರೀಯ ಕ್ರಿಕೆಟ್ ಮಂಡಳಿ(ಐಸಿಸಿ)ಯು ದುಬೈನಲ್ಲಿ ನಡೆಸಿದ್ದ ಸಭೆಯೊಂದರಲ್ಲಿ ಮನೋಹರ್ ಅವರು ಭಾಗವಹಿಸದೇ ಇದ್ದ ಕಾರಣ ಖಾನ್ ಅವರು ಮನೋಹರ್ ಜೊತೆ ದೂರವಾಣಿ ಮೂಲಕ ಸಂವಾದ ನಡೆಸಿದ್ದಾರೆ. ಈ ಸಂದರ್ಭ ಮನೋಹರ್ ಅವರು ಬಿಸಿಸಿಐಯ ಕಾರ್ಯಕಾರಿ ಸಮಿತಿ ಸಭೆ ಬಳಿಕ ಭಾರತಕ್ಕೆ ಆಗಮಿಸುವಂತೆ ಆಹ್ವಾನಿಸಿದ್ದಾರೆ. ಮುಂದಿನ 10 ದಿನಗಳಲ್ಲಿ ಇದಕ್ಕೆ ಉತ್ತರ ದೊರೆಯುವ ನಿರೀಕ್ಷೆ ಇದೆ ಎಂದು ಖಾನ್ ತಿಳಿಸಿದ್ದಾರೆ.

ಭಾರತ ಹಾಗೂ ಪಾಕಿಸ್ಥಾನ ನಡುವಿಕ ಎಲ್ಲಾ ಸಮಸ್ಯೆಗಳನ್ನು ಬಗೆಹಸುವ ಮೂಲಕ ಎರಡೂ ದೇಶಗಳ ನಡುವೆ ಉತ್ತಮ ಸಂಬಂಧ ಬೆಳೆಸುವ ಬಗ್ಗೆ ಮನೋಹರ್ ಭರವಸೆ ನೀಡಿದ್ದಾರೆ. ಪಾಕಿಸ್ಥಾನ ಜೊತೆ ಹಾಕಲಾದ ಒಪ್ಪಂದಗಳಿಗೆ ಗೌರವಿಸುವ ಮೂಲಕ 2015ರಿಂದ 2023ರ ವರೆಗಿನ ದ್ವಿಪಕ್ಷೀಯ ಸರಣಿಗಳನ್ನು ಆಡಬೇಕು ಎಂದು ಶಹರ್ಯಾರ್ ಖಾನ್ ಒತ್ತಾಯಿಸಿದ್ದಾರೆ.
ಪಾಕಿಸ್ಥಾನ ಪ್ರಧಾನಿ ನವಾಜ್ ಶರೀಫ್ ಈಗಾಗಲೇ ಭಾರತ-ಪಾಕ್ ಸರಣಿಗೆ ಒಪ್ಪಿಗೆ ನೀಡಿದ್ದು, ಪಾಕ್ ಕ್ರಿಕೆಟ್ ಸರಣಿಗೆ ಸಿದ್ಧವಿದೆ. ಇದಕ್ಕೆ ಭಾರತ ಸಹಕರಿಸಬೇಕಿದೆ ಎಂದು ಖಾನ್ ಹೇಳಿದ್ದಾರೆ.