ಜಮ್ಮು ಮತ್ತು ಕಾಶ್ಮೀರದಲ್ಲಿ ಈ ವರ್ಷ 75 ಉಗ್ರರ ಹತ್ಯೆ: 60% ಉಗ್ರರು ಪಾಕಿಸ್ಥಾನಿಯರು

ಶ್ರೀನಗರ: ಜಮ್ಮು ಮತ್ತು ಕಾಶ್ಮೀರದಲ್ಲಿ, ಭದ್ರತಾ ಪಡೆಗಳು ಈ ವರ್ಷ 75 ಭಯೋತ್ಪಾದಕರನ್ನು ಹೊಡೆದುರುಳಿಸಿದೆ, ಇವರಲ್ಲಿ ಸುಮಾರು 60 ಪ್ರತಿಶತದಷ್ಟು ಉಗ್ರರು ಪಾಕಿಸ್ತಾನಿ ಪ್ರಜೆಗಳು ಎಂದು ಸೇನಾ ಅಧಿಕಾರಿಗಳ ಮೂಲಗಳು ತಿಳಿಸಿವೆ.

ಭಾರತೀಯ ಭದ್ರತಾ ಪಡೆಗಳು ಪ್ರತಿ ಐದು ದಿನಗಳಿಗೊಮ್ಮೆ ಒಬ್ಬ ಭಯೋತ್ಪಾದಕನನ್ನು ಸಂಹರಿಸುತ್ತಿದೆ ಎಂಬುದನ್ನು ಇದು ತೋರಿಸುತ್ತದೆ.

ಕೊಲ್ಲಲ್ಪಟ್ಟ 75 ಭಯೋತ್ಪಾದಕರಲ್ಲಿ ಹೆಚ್ಚಿನವರು ವಿದೇಶಿಯರಾಗಿದ್ದರು, ಇದರಲ್ಲಿ 17 ಮಂದಿ ಗಡಿ ನಿಯಂತ್ರಣ ರೇಖೆ (ಎಲ್‌ಒಸಿ) ಮತ್ತು ಅಂತರರಾಷ್ಟ್ರೀಯ ಗಡಿ (ಐಬಿ) ಉದ್ದಕ್ಕೂ ಒಳನುಸುಳುವಿಕೆ ಪ್ರಯತ್ನಗಳ ಸಮಯದಲ್ಲಿ ಹತ್ಯೆಯಾಗಿದ್ದಾರೆ ಮತ್ತು ಆಂತರಿಕ ಪ್ರದೇಶಗಳಲ್ಲಿ ಎನ್‌ಕೌಂಟರ್‌ಗಳಲ್ಲಿ 26 ಮಂದಿ ಕೊಲ್ಲಲ್ಪಟ್ಟರು.

ವರದಿಯ ಪ್ರಕಾರ, ಜಮ್ಮು ಪ್ರದೇಶದ ಐದು ಜಿಲ್ಲೆಗಳಾದ ಜಮ್ಮು, ಉಧಂಪುರ, ಕಥುವಾ, ದೋಡಾ ಮತ್ತು ರಜೌರಿಗಳಲ್ಲಿ ಕೊಲ್ಲಲ್ಪಟ್ಟ 42 ಭಯೋತ್ಪಾದಕರು ಸ್ಥಳೀಯೇತರರುಎಂದು ಲಭ್ಯವಿರುವ ಮಾಹಿತಿಯು ಬಹಿರಂಗಪಡಿಸಿದೆ.

ಕಾಶ್ಮೀರ ಕಣಿವೆಯಲ್ಲಿ, ಭದ್ರತಾ ಪಡೆಗಳು ಬಾರಾಮುಲ್ಲಾ, ಬಂಡಿಪೋರಾ, ಕುಪ್ವಾರ ಮತ್ತು ಕುಲ್ಗಾಮ್‌ನಂತಹ ಜಿಲ್ಲೆಗಳಲ್ಲಿ ವಿದೇಶಿ ಭಯೋತ್ಪಾದಕರನ್ನು ಸಂಹರಿಸಿವೆ.

ಬಾರಾಮುಲ್ಲಾ ವಿದೇಶಿ ಭಯೋತ್ಪಾದಕ ಚಟುವಟಿಕೆಗಳ ಹಾಟ್‌ಸ್ಪಾಟ್ ಆಗಿ ಹೊರಹೊಮ್ಮಿತು, ಒಂಬತ್ತು ಎನ್‌ಕೌಂಟರ್‌ಗಳಲ್ಲಿ 14 ಸ್ಥಳೀಯೇತರ ಸಾವುನೋವುಗಳನ್ನು ದಾಖಲಿಸಿದೆ.

ಈ ಹೆಚ್ಚಿನ ಭಯೋತ್ಪಾದಕರನ್ನು ಉರಿ ಸೆಕ್ಟರ್‌ನ ಸಬುರಾ ನಾಲಾ ಪ್ರದೇಶ, ಮುಖ್ಯ ಉರಿ ಸೆಕ್ಟರ್, ಎಲ್‌ಒಸಿ ಉದ್ದಕ್ಕೂ ಕಮಲಕೋಟ್ ಉರಿ ಮತ್ತು ಸೋಪೋರ್‌ನ ಒಳನಾಡಿನ ಚಕ್ ತಪ್ಪರ್ ಕ್ರಿರಿ, ನೌಪೋರಾ, ಹಡಿಪೋರಾ, ಸಾಗಿಪೋರಾ, ವಾಟರ್‌ಗಾಮ್ ಮತ್ತು ರಾಜ್‌ಪೋರ್‌ಗಳಲ್ಲಿ ಸಂಹರಿಸಲಾಗಿದೆ.

ಜಮ್ಮು ಮತ್ತು ಕಾಶ್ಮೀರದಲ್ಲಿ ಕಾರ್ಯಾಚರಿಸುತ್ತಿರುವ ಸ್ಥಳೀಯ ಭಯೋತ್ಪಾದಕರ ಉಪಸ್ಥಿತಿಯಲ್ಲಿ ಗಮನಾರ್ಹ ಕುಸಿತವನ್ನು ಈ ಸಂಖ್ಯೆಗಳು ಸೂಚಿಸುತ್ತವೆ, ಮುಖ್ಯವಾಗಿ ಪಾಕಿಸ್ತಾನಿ ಭಯೋತ್ಪಾದಕರು ಈ ಪ್ರದೇಶದಲ್ಲಿ ಸಕ್ರಿಯರಾಗಿದ್ದಾರೆ.

“ಸ್ಥಳೀಯ ಭಯೋತ್ಪಾದಕ ಗುಂಪನ್ನು ಬಹುತೇಕ ನಿರ್ನಾಮ ಮಾಡಲಾಗಿದೆ,” ಎಂದು ಅಧಿಕಾರಿಯೊಬ್ಬರು ಹೇಳಿರುವುದಾಗಿ ಇಂಡಿಯಾ ಟುಡೇ ವರದಿ ಮಾಡಿದೆ.

2024 ರಲ್ಲಿ, ಜಮ್ಮು ಮತ್ತು ಕಾಶ್ಮೀರವು 60 ಭಯೋತ್ಪಾದನೆ ಸಂಬಂಧಿತ ಘಟನೆಗಳಿಗೆ ಸಾಕ್ಷಿಯಾಯಿತು, ಇದರ ಪರಿಣಾಮವಾಗಿ 32 ನಾಗರಿಕರು ಮತ್ತು 26 ಭದ್ರತಾ ಪಡೆಗಳ ಸಿಬ್ಬಂದಿ ಸೇರಿದಂತೆ 122 ಜನರು ಸಾವನ್ನಪ್ಪಿದರು.