ನಗರ ಪ್ರದೇಶಗಳಲ್ಲಿ ಒಂದು ಕೋಟಿ ಮನೆ ನಿರ್ಮಾಣದ ಗುರಿ ಹೊಂದಿದೆ ಕೇಂದ್ರ

ನವದೆಹಲಿ: ದೇಶದಲ್ಲಿ ನಗರೀಕರಣ ಗಣನೀಯವಾಗಿ ಹೆಚ್ಚುತ್ತಿದ್ದು, ಶೇ.35ಕ್ಕೆ ತಲುಪಿದೆ ಎಂದು ಕೇಂದ್ರ ನಗರ ಮತ್ತು ವಸತಿ ಸಚಿವ ಮನೋಹರ್ ಲಾಲ್  ಖಟ್ಟರ್‌ ಮಾಹಿತಿಯನ್ನು ನೀಡಿದ್ದಾರೆ.

ನವದೆಹಲಿಯಲ್ಲಿ ಪತ್ರಿಕಾಗೋಷ್ಠಿಯನ್ನು ಉದ್ದೇಶಿಸಿ ಮಾತನಾಡಿದ ಅವರು, ಮುಂಬರುವ ವರ್ಷಗಳಲ್ಲಿ ನಗರೀಕರಣ 40-50 ಪ್ರತಿಶತವನ್ನು ತಲುಪುವ ನಿರೀಕ್ಷೆಯನ್ನು ಸರ್ಕಾರ ಹೊಂದಿದೆ. ನಗರೀಕರಣದ ಹೆಚ್ಚಳದೊಂದಿಗೆ ನಗರ ಮೂಲಸೌಕರ್ಯಗಳ ಪ್ರಾಮುಖ್ಯತೆಯೂ ಬೆಳೆದಿದೆ ಎಂದು ಹೇಳಿದರು.

ಪಿಎಂ-ಆವಾಸ್ ಯೋಜನೆ 2.0 ಐದು ವರ್ಷಗಳ ಕಾರ್ಯಕ್ರಮವಾಗಿದ್ದು, ನಗರ ಪ್ರದೇಶಗಳಲ್ಲಿ ಒಂದು ಕೋಟಿ ಮನೆಗಳನ್ನು ನಿರ್ಮಿಸುವ ಗುರಿ ಹೊಂದಿದೆ. ಮೊದಲ ಹಂತಕ್ಕೆ 6-7 ಪ್ರತಿಶತದಷ್ಟು ಸಣ್ಣ ಭಾಗಗಳಲ್ಲಿ ಮನೆ ನಿರ್ಮಾಣವನ್ನು ನಿಗದಿಪಡಿಸಲಾಗಿದೆ, ಇಲ್ಲಿ ಸುಮಾರು ಏಳು ಲಕ್ಷ ಮನೆಗಳ ನಿರ್ಮಾಣವಾಗಲಿದೆ ಎಂದು ಅವರು ಹೇಳಿದರು.

ಬೇಡಿಕೆಗಳ ಅನುಮೋದನೆಗೆ ಸಮಯ ಹಿಡಿಯುವುದರಿಂದ ಸರ್ಕಾರ ಈಗ ಮೊದಲ ಹಂತದ ಮನೆಗಳನ್ನು ಮಂಜೂರು ಮಾಡಲಿದೆ ಎಂದು ಸಚಿವರು ಹೇಳಿದರು.

ಈ ವರ್ಷ ಏಳು ಲಕ್ಷ ಮನೆಗಳ ನಿರ್ಮಾಣದ ಭರವಸೆ ಇದ್ದು, ಪ್ರಕ್ರಿಯೆಗಳು ಪೂರ್ಣಗೊಂಡ ಬಳಿಕ ಕಾಮಗಾರಿ ಆರಂಭವಾಗಲಿದೆ ಎಂದು ಸಚಿವರು ತಿಳಿಸಿದರು. ರಾಜ್ಯಗಳು ಕೇಂದ್ರದೊಂದಿಗೆ ಡೇಟಾವನ್ನು ಹಂಚಿಕೊಂಡ ತಕ್ಷಣ ಸರ್ಕಾರವು ಹಣಕಾಸು ನಿಧಿಯ ಮೊದಲ ಕಂತನ್ನು ವರ್ಗಾಯಿಸುತ್ತದೆ ಎಂದು ಅವರು ಹೇಳಿದರು.