ವಳಲಂಬೆಯಲ್ಲಿ ಗ್ರಾಮವಿಕಾಸ ಸಭೆ ಗ್ರಾಮಗಳ ವಿಕಾಸದಿಂದ ದೇಶದ ವಿಕಾಸ

ಸುಬ್ರಹ್ಮಣ್ಯ : ಗ್ರಾಮಗಳು ಹಾಗೂ ಕೃಷಿ ದೇಶದ ಆತ್ಮ.ಕೃಷಿ ಹಿನ್ನಡೆಯಿಂದ ಗ್ರಾಮದ ಹಿನ್ನಡೆ, ಇದು ದೇಶದ ಹಿನ್ನಡೆ.ಹೀಗಾಗಿ ಸಮಗ್ರ ಅಭಿವೃದ್ಧಿ , ಗ್ರಾಮದ ವಿಕಾಸ ಇಂದು ಆಗಲೇಬೇಕಾದ ಅನಿವಾರ್ಯತೆ ಇದೆ ಎಂದು ಡಾ.ಕೃಷ್ಣ ಭಟ್ ಕೊಂಕೋಡಿ ಹೇಳಿದರು.

ಅವರು ವಳಲಂಬೆ ಶ್ರೀ ಶಂಖಪಾಲ ಸುಬ್ರಹ್ಮಣ್ಯದ ಸಭಾಂಗಣದಲ್ಲಿ ನಡೆದ ಗ್ರಾಮ ವಿಕಾಸದ ಸಭೆಯಲ್ಲಿ ಮಾತನಾಡಿದರು.ಕೃಷಿ ಅಭಿವೃದ್ಧಿಗೆ ಗೋವು ಅಗತ್ಯ.ಗೋವಿನ ಮೂಲಕ ಸಾವಯವ ಕೃಷಿ ಸಾಧ್ಯ.ಹೀಗಾಗಿ ಪ್ರತಿಯೊಂದು ಅಂಶವೂ ಒಂದಕ್ಕೊಂದು ಪೂರಕವಾಗಿರುವ ಕಾರಣ ಎಲ್ಲಾ ದೃಷ್ಟಿಯಿಂದಲೂ ಇಂದು ಗಮನಹರಿಸಬೇಕಾದ ಅಗತ್ಯವಿದೆ ಎಂದರು.ಬದಲಾಗುವ ಇಂದಿನ ವ್ಯವಸ್ಥೆಯಲ್ಲಿ ಗ್ರಾಮಗಳ ಉಳಿವು ಆಗಲೇಬೇಕಾಗಿದೆ.ಗ್ರಾಮಗಳು ವೃದ್ದಾಶ್ರಮಗಳಾಗಿ ನಗರಗಳಲ್ಲಿ ಹೆಚ್ಚಿನ ಜನಸಂಖ್ಯೆಯಾಗುತ್ತಿದೆ,

ಹೀಗಾಗಿ ಹಳ್ಳಿಗಳ ಮೂಲಸತ್ವ ಕಡಿಮೆಯಾಗುತ್ತಿದೆ.ಮೊದಲು ಹಸುವಿನ ಮಾರಾಟ ಆ ಬಳಿಕ ಕೃಷಿ ಮಾರಾಟ ಬಳಿಕ ಭೂಮಿ ಮಾರಾಟ ಸ್ಥಿತಿ ಇಂದು ಇದೆ.ನಗರದ ಪ್ಲಾಟ್‌ಗಳ ನಿರ್ವಾತ ಪ್ರದೇಶಗಳಿಗೆ ಲಕ್ಷಾಂತರ ಹಣ ಸುರಿಯುತ್ತಿರುವ ಸಂಗತಿ ಸಾಮಾನ್ಯವಾಗಿದೆ. ಹೀಗಾಗಿ ಗ್ರಾಮಗಳನ್ನು ಮತ್ತೆ ಕಟ್ಟುವ ಕೆಲಸ ಆಗಬೇಕಾಗಿದೆ, ಇದಕ್ಕಾಗಿ ಗ್ರಾಮ ವಿಕಾಸದಲ್ಲಿ ಪ್ರತಿಯೊಬ್ಬರೂ ತೊಡಗಿಸಿಕೊಳ್ಳಬೇಕು ಎಂದರು.ಈ ಹಿನ್ನೆಲೆಯಲ್ಲಿ ಶಿಕ್ಷಣ, ಸಂಸ್ಕಾರ, ಆರೋಗ್ಯ,

ಸ್ವಾವಲಂಬನೆ,ಮಹಿಳಾಕಾರ್ಯ,ಗೋಸೇವೆ, ಸುರಕ್ಷಾ ಎಂಬ ವಿಭಾಗಗಗಳ ಮೂಲಕ ಕೆಲಸ ಮಾಡಿ, ನಮ್ಮ ಗ್ರಾಮಕ್ಕೆ ಪ್ರೀತಿಯಿಂದ ಸೇವೆ ಮಾಡಬೇಕು ಎಂದರು.ರಾಷ್ಟ್ರೀಯ ಸ್ವಯಂ ಸೇವಕ ಸಂಘದ ವಿಭಾಗ ಸಹಸೇವಾ ಪ್ರಮುಖ್ ಸುಧಾಕರ್ ಮಾತನಾಡಿ,ಗ್ರಾಮದ ಎಲ್ಲಾ ಮಂದಿ ಸೇರಿಕೊಂಡು ನಿರಂತರವಾಗಿ ಗ್ರಾಮದ ಕೆಲಸ ಮಾಡಿದಾಗ ಸಂಘಟನೆ ಹಾಗೂ ಅಭಿವೃದ್ಧಿ ಸಾಧ್ಯ ಎಂದರು. ವೇದಿಕೆಯಲ್ಲಿ ರಾಷ್ಟ್ರೀಯ ಸ್ವಯಂ ಸೇವಕ ಸಂಘದ ಪ್ರಮುಖರಾದ ಚಂದ್ರಶೇಖರ ತಳೂರು,ನ.ಸೀತಾರಾಮ ಉಪಸ್ಥಿತರಿದ್ದರು.