ಲಕ್ನೋದಲ್ಲಿ ಸ್ಥಾಪನೆಯಾಗುತ್ತಿದೆ ಪಿಎಂ ಮಿತ್ರಾ ಪಾರ್ಕ್:‌ ಸೃಷ್ಟಿಸಲಿದೆ ಅಪಾರ ಉದ್ಯೋಗ

ಲಕ್ನೋ: ಉತ್ತರ ಪ್ರದೇಶದ ಕೌಶಲ್ಯಪೂರ್ಣ ಮಾನವಶಕ್ತಿಗೆ ಉದ್ಯೋಗಾವಕಾಶಗಳನ್ನು ಸೃಷ್ಟಿಸಲು ಸಹಾಯ ಮಾಡಲಿದೆ ಲಕ್ನೋದಲ್ಲಿ ಸ್ಥಾಪನೆಯಾಗುತ್ತಿರುವ ಪಿಎಂ ಮಿತ್ರ ಪಾರ್ಕ್.

ಏಪ್ರಿಲ್‌ ತಿಂಗಳಲ್ಲಿ ಲಕ್ನೋದಲ್ಲಿ PM ಮೆಗಾ ಇಂಟಿಗ್ರೇಟೆಡ್ ಟೆಕ್ಸ್ಟೈಲ್ ಸೆಕ್ಟರ್ ಆಂಡ್ ಅಪ್ಯಾರಲ್ (PM ಮಿತ್ರ)‌ ಅಡಿ ಲಕ್ನೋ ಮತ್ತು ಹರ್ದೋಯ್ ಜಿಲ್ಲೆಗಳಲ್ಲಿ 1,000 ಎಕರೆ ಪ್ರದೇಶದಲ್ಲಿ  ಸಮಗ್ರ ಜವಳಿ ಪಾರ್ಕ್‌ ಸ್ಥಾಪನೆಗೆ ಸಂಬಂಧಿಸಿದ ತಿಳುವಳಿಕೆ ಪತ್ರ (ಎಂಒಯು) ಬಿಡುಗಡೆ ಮತ್ತು ಸಹಿ ಹಾಕುವ ಕಾರ್ಯಕ್ರಮದಲ್ಲಿ ಕೇಂದ್ರ ಜವಳಿ ಸಚಿವ ಪಿಯೂಷ್ ಗೋಯಲ್ ಅವರು ಭಾಗವಹಿಸಿದ್ದರು. ಅಲ್ಲದೇ ಉತ್ತರ ಪ್ರದೇಶದ ಪಿಎಂ ಮಿತ್ರ ಪಾರ್ಕ್ ಪೂರ್ಣಗೊಂಡ ನಂತರ ದೇಶದಲ್ಲಿ ಉದ್ಘಾಟನೆಗೊಳ್ಳುವ ದೇಶದ ಮೊದಲ ಪಿಎಂ ಮಿತ್ರಾ ಪಾರ್ಕ್‌ ಆಗಲಿದೆ ಎಂದು ಭರವಸೆ ನೀಡಿದ್ದರು.

ಈ ಜವಳಿ ಪಾರ್ಕ್ ಕೋವಿಡ್ ಸಮಯದಲ್ಲಿ‌ ತವರಿಗೆ ಹಿಂದಿರುಗಿದ ವಲಸೆ ಕಾರ್ಮಿಕರಿಗೆ ಯುಪಿ ಸರ್ಕಾರ ಒದಗಿಸಿದ ಉದ್ಯೋಗದ ಅವಕಾಶವೂ ಆಗಿದೆ. ಯುಪಿಯ ನುರಿತ ಮಾನವಶಕ್ತಿಯು ಕೊಯಮತ್ತೂರು ಮತ್ತು ದೇಶದ ಇತರ ಸ್ಥಳಗಳಲ್ಲಿನ ವಿವಿಧ ಜವಳಿ ಉದ್ಯಮಗಳ ಬೆನ್ನೆಲುಬಾಗಿದೆ. ಹೀಗಾಗಿ ಜವಳಿ ಕ್ಷೇತ್ರದಲ್ಲಿ ಅಪಾರ ಅನುಭವ ಹೊಂದಿದೆ.

ಕೇಂದ್ರ ಮತ್ತು ರಾಜ್ಯ ಸರ್ಕಾರಗಳ ಒಡೆತನದಲ್ಲಿರುವ ವಿಶೇಷ ಉದ್ದೇಶದ ವಾಹನ (S.P.V.) ಮೂಲಕ ಪಿಎಂ ಮಿತ್ರ ಪಾರ್ಕ್ ಲಕ್ನೋವನ್ನು ಸಾರ್ವಜನಿಕ ಖಾಸಗಿ ಸಹಭಾಗಿತ್ವ ಕ್ರಮದಲ್ಲಿ ಅಭಿವೃದ್ಧಿಪಡಿಸಲಾಗುತ್ತದೆ.

ಪಿಎಂ ಮಿತ್ರ ಪಾರ್ಕ್ ಲಕ್ನೋದ ಒಟ್ಟು ವಿಸ್ತೀರ್ಣ 1000 ಎಕರೆಗಳಷ್ಟಿರುತ್ತದೆ. ಇದರಲ್ಲಿ 10,000 ಕೋಟಿ ರೂಪಾಯಿ ಹೂಡಿಕೆಯನ್ನು ನಿರೀಕ್ಷಿಸಲಾಗಿದೆ ಮತ್ತು ಇದು ನೇರವಾಗಿ 1 ಲಕ್ಷ ಜನರಿಗೆ ಮತ್ತು ಪರೋಕ್ಷವಾಗಿ 2 ಲಕ್ಷ ಜನರಿಗೆ ಉದ್ಯೋಗವನ್ನು ಒದಗಿಸುವ ಸಾಧ್ಯತೆಯಿದೆ ಮತ್ತು ಇದು ಜಾಗತಿಕವಾಗಿ ಸ್ಪರ್ಧಾತ್ಮಕವಾಗಲು ಜವಳಿ ಕ್ಷೇತ್ರದ ಮೌಲ್ಯ ಸರಪಳಿಯನ್ನು ಬಲಪಡಿಸುತ್ತದೆ.