ಕಾಶ್ಮೀರ: ಉತ್ತಮ ಫಲಿತಾಂಶ ನೀಡುತ್ತಿದೆ ಭಾರತೀಯ ಸೇನೆಯ ʼಸಹಿ ರಾಸ್ತಾʼ

ನವದೆಹಲಿ: ಭಾರತೀಯ ಸೇನೆಯು ಜಮ್ಮು ಮತ್ತು ಕಾಶ್ಮೀರದ ಸ್ಥಳೀಯ ಯುವಕರಿಗಾಗಿ ಕೈಗೊಂಡಿರುವ “ಸಹಿ ರಾಸ್ತಾ” ಎಂಬ ಉಪಕ್ರಮವು ಸಕಾರಾತ್ಮಕ ಫಲಿತಾಂಶಗಳನ್ನು ನೀಡುತ್ತಿದೆ. ಕಣಿವೆಯ 130 ಕ್ಕೂ ಹೆಚ್ಚು ಯುವಕರು 21 ದಿನಗಳ ಕಾಲ ನಡೆದ ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದಾರೆ.

ಕಣಿವೆ ಆಡಳಿತದ ಸಹಯೋಗದೊಂದಿಗೆ ಸೇನೆಯ ‘ಸಾಹಿ ರಾಸ್ತಾ’ ಉಪಕ್ರಮವವನ್ನು ಹಮ್ಮಿಕೊಂಡಿದ್ದು, ಇದು ದಾರಿತಪ್ಪಿದ ಯುವಕರನ್ನು ಸಾಮಾನ್ಯ ಜೀವನಕ್ಕೆ ಮರಳಿ ತರಲು ಮತ್ತು ಅವರ ಉಜ್ವಲ ಭವಿಷ್ಯಕ್ಕಾಗಿ ಅವಕಾಶಗಳನ್ನು ಒದಗಿಸುವ ಗುರಿಯನ್ನು ಹೊಂದಿದೆ. ಪರಿಣಿತ ಮಾರ್ಗದರ್ಶಕರೊಂದಿಗೆ ಸಂವಹನ ಮತ್ತು ಸಮಾಲೋಚನೆಯ ಮೂಲಕ ಅವರಲ್ಲಿನ ತಪ್ಪು ಕಲ್ಪನೆಗಳನ್ನು ದೂರ ಮಾಡುವ ಪ್ರಯತ್ನ ಮಾಡುತ್ತದೆ.

ವರದಿಯ ಪ್ರಕಾರ, 16-25 ವರ್ಷ ವಯಸ್ಸಿನ ಸುಮಾರು 25 ಯುವಕರ ಆರು ಬ್ಯಾಚ್‌ಗಳಲ್ಲಿ ಈ ಉಪಕ್ರಮದಲ್ಲಿ ಇದುವರೆಗೆ ಭಾಗವಹಿಸಿದ್ದಾರೆ. ಸಹಿ ರಾಸ್ತಾ ಉಪಕ್ರಮವು ವ್ಯಕ್ತಿತ್ವ ಮತ್ತು ಕೌಶಲ್ಯ ಅಭಿವೃದ್ಧಿ ಕಾರ್ಯಕ್ರಮವಾಗಿದೆ. ನೋಂದಣಿಯ ನಂತರ, ಭಾಗವಹಿಸುವವರಿಗೆ ಜೀವನದ ಬಗ್ಗೆ ಪಾಠಗಳನ್ನು ಕಲಿಸಲಾಗುತ್ತದೆ. ಅವರಿಗೆ ಪೊಲೀಸ್, ಭದ್ರತೆ ಮತ್ತು ಕೈಗಾರಿಕಾ ವಲಯಕ್ಕೆ ಸೇರಿದ ತಜ್ಞರೊಂದಿಗೆ ಸಂವಹನ ನಡೆಸುವ ಅವಕಾಶ ಸಿಗಲಿದೆ.

ಅವರಿಗೆ ಕಾಶ್ಮೀರದ ಇತಿಹಾಸ ಮತ್ತು ನೈತಿಕತೆಯ ಬಗ್ಗೆಯೂ ಕಲಿಸಲಾಗುತ್ತದೆ. ಭಾರತೀಯ ಸೇನೆಯ ಅಧಿಕಾರಿಗಳ ಪ್ರಕಾರ, ಈ ಉಪಕ್ರಮವು ಸ್ಥಳೀಯರ ವಿಶ್ವಾಸವನ್ನು ಗಳಿಸುತ್ತಿದೆ. ಅವರು ಅದನ್ನು ಪ್ರಶಂಸಿಸುತ್ತಿದ್ದಾರೆ. ಭಾಗವಹಿಸುವವರು ಡಿ-ರಾಡಿಕಲೈಸೇಶನ್‌ನ ಗಮನಾರ್ಹ ಲಕ್ಷಣಗಳನ್ನು ತೋರಿಸಿದ್ದಾರೆ.

ಕಣಿವೆಯಲ್ಲಿ ಭಯೋತ್ಪಾದನೆಯನ್ನು ಎದುರಿಸಲು ಭದ್ರತಾ ಪಡೆಗಳು ತಮ್ಮ ಕಾರ್ಯತಂತ್ರವನ್ನು ಬದಲಾಯಿಸಿದ್ದು, ಮೂಲಭೂತವಾದದ ಮೂಲವನ್ನು ತೊಡೆದುಹಾಕುವತ್ತ ಗಮನಹರಿಸುತ್ತಿದ್ದಾರೆ. ಈ ಹಿಂದೆ ಭಯೋತ್ಪಾದಕರನ್ನು ನಿರ್ಮೂಲನೆ ಮಾಡುವುದು ಅವರ ತಂತ್ರವಾಗಿತ್ತು ಮತ್ತು ಈಗ ಭಯೋತ್ಪಾದಕ ಸಂಘಟನೆಗಳಿಂದ ತೀವ್ರಗಾಮಿಯಾಗಿರುವ ಈ ಯುವಕರಲ್ಲಿ ಬದಲಾವಣೆ ತರುವ ಪ್ರಯತ್ನ ನಡೆಯುತ್ತಿದೆ.

ಈ ಉಪಕ್ರಮದಲ್ಲಿ ಭಾಗವಹಿಸಿದ ಕೆಲವರು ಅಗ್ನಿಪಥ್ ನೇಮಕಾತಿ ಡ್ರೈವ್‌ಗಳಿಗೆ ಹಾಜರಾಗಲು ಪ್ರಾರಂಭಿಸಿದ್ದಾರೆ ಎಂದು ಭಾರತೀಯ ಸೇನೆ ತಿಳಿಸಿದೆ.