ಅಸ್ಸಾಂ ಬುಡಕಟ್ಟು ಮತ್ತು ಚಹಾ ತೋಟ ಕಾರ್ಮಿಕರ ನಡುವಣ ಸಮಸ್ಯೆ ಅಂತ್ಯ

ನವದೆಹಲಿ: ಅಸ್ಸಾಂನಲ್ಲಿ ಬುಡಕಟ್ಟು ಜನಾಂಗದವರ ಮತ್ತು ಚಹಾ ತೋಟ ಕಾರ್ಮಿಕರ ದಶಕದ ಹಿಂದಿನ ಬಿಕ್ಕಟ್ಟನ್ನು ಕೊನೆಗೊಳಿಸುವ ಶಾಂತಿ ಒಪ್ಪಂದಕ್ಕೆ ನಿನ್ನೆ ಸಹಿ ಹಾಕಲಾಗಿದೆ.

ಕೇಂದ್ರ, ಅಸ್ಸಾಂ ಸರ್ಕಾರ ಮತ್ತು ಅಸ್ಸಾಂನ ಎಂಟು ಬುಡಕಟ್ಟು ಗುಂಪುಗಳ ನಡುವೆ ತ್ರಿಪಕ್ಷೀಯ ಶಾಂತಿ ಒಪ್ಪಂದ ನಡೆದಿದೆ. ಈ ಮೂಲಕ ಆದಿವಾಸಿಗಳು ಮತ್ತು ಚಹಾ ತೋಟದ ಕಾರ್ಮಿಕರ ದಶಕದ ಹಿಂದಿನ ಬಿಕ್ಕಟ್ಟನ್ನು ಕೊನೆಗೊಳಿಸಲಾಗಿದೆ.

ಒಪ್ಪಂದಕ್ಕೆ ಸಹಿ ಹಾಕಿದ ಬುಡಕಟ್ಟು ಗುಂಪುಗಳಲ್ಲಿ ಬಿರ್ಸಾ ಕಮಾಂಡೋ ಫೋರ್ಸ್, ಆದಿವಾಸಿ ಪೀಪಲ್ಸ್ ಆರ್ಮಿ, ಆಲ್ ಆದಿವಾಸಿ ನ್ಯಾಷನಲ್ ಲಿಬರೇಶನ್ ಆರ್ಮಿ, ಅಸ್ಸಾಂನ ಆದಿವಾಸಿ ಕೋಬ್ರಾ ಮಿಲಿಟರಿ ಮತ್ತು ಸಂತಾಲ್ ಟೈಗರ್ ಫೋರ್ಸ್ ಸೇರಿವೆ.

ನಿನ್ನೆ ನವದೆಹಲಿಯಲ್ಲಿ ಕೇಂದ್ರ ಗೃಹ ಸಚಿವ ಅಮಿತ್ ಶಾ ಅವರು ಒಪ್ಪಂದಕ್ಕೆ ಸಹಿ ಹಾಕಿದರು. ಈಶಾನ್ಯ ಪ್ರದೇಶಕ್ಕೆ ಇದೊಂದು ಐತಿಹಾಸಿಕ ದಿನ ಎಂದು ಹೇಳಿದ  ಶಾ, ಪ್ರಧಾನಿ ನರೇಂದ್ರ ಮೋದಿಯವರ ನೇತೃತ್ವದಲ್ಲಿ ಈಶಾನ್ಯದಲ್ಲಿ ಶಾಂತಿ ಮತ್ತು ಅಭಿವೃದ್ಧಿಯನ್ನು ಖಚಿತಪಡಿಸಿಕೊಳ್ಳಲು ಹಲವಾರು ಕ್ರಮಗಳನ್ನು ತೆಗೆದುಕೊಳ್ಳಲಾಗಿದೆ ಎಂದು ಹೇಳಿದರು.

2024 ರ ವೇಳೆಗೆ ಈಶಾನ್ಯ ರಾಜ್ಯಗಳ ನಡುವಿನ ಎಲ್ಲಾ ಗಡಿ ವಿವಾದಗಳು ಮತ್ತು ಸಶಸ್ತ್ರ ಗುಂಪುಗಳಿಗೆ ಸಂಬಂಧಿಸಿದ ಎಲ್ಲಾ ವಿವಾದಗಳನ್ನು ಪರಿಹರಿಸಲು ಕೇಂದ್ರವು ಬದ್ಧವಾಗಿದೆ ಎಂದಿದ್ದಾರೆ.

ಒಪ್ಪಂದದಡಿ, 1,182 ಶಸ್ತ್ರಸಜ್ಜಿತ ಕೇಡರ್‌ಗಳು ಹಿಂಸೆ ತೊರೆಯಲು ನಿರ್ಧರಿಸಿವೆ. ಶಸ್ತ್ರಸಜ್ಜಿತ ಕೇಡರ್‌ಗಳ ಪುನರ್ವಸತಿ ಮತ್ತು ಜೀವನೋಪಾಯಕ್ಕೆ ಸರ್ಕಾರ ಕ್ರಮ ಕೈಗೊಳ್ಳಲಿದೆ. ಚಹಾ ತೋಟ ಕಾರ್ಮಿಕರ ಕಲ್ಯಾಣಕ್ಕಾಗಿಯೂ ಕ್ರಮಗಳನ್ನು ತೆಗೆದುಕೊಳ್ಳಲಿದೆ. ಐದು ವರ್ಷಗಳ ಅವಧಿಗೆ 1000 ಕೋಟಿ ರೂಪಾಯಿಗಳ ವಿಶೇಷ ಅಭಿವೃದ್ಧಿ ಪ್ಯಾಕೇಜ್ ಒದಗಿಸಲಾಗುತ್ತಿದೆ. ಅಸ್ಸಾಂ ಸರ್ಕಾರದ ವತಿಯಿಂದ ಆದಿವಾಸಿ ಕಲ್ಯಾಣ ಮತ್ತು ಅಭಿವೃದ್ಧಿ ಸಮಿತಿಯನ್ನು ರಚನೆ ಮಾಡಲಾಗುತ್ತದೆ.