ಯುಎನ್‌ ಭದ್ರತಾ ಮಂಡಳಿ ಖಾಯಂ ಸದಸ್ಯ ಸ್ಥಾನಕ್ಕೆ ಭಾರತ ಪ್ರಬಲ ಅರ್ಹತೆ ಹೊಂದಿದೆ: ಜೈಶಂಕರ್

ನವದೆಹಲಿ: ಭಾರತವು ವಿಶ್ವಸಂಸ್ಥೆಯ ಭದ್ರತಾ ಮಂಡಳಿಯ ಖಾಯಂ ಸದಸ್ಯನಾಗುವ ಪ್ರಬಲ ಅರ್ಹತೆಯನ್ನು ಹೊಂದಿದೆ. ಯುಎನ್‌ನ ಪ್ರಮುಖ ಅಂಗವು ವಿಕಸನಗೊಳ್ಳುತ್ತಿರುವ ಜಾಗತಿಕ ಪರಿಸ್ಥಿತಿಗಳಿಗೆ ಹೊಂದಿಕೊಳ್ಳಬೇಕು, ಅಂತರರಾಷ್ಟ್ರೀಯ ಭದ್ರತೆಯನ್ನು ಕಾಪಾಡಿಕೊಳ್ಳುವ ಉದ್ದೇಶಗಳನ್ನು ಪೂರೈಸಲು ಮಾತ್ರವಲ್ಲದೆ ಪ್ರಸ್ತುತವಾಗಿಯೂ ಉಳಿಯಬೇಕು ಎಂದು ವಿದೇಶಾಂಗ ಸಚಿವ ಎಸ್ ಜೈಶಂಕರ್ ಹೇಳಿದ್ದಾರೆ.

 ಸೌದಿ ಅರೇಬಿಯಾ ಪ್ರವಾಸದ ವೇಳೆ ಅವರು ಈ ಹೇಳಿಕೆಯನ್ನು ನೀಡಿದ್ದಾರೆ.

21ನೇ ಶತಮಾನದ ಭೌಗೋಳಿಕ-ರಾಜಕೀಯ ವಾಸ್ತವಗಳನ್ನು ಪ್ರಸ್ತುತ ರೂಪದಲ್ಲಿ ಪ್ರತಿನಿಧಿಸದೇ ಇರುವ ಭದ್ರತಾ ಮಂಡಳಿಯ ಖಾಯಂ ಸದಸ್ಯ ಸ್ಥಾನ ಭಾರತಕ್ಕೆ ಸಿಗಬೇಕಿದೆ. ಇದಕ್ಕೆ ಭಾರತ ಸೂಕ್ತವಾಗಿ ಅರ್ಹವಾಗಿದೆ ಎಂದ ಅವರು, ಭದ್ರತಾ ಮಂಡಳಿಯನ್ನು ಸುಧಾರಿಸುವ ಹಲವು ವರ್ಷಗಳ ಪ್ರಯತ್ನಗಳಲ್ಲಿ ಭಾರತವು ಮುಂಚೂಣಿಯಲ್ಲಿದೆ ಎಂದಿದ್ದಾರೆ.

ಮಂಡಳಿಯನ್ನು ಸುಧಾರಿಸುವ ಅಗತ್ಯತೆಯ ಬಗ್ಗೆ ವಿಶಾಲವಾದ ಜಾಗತಿಕ ಒಮ್ಮತವಿದೆ. ಪ್ರಸ್ತುತ ಇದು ಪ್ರಪಂಚದ ನೈಜತೆಯನ್ನು ಪ್ರತಿಬಿಂಬಿಸುವುದಿಲ್ಲ, ವಿಸ್ತರಿತ ಮಂಡಳಿಯು ಭಾರತದ ಪರವಾಗಿ ಮಾತ್ರವಲ್ಲ, ಇತರ ಪ್ರತಿನಿಧಿಸದ ಕ್ಷೇತ್ರಗಳ ಪರವಾಗಿಯೂ ಇರಲಿದೆ ಎಂದು ಪ್ರತಿಪಾದಿಸಿದರು.

“ಭಾರತವು ಅತಿದೊಡ್ಡ ಪ್ರಜಾಪ್ರಭುತ್ವ, ಐದನೇ ಅತಿದೊಡ್ಡ ಆರ್ಥಿಕತೆ, ಪರಮಾಣು ಶಕ್ತಿ, ತಾಂತ್ರಿಕ ಕೇಂದ್ರ ಮತ್ತು ಜಾಗತಿಕ ತೊಡಗಿಸಿಕೊಳ್ಳುವಿಕೆಯ ಸಂಪ್ರದಾಯವಾಗಿ ಭದ್ರತಾ ಮಂಡಳಿಯ ಖಾಯಂ ಸದಸ್ಯನಾಗಲು ಪ್ರಬಲವಾದ ಅರ್ಹತೆಯನ್ನು ಹೊಂದಿದೆ. ಕೌನ್ಸಿಲ್ ವಿಕಸನಗೊಳ್ಳುತ್ತಿರುವ ಜಾಗತಿಕ ಪರಿಸ್ಥಿತಿಗಳಿಗೆ ಹೊಂದಿಕೊಳ್ಳಬೇಕು, ಅಂತರಾಷ್ಟ್ರೀಯ ಭದ್ರತೆಯನ್ನು ಕಾಪಾಡಿಕೊಳ್ಳುವ ತನ್ನ ಉದ್ದೇಶಗಳನ್ನು ಪೂರೈಸಲು ಮಾತ್ರವಲ್ಲದೆ ಪ್ರಸ್ತುತವಾಗಿಯೂ ಉಳಿಯಬೇಕು” ಎಂದಿದ್ದಾರೆ.

ಉಭಯ ದೇಶಗಳ ನಡುವಿನ ಸಂಬಂಧವನ್ನು ಮತ್ತಷ್ಟು ಬಲಪಡಿಸುವ ಮಾರ್ಗಗಳ ಕುರಿತು ಚರ್ಚಿಸಲು ಜೈಶಂಕರ್ ಅವರು ಮೂರು ದಿನಗಳ ಭೇಟಿಗಾಗಿ ಶನಿವಾರ ಸೌದಿ ಅರೇಬಿಯಾಕ್ಕೆ ಆಗಮಿಸಿದರು. ವಿದೇಶಾಂಗ ಸಚಿವರಾಗಿ ಸೌದಿ ಅರೇಬಿಯಾಕ್ಕೆ ಇದು ಅವರ ಮೊದಲ ಭೇಟಿಯಾಗಿದೆ.