ಮೋದಿಯೊಂದಿಗೆ ಮಾತು ಸೋನಿಯಾ ಇಂದು ಮನೆಮಾತು

ಪಣಜಿ: ಶಿಕ್ಷಕರ ದಿನಾಚರಣೆಯ ಅಂಗವಾಗಿ ನಡೆದ ಸಂವಾದ ಕಾರ್ಯಕ್ರಮದಲ್ಲಿ ಪ್ರಧಾನಿ ನರೇಂದ್ರ ಮೋದಿಯವರನ್ನು ಪ್ರಶ್ನಿಸುವ ಅವಕಾಶವನ್ನು ಪಡೆದ ಗೋವಾದ ಒಲಿಂಪಿಕ್ ಬಂಗಾರ ವಿಜೇತೆ ಸೋನಿಯಾ ಎಲ್ಲಪ್ಪಾ ಪಾಟೀಲ್‌ಗೆ ಈಗಲೂ ತಾನು ಪ್ರಶ್ನಿಸಿದ್ದು ಪ್ರಧಾನಿಯನ್ನು ಎಂಬುದು ತಿಳಿದಿಲ್ಲ.

ಹೌದು, ಬೌದ್ಧಿಕ ವಿಕಲಚೇತನೆಯಾಗಿರುವ 16 ವರ್ಷದ ಸೋನಿಯಾ ಮೋದಿಗೆ ಪ್ರಶ್ನೆ ಕೇಳಿದ್ದಾಳೆ, ಅಷ್ಟೇ ಅಲ್ಲ ಅವರು ಕೇಳಿದ ಪ್ರಶ್ನೆಗೂ ಸಮರ್ಥ ಉತ್ತರ ನೀಡಿದ್ದಾಳೆ. ಆಕೆಯ ಈ ಸಾಧನೆಗೆ ಗೆಳೆಯ ಗೆಳತಿಯರು, ಶಿಕ್ಷಕರು ಎಲ್ಲರೂ ಪ್ರಶಂಸೆಯ ಸುರಿಮಳೆಗೈಯುತ್ತಿದ್ದಾರೆ. ಆದರೆ ಆಕೆಗೆ ಮಾತ್ರ ತಾನು ವಿಡಿಯೋ ಕಾನ್ಫರೆನ್ಸ್‌ನಲ್ಲಿ ಮಾತನಾಡಿದ ಗಡ್ಡಧಾರಿ ನಗುಮುಖದ  ಮನುಷ್ಯ ಯಾರೆಂದು ತಿಳಿದಿಲ್ಲ. ಆಕೆಗೆ ಅವರು ದೇಶದ ಒಬ್ಬ ಮಂತ್ರಿ ಎಂಬುದಷ್ಟೇ ತಿಳಿದಿದೆ.

‘ನಾನು ಮಂತ್ರಿಯೊಂದಿಗೆ ಮಾತನಾಡಿದೆ, ’ನೀನು ದೇಶಕ್ಕೆ ಏನು ತಂದೆ?’ ಎಂದು ಕೇಳಿದರು, ’ನಾನು ಪದಕ ತಂದಿದ್ದೇನೆ’ ಎಂದು ಹೇಳಿದೆ. ನಾನು ಅವರೊಂದಿಗೆ ಮಾತನಾಡುವುದನ್ನು ನನ್ನ ಶಾಲೆಯಲ್ಲಿರುವ ಎಲ್ಲರೂ ನೋಡಿದರು. ಅವರೆಲ್ಲಾ ನನಗೆ ಅಭಿನಂದನೆ ಹೇಳಿದರು’ ಎಂದು ಮಾಧ್ಯಮದವರು ಕೇಳಿದ ಪ್ರಶ್ನೆಗೆ ಅವಳು ಉತ್ತರಿಸಿದ್ದಾಳೆ.

ಬೌದ್ಧಿಕವಾಗಿ ವಿಕಲಚೇತನಳಾಗಿರುವ ಸೋನಿಯಾಳನ್ನು ಮೋದಿಯ ಸಂವಾದ ಕಾರ್ಯಕ್ರಮಕ್ಕೆ ಸಿದ್ಧಳಾಗುವಂತೆ ಮಾಡುವುದು ಶಿಕ್ಷಕರಿಗೆ ಸವಾಲೆ ಆಗಿತ್ತು. ತರಬೇತಿ ನೀಡುವ ವೇಳೆ ಆಕೆ ಆತ್ವವಿಶ್ವಾಸವನ್ನೇ ಕಳೆದುಕೊಂಡಿದ್ದಳು. ಆದರೆ ವಿಡಿಯೋ ಕಾನ್ಫರೆನ್ಸ್‌ನಲ್ಲಿ ಮೋದಿ ಮಾತನಾಡಿದಾಗ ಆಕೆ ಅವರೊಂದಿಗೆ ಉತ್ತಮವಾಗಿ ನಮ್ಮ ನಿರೀಕ್ಷೆಗೂ ಮೀರಿ ಸ್ಪಂದಿಸಿದ್ದಾಳೆ. ಸುಲಲಿತವಾಗಿ ಅವರನ್ನು ಪ್ರಶ್ನಿಸಿದ್ದಾಳೆ. ಇದೆಲ್ಲಾ ನಮಗೆ ಹೆಮ್ಮೆ ತಂದಿದೆ ಎಂದು ಶಿಕ್ಷಕರು ಹೇಳಿಕೊಂಡಿದ್ದಾರೆ.

ವಿವಿಧ ಕ್ಷೇತ್ರದಲ್ಲಿ ಸಾಧನೆ ಮಾಡಿದ ದೇಶದ 10 ವಿದ್ಯಾರ್ಥಿಗಳೊಂದಿಗೆ ಮೋದಿ ಸಂವಾದ ನಡೆಸಿದ್ದಾರೆ. ಅದರಲ್ಲಿ ಸೋನಿಯಾ ಕೂಡ ಒಬ್ಬಳು. ಮಕ್ಕಳೊಂದಿಗೆ ಮಕ್ಕಳಂತೆಯೇ ಮಾತನಾಡಿದ ಮೋದಿ ಮಕ್ಕಳನ್ನು ಕೊಂಚವೂ ಗೊಂದಲಕ್ಕೀಡು ಮಾಡದೆ ಸಾಮಾನ್ಯನಂತೆ ಸಂವಾದಿಸಿದರು. ಇದು ಮಕ್ಕಳ ಆತ್ಮವಿಶ್ವಾಸವನ್ನು ಇಮ್ಮಡಿಗೊಳಿಸಿತ್ತು.