ಭುವನೇಶ್ವರ: ತನ್ನ ಐಟಿ ಉದ್ಯೋಗಕ್ಕೆ ವಿದಾಯ ಹೇಳಿ ಹಳ್ಳಿಗರ ಬದುಕು ರೂಪಿಸಿದ ಪಿ.ವಿ.ಭರತ್ ವಿನೀತ್ ಈಗ ಸಾಧಕರ ಸಾಲಿನಲ್ಲಿ ನಿಂತಿದ್ದಾರೆ. ಹಣದ ಹಿಂದೆ ಹೋಗದೆ ಸೇವೆಯ ಹಿಂದೆ ಹೋದ ಅವರು ಇಂದು ಆ ಹಳ್ಳಿ ಜನರ ಪಾಲಿಗೆ ಬದುಕು ನೀಡಿದ ಕರ್ಮಯೋಗಿ.
ಬೆಂಗಳೂರಿನ ಐಟಿ ಕಂಪನಿಯಲ್ಲಿ ಕೈ ತುಂಬಾ ಸಂಪಾದನೆ ಮಾಡುತ್ತಿದ್ದ ಭರತ್‌ಗೆ ಹಣ ಗಳಿಸುವ ಗುರಿಯಿರಲಿಲ್ಲ. ಜನ ಸೇವೆಯೇ ಅವರ ಮೂಲ ಉದ್ದೇಶವಾಗಿತ್ತು. ಹೀಗಾಗಿಯೇ ಅವರು ಆ ಉದ್ಯೋಗವನ್ನು ಬಿಟ್ಟು ಛತ್ತೀಸ್‌ಗಢದ ಆಸ್ಪತ್ರೆಯೊಂದರಲ್ಲಿ ಕೆಲಸಕ್ಕೆ ಸೇರಿಕೊಂಡರು. ಎಂಜಿನಿಯರಿಂಗ್, ಎಂಬಿಎ ಪದವಿ ಕೈಯಲ್ಲಿದ್ದರೂ ಸದಾ ಸಾಮಾಜಿಕ ಸೇವೆಯತ್ತ ಅವರ ಮನಸ್ಸು ತುಡಿಯುತ್ತಿತ್ತು. ೨೦೦೮ರಲ್ಲಿ ಟಾಟಾ ಜಾಗೃತಿ ಯಾತ್ರಾದಲ್ಲೂ ಅವರು ಭಾಗವಹಿಸಿದ್ದಾರೆ.
ತೊಂದರೆಯಲ್ಲಿದ್ದವರಿಗೆ ಸಹಾಯ ಮಾಡಬೇಕೆಂಬ ಅವರ ತುಡಿತ ಅವರನ್ನು ಒರಿಸ್ಸಾದ ಯೇಪೊರೆಯವರೆಗೂ ಕರೆ ತಂದಿತು. ಅಲ್ಲಿನ ಗ್ರಾಮಸ್ಥರೊಂದಿಗೆ ಸಂವಾದ ನಡೆಸಿದ ಅವರು ಆ ಹಳ್ಳಿಗರ ಬದುಕಿಗೆ ಪರ್ಯಾಯ ಮೂಲವನ್ನು ಕಂಡುಹಿಡಿಯುವ ಯೋಜನೆಗಳನ್ನು ರೂಪಿಸಿದರು.
ಅಲ್ಲಿ ಬಿದಿರಿನ ನೇಕಾರರೊಂದಿಗೆ, ಸ್ವಸಹಾಯ ಸಂಘಗಳ ಮಹಿಳೆಯರೊಂದಿಗೆ ಕೆಲಸ ಮಾಡಿದ ಅವರು, ಹೇ ಬಾಕ್ಸ್ (ಒಣ ಹುಲ್ಲು, ಬಿದಿರು ಮತ್ತು ಸೆಣಬಿನ ಚೀಲದಿಂದ ತಯಾರಿಸಿದ ರೈಸ್ ಕುಕ್ಕರ್)ಗೆ ಮಾರುಕಟ್ಟೆಯನ್ನು ಒದಗಿಸಿದರು. ಆಂಧ್ರಪ್ರದೇಶದಲ್ಲಿ ಎನ್‌ಜಿಓವೊಂದು ಈ ಉತ್ಪನ್ನ ತಯಾರಿಸುತ್ತಿತ್ತು. ಅಲ್ಲಿಂದ ಭರತ್ ಇದರ ಐಡಿಯಾವನ್ನು ಪಡೆದುಕೊಂಡರು. ಈ ಕುಕ್ಕರ್ ಇಂಧನವನ್ನು ಉಳಿತಾಯ ಮಾಡುತ್ತದೆ ಮಾತ್ರವಲ್ಲ, ಅನ್ನವನ್ನು ಆರು ಗಂಟೆಗಳ ಕಾಲ ಬಿಸಿಯಾಗಿಡುತ್ತದೆ.
ಇದೀಗ ಈ ರೈಸ್ ಕುಕ್ಕರ್‌ಗೆ ಮಾರುಕಟ್ಟೆಯಾಗಿದೆ, ಬಿದಿರಿನ ನೇಕಾರರು ಈಗಾಗಲೇ 44 ಕುಕ್ಕರ್‌ಗೆ ಆರ್ಡರ್ ಪಡೆದುಕೊಂಡಿದ್ದಾರೆ. ಇದರಿಂದಾಗಿ ಸಾಕಷ್ಟು ಸಂಪಾದನೆಯನ್ನೂ ಮಾಡುತ್ತಿದ್ದಾರೆ. ಇದೆಲ್ಲವೂ ಸಾಧ್ಯವಾಗಿದ್ದು ಭರತ್ ಅವರ ಪರಿಶ್ರಮದಿಂದ.
ಅಷ್ಟೇ ಅಲ್ಲದೇ ಶಾಲೆಗಳಲ್ಲಿ ತರಕಾರಿ ಗಾರ್ಡನ್ ನಿರ್ಮಿಸುವ ಅಭಿಯಾನವನ್ನು ಇವರು ಹಮ್ಮಿಕೊಂಡಿದ್ದಾರೆ. ಇದರಲ್ಲಿ ಬೆಳೆದ ತರಕಾರಿಗಳನ್ನು ಮಕ್ಕಳ ಬಿಸಿಯೂಟಕ್ಕೆ ಬಳಸಿಕೊಳ್ಳಲಾಗುತ್ತದೆ. ಶಾಲೆಯ ಸುತ್ತಮುತ್ತಲ ಖಾಲಿ ಜಾಗವನ್ನು ಪಡೆದುಕೊಂಡು ಅಲ್ಲಿ ತರಕಾರಿಯನ್ನು ಇವರು ಬೆಳೆಸುತ್ತಿದ್ದಾರೆ. ಇದರಿಂದಾಗಿ ಮಕ್ಕಳಿಗೆ ಉತ್ತಮ ಪೋಷಾಕಾಂಶಯುಕ್ತ ತರಕಾರಿಗಳು ಲಭ್ಯವಾಗುತ್ತಿದೆ.
ಒರಿಸ್ಸಾದ ಭಾಷೆ ಬಾರದ ಭರತ್ ಭಾಷಾಂತರಿಗಳ ಸಹಾಯದೊಂದಿಗೆ ಜನರ ಜೊತೆ ಸಂವಾದ ನಡೆಸುತ್ತಾರೆ. ಆರಂಭದಲ್ಲಿ ಜನರ ವಿಶ್ವಾಸ ಗಳಿಸುವುದು ಕಷ್ಟವಾದರೂ ಈಗ ಜನ ಅವರೊಂದಿಗೆ ಸಂಪೂರ್ಣವಾಗಿ ಬೆರೆಯುತ್ತಿದ್ದಾರೆ.
ಕೈತುಂಬಾ ಹಣ ನೀಡುವ ಉದ್ಯೋಗವನ್ನು ತೊರೆದು ಹಳ್ಳಿ ಜನರ ಬದುಕು ರೂಪಿಸಲು ಜೀವನ ಸವೆಸುತ್ತಿರುವ ಭರತ್ ಅವರಿಗೆ ನಮ್ಮದೊಂದು ಸೆಲ್ಯೂಟ್.
Admin
ಸಮಾಜದ ಉತ್ತಮ ಸುದ್ದಿಗಳನ್ನು ನಾವು ನಿಮ್ಮ ಮುಂದಿಡುವ ಪ್ರಯತ್ನವನ್ನು ಮಾಡುತ್ತಿದ್ದೇವೆ. ಪ್ರೋತ್ಸಾಹಿಸಿ, ಸ್ವೀಕರಿಸಿ. ನೀವು ಸ್ವೀಕರಿಸಿದಾಗ ನಾವು ಬೆಳೆಯಬಹುದು. ಒಳ್ಳೆಯ ಸುದ್ದಿಗಳಿಗೆ ಸಮಾಜ ತೆರೆದುಕೊಂಡಿದೆ ತಲುಪಿಸುವವರು ನಾವಾಗಬಾರದೇಕೆ?
ನ್ಯೂಸ್ 13 ಸಮಾಜದ ಧನಾತ್ಮಕ ಸುದ್ದಿಗಳನ್ನು ಹಾಗೂ ರಾಷ್ಟ್ರೀಯ ವಿಚಾರಗಳನ್ನು ನಿಮಗೆ ತಲುಪಿಸುವ ಪ್ರಯತ್ನ ಮಾಡುತ್ತದೆ. ಈ ರೀತಿ ಇನ್ನಷ್ಟು ಉತ್ತಮ ಸುದ್ದಿಗಳನ್ನು ತಲುಪಿಸಲು ನಿಮ್ಮ ಸಹಕಾರವನ್ನು ಅಪೇಕ್ಷಿಸುತ್ತಿದ್ದೇವೆ. ಈ ಕಾರ್ಯದಲ್ಲಿ ನೀವೂ ನಮ್ಮೊಂದಿಗೆ ಜೊತೆಯಾಗಿ.
News13 strives to publish and promote positive news/happenings and nationalistic thoughts. Join hands with us in this constructive cause. We hope and expect your co-operation in this objective of broadcasting news that shall keep up with quality journalism.
