ಯಕ್ಷಗಾನ ಕುಲಪತಿ ದಿ. ಕೀರಿಕ್ಕಾಡು ಮಾಸ್ತರ್ ವಿಷ್ಣು ಭಟ್ಟರ ಜನ್ಮ ಶತಮಾನೋತ್ಸವ ಸಂಸ್ಮರಣೆ

ಮಂಜೇಶ್ವರ: ಯಕ್ಷಗಾನ ಕುಲಪತಿ ದಿ. ಕೀರಿಕ್ಕಾಡು ಮಾಸ್ತರ್ ವಿಷ್ಣು ಭಟ್ಟರ ಜನ್ಮ ಶತಮಾನೋತ್ಸವ ಸಂಸ್ಮರಣೆ, ಪುರಸ್ಕಾರ ಪ್ರದಾನ, ಯಕ್ಷಗಾನ ಬಯಲಾಟವು ‘ವಿಶ್ವಾಸ್ ಆಡಿಟೋರಿಯಂ’ ತಲಪಾಡಿ ಯಲ್ಲಿ ಮಾ.31ರಂದು ನಡೆಯಿತು.

ಧರ್ಮದರ್ಶಿ ಹರಿಕೃಷ್ಣ ಪುನರೂರು ಅಧ್ಯಕ್ಷತೆ ವಹಿಸಿದ್ದರು.

ಖ್ಯಾತ ಕಲಾವಿದ, ವಿಮರ್ಶಕ ಪ್ರೊ. ಎಂ. ಎಲ್. ಸಾಮಗರಿಗೆ ಕೀರಿಕ್ಕಾಡು ಮಾಸ್ತರ್ ವಿಷ್ಣು ಭಟ್ಟರ ಜನ್ಮ ಶತಮಾನೋತ್ಸವ ಪುರಸ್ಕಾರವನ್ನು ಕಲಾವಿದ, ಕವಿ ಡಾ ರಮಾನಂದ ಬನಾರಿ ಮಂಜೇಶ್ವರ ರವರು ನೀಡಿ ಗೌರವಿಸಿದರು.

 ಶ್ರದ್ದೆಯಿಂದ ಕಲೆಯನ್ನು ಒಪ್ಪಿಕೊಂಡವರು . ಪರಿಪೂರ್ಣ ನಿಷ್ಠೆ ,ಅಭ್ಯಾಸ ,ಅಧ್ಯಯನ ದ ಮೂಲಕ ಪರಿಪಕ್ವತೆ ಗಳಿಸಿದವರು . ಯಕ್ಷಗಾನ ಅಕಾಡೆಮಿಗೆ ಅಕಾಡೆಮಿಕ್ ರೂಪ ಕೊಟ್ಟವರು. ಕಲೆಯ ಬೆಳವಣಿಗೆಗೆ ಅಪಾರ ಕೊಡುಗೆ ನೀಡುತ್ತಿರುವ ಸಾಮಗರು ವೃತ್ತಿ ಪ್ರವೃತ್ತಿಯಲ್ಲಿ ಆದರ್ಶ ಪ್ರಾಯರಾಗಿದ್ದಾರೆ ಎಂಬುದಾಗಿ ಕೀರಿಕ್ಕಾಡು ಅಭಿಮಾನಿ ಬಳಗದ ಪರವಾಗಿ ನುಡಿದರು.

ಕ. ಸ. ಪ. ಕೇರಳ ಘಟಕದ ಅಧ್ಯಕ್ಷ ಶ್ರೀ ಎಸ್. ವಿ. ಭಟ್ ಕೀರಿಕ್ಕಾಡು ಮಾಸ್ತರರು ಓರ್ವ ಪರಿಪೂರ್ಣ ಕಲಾವಿದ, ಸಾಹಿತಿ, ಯಕ್ಷ ಶಿಕ್ಷಣದ ಆರಂಭಗಾರ, ಕೃಷಿಕ, ವೈದ್ಯಕೀಯ ಹೀಗೆ ಅನೇಕ ಪ್ರತಿಭೆಗಳ ಸಂಗಮಕ್ಕೆ  ಉದಾಹರಣೆ ಎಂದು ಸಂಸ್ಮರಣೆಗೈದರು .

 ಬನಾರಿ ಗೋಪಾಲಕೃಷ್ಣ ಯಕ್ಷಗಾನ ಕಲಾ ಸಂಘದ ಸ್ಥಾಪಕ ದಿ . ಕೀರಿಕ್ಕಾಡು ಮಾಸ್ತರ್ ವಿಷ್ಣು ಭಟ್ಟರ ಕುರಿತು ಪ್ರೊ. ಎಂ. ಎಲ್. ಸಾಮಗರವರು ಆಂಗ್ಲ ಭಾಷೆಯಲ್ಲಿ ಬರೆದ ಕೃತಿ ”ಡೌನ್ ಮೆಮೊರಿ ಲೇನ್ ‘ಯನ್ನು ಶ್ರೀ ಪುನರೂರು ಬಿಡುಗಡೆ ಗೊಳಿಸಿದರು .

ಡಾ. ಮುರಳಿ ಮೋಹನ ಚೂಂತಾರು ,ಗೋಪಾಲ ಶೆಟ್ಟಿ ಅರಿಬೈಲು, ಉದ್ಯಾವರ ಮಾಡ ಸುಕುಮಾರ ಶೆಟ್ಟಿ, ಮುಂತಾದವರು ಮುಖ್ಯ ಅಥಿತಿಗಳಾಗಿ ಭಾಗವಹಿಸಿದರು ಶ್ರೀ ಸತೀಶ್ ಅಡಪ ಸ್ವಾಗತಿಸಿ ನಿರೂಪಿಸಿದರು. ನಾರಾಯಣ ಮಾಸ್ತರ್ ದೇಲಂಪಾಡಿ ಧನ್ಯವಾದ ನೀಡಿದರು .

ಕುಮಾರಿ ಶಾರ್ವರಿ ಜಪ್ಪುಡುಕುಕ್ಕು ಪ್ರಾರ್ಥನೆ ಗೈದಳು . ಮಾಸ್ತರರ ಪ್ರಸಿದ್ಧ ಕೃತಿ ‘ಓಂ ನಮಃ ಶಿವಾಯ ಶ್ವೇತ ಕುಮಾರ ಚರಿತ್ರೆ ಯಕ್ಷಗಾನ ಬಯಲಾಟವನ್ನು ಶ್ರೀ ಎಡನೀರು ಮೇಳದವರು ನಡೆಸಿಕೊಟ್ಟರು.