ಜುಲೈನಲ್ಲಿಯೂ ಘಮಘಮಿಸಲಿದೆ ‘ಅರ್ಕಾ ಸುಪ್ರಭಾತ’ ಮಾವಿನ ಸ್ವಾದ

ಬೆಂಗಳೂರು: ಮಾವಿನ ಹಣ್ಣು ಪ್ರಿಯರಿಗೆ ಅತ್ಯಂತ ಹಿತ ನೀಡುವ ತಿಂಗಳು ಎಪ್ರಿಲ್‌, ಮೇ. ಆದರೆ ಐಐಎಚ್‌ಆರ್ ನಲ್ಲಿ ಆವಿಷ್ಕಾರ ಮಾಡಲಾಗಿರುವ ಹೊಸ ತಳಿಯ ಅರ್ಕಾ ಸುಪ್ರಭಾತ ಮಾವು ಮಾತ್ರ ಕೊಂಚ ಭಿನ್ನ. ಎಲ್ಲಾ ಮಾವಿನ ತಿಂಗಳು ಸಾಮಾನ್ಯವಾಗಿ ಎಪ್ರಿಲ್‌, ಮೇ ತಿಂಗಳಿನಲ್ಲಿಯೇ ಹಣ್ಣಾದರೆ ಈ ಮಾವು ಮಾತ್ರ ಜುಲೈ ತಿಂಗಳಿನಲ್ಲಿ ಕೊಯ್ಲಿಗೆ ಬರುತ್ತದೆ. ಆ ಮೂಲಕ ಮೇ ಕಳೆದ ಮೇಲೂ ಮಾವು ಸವಿಯಬೇಕೆಂದು ಬಯಸಿದವರಿಗೆ ಸಿಹಿ ನೀಡಲಿದೆ ಅರ್ಕಾ ಸುಪ್ರಭಾತ ತಳಿ.

ಉಳಿದೆಲ್ಲಾ ಮಾವಿನ ತಳಿಗಳು ಪ್ರತಿ ವರ್ಷವೂ ಒಂದೇ ರೀತಿಯ ಫಸಲು ನೀಡುವುದು ಸಾಧ್ಯವಿಲ್ಲ. ಈ ಬಾರಿ ಬೆಳೆ ಕಡಿಮೆ ಇದ್ದರೆ ಮುಂದಿನ ಬಾರಿ ಉತ್ತಮ, ಮತ್ತೊಮ್ಮೆ ಕಡಿಮೆ ಹೀಗೆ ವೈಪರೀತ್ಯಗಳಾಗುತ್ತಲೇ ಇರುತ್ತದೆ. ಆದರೆ ಅರ್ಕಾ ಸುಪ್ರಭಾತ ಹಾಗಲ್ಲ. ಈ ನೂತನ ಕಸಿ ಮಾಡಿರುವ ಮಾವಿನ ತಳಿ ಪ್ರತಿ ವರ್ಷವೂ ಒಂದೇ ರೀತಿಯಾಗಿ ಫಸಲು ನೀಡಲಿವೆ. ಈ ಮಾವಿನ ಕೃಷಿ ಬೆಳೆಗಾರರಿಗೆ ನಿರಾಳತೆಯನ್ನು ನೀಡಲಿದೆ ಎಂದು ಐಐಎಚ್‌ಆರ್‌ ಮೂಲಗಳು ತಿಳಿಸಿವೆ.

ಈ ನೂತನ ಕಸಿ ಮಾವಿನ ಗಿಡಗಳು ಹೇಸರಘಟ್ಟದ ಐಐಎಚ್‌ಆರ್‌ ನಲ್ಲಿ ಲಭ್ಯವಿದ್ದು, ಒಂದು ಸಸಿಗೆ 70 ರೂ. ಗಳನ್ನು ನಿಗದಿ ಮಾಡಲಾಗಿದೆ. ನಾಲ್ಕು ಮೀ. ಅಂತರದಲ್ಲಿ ಒಂದೊಂದು ಸಸಿಯನ್ನು ನೆಡಬಹುದಾಗಿದ್ದು, ಈ ಸಸಿಗಳಿಗೆ ಗಿಡಗಳ ಸಾಂದ್ರತೆಗೆ ಒಗ್ಗಿಕೊಳ್ಳುವ ಗುಣವೂ ಇದೆ. ಇದು ತೇವಾಂಶ ಭರಿತ ಪ್ರದೇಶದ ಜೊತೆಗೆ, ಒಣ ಪ್ರದೇಶದಲ್ಲಿಯೂ ಬೆಳೆಯಲು ಪೂರಕವಾಗಿದೆ. ನಾಟಿ ಮಾಡಿದ ನಾಲ್ಕು ವರ್ಷಗಳಲ್ಲಿಯೇ ಈ ಮಾವು ಫಸಲು ನೀಡುತ್ತದೆ ಎಂದು ಸಂಸ್ಥೆ ಹೇಳಿದೆ. ಫಸಲು ಕೊಯ್ಲು ಮಾಡಿದ ಬಳಿಕ 10 ದಿನಗಳ ಕಾಲ ಈ ಮಾವಿನ ಹಣ್ಣುಗಳನ್ನು ಇರಿಸಿಕೊಳ್ಳಬಹುದಾಗಿದೆ.

ಈ ಮಾವು ಬಾದಾಮಿ ಮಾವಿನ ಹಣ್ಣಿನ ರುಚಿಯನ್ನೇ ಹೋಲುತ್ತದೆ. ತಿರುಳು ಸಹ ಬಾದಾಮಿ ಮಾವಿನ ಹಣ್ಣಿನ ತಿರುಳಿನಂತೆಯೇ ಇದೆ. ಒಂದು ಎಕರೆ ಪ್ರದೇಶದಲ್ಲಿ ಸುಮಾರು 400 ಅರ್ಕಾ ಸುಪ್ರಭಾತ ಗಿಡಗಳನ್ನು ಬೆಳೆಸಬಹುದಾಗಿದೆ ಎಂದು ತಜ್ಞರು ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.