ಉಡುಪಿ: ಸಾಧಿಸಲೇ ಬೇಕು ಎಂದು ಪಣ ತೊಟ್ಟು ಕೆಲಸ ಮಾಡುವವರಿಗೆ ಸವಾಲುಗಳು ಧೃತಿಗೆಡಿಸಲಾರವು ಎಂಬುದಕ್ಕೆ ಸಾಕ್ಷಿಯಾಗಿ ನಿಂತಿದ್ದಾರೆ ಉಡುಪಿಯ ಉಪ್ಪುಂದದ ಗಂಟಿಹೊಳೆ ನಿವಾಸಿ ವಿಖ್ಯಾತ ಶೆಟ್ಟಿ ಅವರು.
ಹುಟ್ಟಿನಿಂದಲೇ ಅಂಧರಾದರೂ, ಇದೀಗ ಬ್ರೈಲ್‌ ಲಿಪಿ ಬಳಕೆ ಮಾಡದೆ ಸ್ಕ್ರೈಬ್‌ ಬಳಸಿ ಸೆಟ್, ನೆಟ್‌ ಪರೀಕ್ಷೆಗಳನ್ನು ಒಂದೇ ಪ್ರಯತ್ನದಲ್ಲಿ ಉತ್ತಮ ಅಂಕಗಳನ್ನು ಪಡೆಯುವುದರ ಮೂಲಕ ಉತ್ತೀರ್ಣರಾಗಿದ್ದು, ಜೂನಿಯರ್‌ ರಿಸರ್ಚ್‌ ಫೆಲೋಶಿಪ್‌ ಪಡೆಯುವುದಕ್ಕೂ ಆಯ್ಕೆಯಾಗಿದ್ದಾರೆ.
ಎಳವೆಯಿಂದಲೇ ಓದಿನಲ್ಲಿ ಚುರುಕಾಗಿದ್ದ ವಿಖ್ಯಾತ್‌ ಉಪ್ಪುಂದದ ಶಿವರಾಮ್‌ ಶೆಟ್ಟಿ – ಸುಜಾತಾ ಶೆಟ್ಟಿ ದಂಪತಿ ಪುತ್ರ. 1-9 ರ ವರೆಗಿನ ತರಗತಿಗಳನ್ನು ಬ್ರೈಲ್‌ ಲಿಪಿಯ ಮೂಲಕವೇ ಪೂರ್ಣಗೊಳಿಸಿರುವ ಇವರು, 10 ನೇ ತರಗತಿಯಿಂದ ತೊಡಗಿದಂತೆ ಸ್ಕ್ರೈಬ್‌ ಮೂಲಕವೇ ಪರೀಕ್ಷೆಗಳನ್ನು ಬರೆಯುತ್ತಿದ್ದಾರೆ. ಮಂಗಳೂರು ವಿಶ್ವವಿದ್ಯಾಲಯದಲ್ಲಿ ಆಂಗ್ಲ ಭಾಷೆಯಲ್ಲಿ ಸ್ನಾತಕೋತ್ತರ ಪದವಿಯನ್ನೂ ವಿಖ್ಯಾತ ಅವರು ಉತ್ತಮ ಅಂಕಗಳ ಜೊತೆಗೆ ಪೂರ್ಣಗೊಳಿಸಿದ್ದಾರೆ. ಅದಾಗಿ ಇದೀಗ ಅವರು ರಾಜ್ಯ ಮತ್ತು ರಾಷ್ಟ್ರೀಯ ಉಪನ್ಯಾಸಕರ ಅರ್ಹತಾ ಪರೀಕ್ಷೆ ಸೆಟ್, ನೆಟ್‌ ಅನ್ನು ಸಹ ಒಂದೇ ಪ್ರಯತ್ನದಲ್ಲಿ ಸಂಪೂರ್ಣಗೊಳಿಸಿದ್ದಾರೆ. ನೆಟ್‌ ಪರೀಕ್ಷೆಯಲ್ಲಿ 95.80% ಅಂಕಗಳನ್ನು ಪಡೆದು ಜೆಆರ್‌ಎಫ್‌ ಗೂ ಆಯ್ಕೆಯಾಗಿದ್ದಾರೆ.
ಅಂತರ್ಜಾಲದ ಸಹಾಯದಿಂದ ಅಗತ್ಯ ಕಲಿಕಾ ಸಾಮಗ್ರಿಗಳ ಧ್ವನಿಮುದ್ರಣವನ್ನು ಡೌನ್ಲೋಡ್‌ ಮಾಡಿಕೊಂಡು, ಆನ್‌ಲೈನ್‌ ಆಡಿಯೋಗಳ ಸಹಾಯದಿಂದ ಈ ಸಾಧನೆಯನ್ನು ಮಾಡಿರುವ ಇವರು ಐಐಟಿ ಅಥವಾ ಕೇಂದ್ರೀಯ ವಿವಿಯಲ್ಲಿ ಪಿಎಚ್‌ಡಿ ಮಾಡುವ ಕನಸನ್ನು ಇರಿಸಿಕೊಂಡಿದ್ದಾರೆ. ಅದಾದ ಬಳಿಕ ಐಎಎಸ್‌ ಮಾಡುವ ಗುರಿಯನ್ನೂ ಇಟ್ಟುಕೊಂಡಿರುವುದಾಗಿ ತಿಳಿಸಿದ್ದಾರೆ.
ತಮ್ಮ ಪುತ್ರನ ಸಾಧನೆಯ ಬಗ್ಗೆ ಮಾತನಾಡಿರುವ ಶಿವರಾಮ್‌ ಶೆಟ್ಟಿ, ಆರಂಭದಲ್ಲಿ ಮಗನ ಅಂಧತ್ವದ ಕಾರಣದಿಂದ 8 ವರ್ಷಗಳ ವರೆಗೆ ಶಾಲೆಗೆ ಸೇರಿಸಿರಲಿಲ್ಲ. ಆದರೆ ಈ ಸಮಸ್ಯೆಯನ್ನು ಆತ ಮೆಟ್ಟಿ ನಿಲ್ಲಬೇಕಾದರೆ ಶಿಕ್ಷಣ ಅತ್ಯಗತ್ಯ ಎಂಬುದನ್ನು ಸ್ನೇಹಿತರೊಬ್ಬರು ಅರ್ಥ ಮಾಡಿಸಿ ಕೊಟ್ಟರು. ಬಳಿಕ ಆತನನ್ನು ಅಂಧರ ಶಾಲೆಗೆ ಸೇರಿಸಲಾಯಿತು. ಈಗ ನಮ್ಮ ಮಗನ ಸಾಧನೆ ನೋಡಿ ನಮಗೆ ಹೆಮ್ಮೆಯಾಗುತ್ತಿದೆ ಎಂದು ತಿಳಿಸಿದ್ದಾರೆ.
News13
ಸಮಾಜದ ಉತ್ತಮ ಸುದ್ದಿಗಳನ್ನು ನಾವು ನಿಮ್ಮ ಮುಂದಿಡುವ ಪ್ರಯತ್ನವನ್ನು ಮಾಡುತ್ತಿದ್ದೇವೆ. ಪ್ರೋತ್ಸಾಹಿಸಿ, ಸ್ವೀಕರಿಸಿ. ನೀವು ಸ್ವೀಕರಿಸಿದಾಗ ನಾವು ಬೆಳೆಯಬಹುದು. ಒಳ್ಳೆಯ ಸುದ್ದಿಗಳಿಗೆ ಸಮಾಜ ತೆರೆದುಕೊಂಡಿದೆ ತಲುಪಿಸುವವರು ನಾವಾಗಬಾರದೇಕೆ?
ನ್ಯೂಸ್ 13 ಸಮಾಜದ ಧನಾತ್ಮಕ ಸುದ್ದಿಗಳನ್ನು ಹಾಗೂ ರಾಷ್ಟ್ರೀಯ ವಿಚಾರಗಳನ್ನು ನಿಮಗೆ ತಲುಪಿಸುವ ಪ್ರಯತ್ನ ಮಾಡುತ್ತದೆ. ಈ ರೀತಿ ಇನ್ನಷ್ಟು ಉತ್ತಮ ಸುದ್ದಿಗಳನ್ನು ತಲುಪಿಸಲು ನಿಮ್ಮ ಸಹಕಾರವನ್ನು ಅಪೇಕ್ಷಿಸುತ್ತಿದ್ದೇವೆ. ಈ ಕಾರ್ಯದಲ್ಲಿ ನೀವೂ ನಮ್ಮೊಂದಿಗೆ ಜೊತೆಯಾಗಿ.
News13 strives to publish and promote positive news/happenings and nationalistic thoughts. Join hands with us in this constructive cause. We hope and expect your co-operation in this objective of broadcasting news that shall keep up with quality journalism.
