ತೆಲಂಗಾಣ: ಜಿಲ್ಲಾಧಿಕಾರಿ ಪರಿಶ್ರಮದಿಂದಾಗಿ ಅಂತರ್ಜಲ ಮಟ್ಟ 6 ಮೀಟರ್‌ ವೃದ್ಧಿಸಿತು

ಅಂತರ್ಜಲ ಸಂಪನ್ಮೂಲಗಳ ಅನಿಯಂತ್ರಿತ ಮತ್ತು ಅತಿಯಾದ ಶೋಷಣೆಯಿಂದಾಗಿ ಭಾರತದಲ್ಲಿ ಅಮೂಲ್ಯ ಜಲ ಮೂಲ ಬರಿದಾಗುತ್ತಿದೆ.

ನೀರಿನ ಮಟ್ಟ ಕುಸಿಯುತ್ತಿರುವುದು ಕೃಷಿ, ಕೈಗಾರಿಕೆಗಳು ಮತ್ತು ಕುಡಿಯುವ ನೀರಿನ ಅಗತ್ಯಗಳಿಗೆ ದೊಡ್ಡ ಮಟ್ಟದ ಏಟು ನೀಡುತ್ತಿದೆ. ಅಂತರ್ಜಲ ಮಟ್ಟವನ್ನು ಪುನರುಜ್ಜೀವನಗೊಳಿಸಲು ಸರ್ಕಾರ ಮತ್ತು ಸಂಘ ಸಂಸ್ಥೆಗಳು ಅನೇಕ ಪ್ರಯತ್ನಗಳನ್ನು ಮಾಡುತ್ತಲೇ ಬರುತ್ತಿವೆ. ವೈಯಕ್ತಿಕವಾಗಿ ಕೂಡ ಕೆಲವರು ಅಂತರ್ಜಲ ವೃದ್ಧಿಸುವ ಕಾರ್ಯವನ್ನು ಸದ್ದಿಲ್ಲದೆ ಮಾಡುತ್ತಾ ಬಂದಿದ್ದಾರೆ. ತೆಲಂಗಾಣ ರಾಜ್ಯದ ಜಿಲ್ಲಾಧಿಕಾರಿಯೊಬ್ಬರು ಆರು ಮೀಟರ್ ಅಂತರ್ಜಲ ಮಟ್ಟವನ್ನು ಹೆಚ್ಚಿಸುವಲ್ಲಿ ಯಶಸ್ವಿಯಾಗಿದ್ದಾರೆ ಎಂದರೆ ನಾವು ನಂಬಲೇ ಬೇಕು.

ದೇವರಕೊಂಡ ಕೃಷ್ಣ ಭಾಸ್ಕರ್ ಅವರು  2016 ರಲ್ಲಿ ತೆಲಂಗಾಣದ ರಾಜಣ್ಣ-ಸಿರ್ಸಿಲ್ಲಾ ಎಂಬ ಹೊಸ ಜಿಲ್ಲೆಯ ಮೊದಲ ಜಿಲ್ಲಾಧಿಕಾರಿಯಾದರು. ಅಲ್ಲಿಂದ ಈ ಪ್ರದೇಶದ ಅಂತರ್ಜಲದ ಸ್ವರೂಪ ಬದಲಾಯಿತು.

ಅಂತರ್ಜಲವನ್ನು ಪುನಃ ತುಂಬಿಸಲು  ಅವರು ಜಿಲ್ಲಾ ಆಡಳಿತಾಧಿಕಾರಿಯಾಗಿ ಸರ್ಕಾರಿ ಯೋಜನೆಗಳ ಪರಿಣಾಮಕಾರಿ ಅನುಷ್ಠಾನದೊಂದಿಗೆ ಅದ್ಭುತಗಳನ್ನೇ ಮಾಡಿದ್ದಾರೆ.

“ನೀರಿನ ಕೊರತೆ ಜಿಲ್ಲೆಗೆ ಎಂದಿಗೂ ಮುಗಿಯದ ವಿಷಯವಾಗಿದೆ. ಎಲ್ಲಾ ತಾಲ್ಲೂಕುಗಳು ಅಥವಾ ಮಂಡಲಗಳನ್ನು ಬರಪೀಡಿತ ಅಥವಾ ಅರೆ ಬರ ಪೀಡಿತ ವರ್ಗದಲ್ಲಿ ಲೇಬಲ್ ಮಾಡಲಾಗಿತ್ತು” ಎಂದು 36 ವರ್ಷದ ಕೃಷ್ಣ ಹೇಳುತ್ತಾರೆ. ತೀವ್ರ ನೀರಿನ ಕೊರತೆಯಿಂದಾಗಿ ಬೇಸಿಗೆಯ ಕಠಿಣ ದಿನಗಳಲ್ಲಿ ಬದುಕುವುದು ಕಷ್ಟಕರವಾಗಿತ್ತು ಎಂಬುದು ಅವರ ಅನುಭವದ ಮಾತು.

ಬಹು ಆಯಾಮದ ಯಶಸ್ಸು

“ನೀರಿನ ಸರಬರಾಜುಗಾಗಿ, ನೀರಿನ ಟ್ಯಾಂಕರ್‌ಗಳ ನಿರ್ಮಾಣಕ್ಕಾಗಿ ನೂರಾರು ಕುಂದುಕೊರತೆಗಳನ್ನು ನೀಗಿಸಲಾಯಿತು. ನೀರಿನ ಕೊರತೆಯನ್ನು ನಿಭಾಯಿಸಲು, ಆದ್ಯತೆಯ ಮೇರೆಗೆ ಅನೇಕ ಉಪಕ್ರಮಗಳನ್ನು ಪ್ರಾರಂಭಿಸಲಾಯಿತು, ”ಎಂದು ಕೃಷ್ಣ ಹೇಳುತ್ತಾರೆ.

ಟ್ಯಾಂಕ್‌ಗಳನ್ನು ನವೀಕರಿಸುವುದರಿಂದ ಹಿಡಿದು ಪೈಪ್ ನೀರಿನ ವ್ಯವಸ್ಥೆಯನ್ನು ಹೊಂದುವುದು, ಜಲಾಶಯಗಳಿಗಾಗಿ ಭೂಸ್ವಾಧೀನ, ನೀರು ಸಂಗ್ರಹಣಾ ಸ್ಥಳಗಳ ರಚನೆ, ಕಂದಕಗಳನ್ನು ಅಗೆಯುವುದು ಮತ್ತು ನೀರಿನ ಸಂಗ್ರಹಕ್ಕಾಗಿ ವ್ಯವಸ್ಥೆ ಮಾಡುವವರೆಗೆ ಜಿಲ್ಲೆಯ ಜಲಮೂಲಗಳಲ್ಲಿ ನೀರನ್ನು ಸಂರಕ್ಷಿಸುವ ಬೃಹತ್ ಕಾರ್ಯಕ್ಕೆ  ಚಾಲನೆ ನೀಡಲಾಯಿತು.

“ಕಳೆದ ಮೂರು ವರ್ಷಗಳಲ್ಲಿ, ಮಹಾತ್ಮ ಗಾಂಧಿ ರಾಷ್ಟ್ರೀಯ ಗ್ರಾಮೀಣ ಉದ್ಯೋಗ ಖಾತರಿ ಕಾಯ್ದೆ (ಮನ್ರೇಗಾ) ಯಂತಹ ಸರ್ಕಾರಿ ಯೋಜನೆಗಳನ್ನು ಪರಿಣಾಮಕಾರಿಯಾಗಿ ಅನುಷ್ಠಾನಗೊಳಿಸುವ ಮೂಲಕ ಮತ್ತು ಜಲಾಶಯಗಳನ್ನು ರಚಿಸುವ ಮೂಲಕ ಗಮನಾರ್ಹ ಪ್ರಗತಿಯನ್ನು ಸಾಧಿಸಲಾಗಿದೆ” ಎಂದು ಕೃಷ್ಣ ಹೇಳುತ್ತಾರೆ.

2012ರ ಬ್ಯಾಚ್‌ನ ಐಎಎಸ್ ಅಧಿಕಾರಿ ಆಗಿರುವ ಕೃಷ್ಣ ತಮ್ಮ ಉಪಕ್ರಮಗಳನ್ನು ವಿವರಿಸುತ್ತಾ, “ಕಾನೂನು ಸಮಸ್ಯೆಗಳಿಂದಾಗಿ ಯೋಜನೆಯು ಒಂದು ದಶಕಗಳವರೆಗೆ ಸ್ಥಗಿತಗೊಂಡ ನಂತರ 27 ಟಿಎಂಸಿ (ಸಾವಿರ ಮಿಲಿಯನ್ ಘನ ಅಡಿ) ಸಾಮರ್ಥ್ಯ ಹೊಂದಿರುವ ಶ್ರೀ ರಾಜರಾಜೇಶ್ವರ ಜಲಾಶಯವು ಕಾರ್ಯರೂಪಕ್ಕೆ ಬಂದಿತು. ಈ ಪ್ರಕ್ರಿಯೆಯಲ್ಲಿ, ಇದು ರಾಜ್ಯದ ಅತಿದೊಡ್ಡ ಜಲಾಶಯವಾಯಿತು. ಒಂದೂವರೆ ವರ್ಷದಲ್ಲಿ ಯೋಜನೆಯನ್ನು ಪೂರ್ಣಗೊಳಿಸಿದ ನಂತರ, ಅನ್ನಪೂರ್ಣ ಜಲಾಶಯದ ಕಾರ್ಯಾಚರಣೆಯೂ ಪ್ರಾರಂಭವಾಯಿತು.  ಮೇಲ್ ಮ್ಯಾನೈರ್ ಜಲಾಶಯದಲ್ಲಿ ಡೆಸಿಲ್ಟೇಶನ್ ಚಟುವಟಿಕೆಗಳನ್ನು ಕೈಗೊಳ್ಳುವುದು, ಸಣ್ಣ ಜಲಮೂಲಗಳು, ಕೊಳಗಳು ಮತ್ತು ನೀರಿನ ಟ್ಯಾಂಕ್‌ಗಳನ್ನು ಪುನರುಜ್ಜೀವನಗೊಳಿಸುವುದು ಸೂಕ್ಷ್ಮ ಮಟ್ಟದಲ್ಲಿ ತೆಗೆದುಕೊಂಡ ಇತರ ಕ್ರಮಗಳಾಗಿವೆ” ಎಂದು ಹೇಳುತ್ತಾರೆ.

ಅನೇಕ ಸಣ್ಣ ಟ್ಯಾಂಕ್‌ಗಳಿಗೆ ಡೆಸಿಲ್ಟೇಶನ್ ಮಾಡಲಾಗಿದೆ. “ಇಂತಹ ಸಣ್ಣ ಟ್ಯಾಂಕ್‌ಗಳು ಸ್ಥಳೀಯ ಜನಸಂಖ್ಯೆಯನ್ನು ಬೆಂಬಲಿಸಲು ಮತ್ತು ಉಳಿಸಿಕೊಳ್ಳಲು ಸಹಾಯ ಮಾಡಿದವು. ಕೆಲವು ನೀರಿನ ಟ್ಯಾಂಕ್‌ಗಳು ದಶಕಗಳ ನಂತರ ಪುನರುಜ್ಜೀವನಗೊಂಡಿವೆ ಮತ್ತು ಈಗ ಸ್ಥಳೀಯ ಸಮುದಾಯಗಳಿಂದ ನಿರ್ವಹಿಸಲ್ಪಡುತ್ತಿದೆ ಎಂದು ವರದಿಯಾಗಿದೆ ”ಎಂದು ಕೃಷ್ಣ ಹೇಳುತ್ತಾರೆ.

ಜಿಲ್ಲೆಯಾದ್ಯಂತ ಸುಮಾರು 699 ವಾಟರ್ ಟ್ಯಾಂಕ್‌ಗಳನ್ನು ಗುರುತಿಸಲಾಗಿದ್ದು, ಈ ಪೈಕಿ 450 ನೀರು ಈ ವರ್ಷ ಕಂಗೊಳಿಸುತ್ತಿದೆ. “ಗುಡಿ ಚೆರುವು ಎಂಬ ವಿಶಿಷ್ಟ ಉಪಕ್ರಮವನ್ನು ಕೈಗೊಳ್ಳಲಾಯಿತು, ಇದು ದೇವಾಲಯಗಳ ಒಳಗೆ ಟ್ಯಾಂಕ್‌ಗಳ ನೀರಿನ ಸಾಮರ್ಥ್ಯವನ್ನು ಹೆಚ್ಚಿಸಲು ಮತ್ತು ಸ್ಥಳೀಯ ಮಟ್ಟದಲ್ಲಿ ನೀರಿನ ಕೊರತೆಯನ್ನು ಕಡಿಮೆ ಮಾಡಲು ಭೂಮಿಯನ್ನು ಸ್ವಾಧೀನಪಡಿಸಿಕೊಳ್ಳುವುದನ್ನು ಒಳಗೊಂಡಿತ್ತು” ಎಂದು ಅವರು ಹೇಳುತ್ತಾರೆ.

ಮಿಷನ್ ಭಾಗೀರಥ ಎಂಬ ಯೋಜನೆಯ ಮೂಲಕ ಶುದ್ಧ ಕುಡಿಯುವ ನೀರು ಪ್ರತಿ ಕುಗ್ರಾಮವನ್ನು ತಲುಪುತ್ತದೆ ಎಂದು ಖಚಿತಪಡಿಸಿಕೊಳ್ಳಲಾಗಿದೆ ಎಂದು ಕೃಷ್ಣ ಹೇಳುತ್ತಾರೆ.

ಎಲ್ಲಾ ಹಂತಗಳಲ್ಲಿ ಅನೇಕ ವಿಧಾನಗಳೊಂದಿಗೆ, ಜಿಲ್ಲೆಯ ಅಂತರ್ಜಲ ಮಟ್ಟವು ಆರು ಮೀಟರ್ ಹೆಚ್ಚಾಗಿದೆ ಎಂದು ವರದಿಯಾಗಿದೆ. “12 ರಿಂದ 18 ತಿಂಗಳ ಅವಧಿಯಲ್ಲಿ ಮಟ್ಟಗಳು ಸ್ಥಿರವಾಗಿ ಏರಿತು. ಅಂಕಿಅಂಶಗಳನ್ನು ಅಂತರ್ಜಲ ಸಮೀಕ್ಷೆ ಅಧಿಕಾರಿಗಳು ದೃಢಪಡಿಸಿದ್ದಾರೆ ಮತ್ತು ದಾಖಲಿಸಿದ್ದಾರೆ. ಇದರ ಪರಿಣಾಮವಾಗಿ ಜಿಲ್ಲೆಯಲ್ಲಿ ಕೃಷಿ ಚಟುವಟಿಕೆಗಳು 150% ಹೆಚ್ಚಾಗಿದೆ” ಎಂದಿದ್ದಾರೆ.

ಸತತ ಮೂರು ವರ್ಷಗಳ ಕಾಲ ಜಾರಿಗೆ ತರಲಾದ ನೀರು ನಿರ್ವಹಣಾ ಕ್ರಮಗಳನ್ನು ಭಾರತ ಸರ್ಕಾರ ಗುರುತಿಸಿದೆ ಎಂದು ಅವರು ಹೇಳುತ್ತಾರೆ. ದೇಶದ ಸರ್ಕಾರಿ ನೌಕರರ ಪ್ರಧಾನ ತರಬೇತಿ ಸಂಸ್ಥೆಯಾದ ಮುಸ್ಸೂರಿಯ ಲಾಲ್ ಬಹದ್ದೂರ್ ಶಾಸ್ತ್ರಿ ಅಕಾಡೆಮಿ ಇದನ್ನು ಗಮನಿಸಿ ತಮ್ಮ ಪಠ್ಯಕ್ರಮದಲ್ಲಿ ಸೇರಿಸಿದೆ.

ಜವಾಬ್ದಾರಿಗಳಿಗೆ ಆದ್ಯತೆ ನೀಡುವುದರ ಮೂಲಕ ಮತ್ತು ಅವುಗಳನ್ನು ಪರಿಣಾಮಕಾರಿಯಾಗಿ ಪರಿಹರಿಸುವ ಮೂಲಕ ಮಾತ್ರ ಯಶಸ್ಸು ಸಾಧ್ಯ ಎಂದು ಕೃಷ್ಣ ಹೇಳುತ್ತಾರೆ.

“ಜಾರಿಗೆ ತಂದ ಎಲ್ಲಾ ಉಪಕ್ರಮಗಳು ಈಗಾಗಲೇ ಸರ್ಕಾರಿ ವ್ಯವಸ್ಥೆಯಲ್ಲಿ ಅಸ್ತಿತ್ವದಲ್ಲಿವೆ. ಹೊಸ ಜಿಲ್ಲೆಯಾಗಿರುವುದರಿಂದ, ಸಕ್ರಿಯವಾಗಿರಲು ಮತ್ತು ಸರಿಯಾದ ದಾಖಲೆ ತಲುಪಿಸಲು ಆಡಳಿತವು ಸಾಕಷ್ಟು ಒತ್ತಡಕ್ಕೆ ಒಳಗಾಯಿತು. ನಾವು ಮಾಡಿದ್ದು ಆ ಯೋಜನೆಗಳನ್ನು ತಳಮಟ್ಟದಲ್ಲಿ ಪರಿಣಾಮಕಾರಿಯಾಗಿ ಕಾರ್ಯಗತಗೊಳಿಸುವುದನ್ನು ಖಚಿತಪಡಿಸುವ ಕಾರ್ಯ ” ಎಂದು ಅವರು ಹೇಳುತ್ತಾರೆ.