ಕಾಶ್ಮೀರದ ಈ ಗ್ರಾಮ “ಭಾರತದ ಪೆನ್ಸಿಲ್ ಗ್ರಾಮ”

ನಮ್ಮ ಬಾಲ್ಯದ ನೆನಪು ಪೆನ್ಸಿಲ್ ಇಲ್ಲದೆ ಪೂರ್ಣಗೊಳ್ಳುವುದೇ ಇಲ್ಲ. ಶಾಲೆಯಲ್ಲಿ ಅಥವಾ ಮನೆಯಲ್ಲೇ ಇರಲಿ ಪುಸ್ತಕದಲ್ಲಿ ಪೆನ್ಸಿಲ್ ಮೂಲಕವೇ ನಾವು ಅಕ್ಷರಗಳನ್ನು ಮೂಡಿಸುತ್ತಿದ್ದೆವು. ಪೆನ್ಸಿಲ್ ಎಂಬುದು ಶಾಲೆಯ  ಸುಮಧುರ ನೆನಪಿನ ಒಂದು ಭಾಗವೇ ಆಗಿದೆ. ಆದರೆ ಈ ಪೆನ್ಸಿಲ್‌ಗಳ ಬಹುಪಾಲು ಕಚ್ಚಾ ವಸ್ತುಗಳು ಕಾಶ್ಮೀರದ ಪುಲ್ವಾಮಾ ಜಿಲ್ಲೆಯ ಸಾಧಾರಣ ವುಕ್ಹೂ ಗ್ರಾಮದಿಂದ ಬಂದವು ಎಂಬುದು ನಮಲ್ಲಿ ಬಹುತೇಕರಿಗೆ ಗೊತ್ತಿಲ್ಲ.

17 ಪೆನ್ಸಿಲ್‌ ವುಡ್ ಘಟಕಗಳನ್ನು  ಮತ್ತು 4,000 ಉದ್ಯೋಗಿಗಳನ್ನು ಹೊಂದಿರುವ ಗ್ರಾಮ ಭಾರತವನ್ನು ಆತ್ಮನಿರ್ಭರವಾಗಿಸಲು ಹೊಸ ಯಶೋಗಾಥೆಯನ್ನು ಬರೆಯುತ್ತಿದೆ.

“ಭಾರತದ ಪೆನ್ಸಿಲ್ ಗ್ರಾಮ” ಎಂದು ಜನಪ್ರಿಯವಾಗಿ ಕರೆಯಲ್ಪಡುವ ಈ ಗ್ರಾಮ ಪ್ರಧಾನಿ ಮೋದಿಯ ಇತ್ತೀಚಿನ ರೇಡಿಯೊ ಕಾರ್ಯಕ್ರಮವಾದ ಮನ್ ಕಿ ಬಾತ್‌ನಲ್ಲಿ ಸಹ ಉಲ್ಲೇಖವನ್ನು ಪಡೆದುಕೊಂಡಿದೆ, ಯಾಕೆಂದರೆ  ಕಳೆದ ಕೆಲವು ವರ್ಷಗಳಿಂದ ಈ ಗ್ರಾಮ ಭಾರತವು ಇತರ ರಾಷ್ಟ್ರಗಳಿಂದ ಪೆನ್ಸಿಲ್‌ಗಾಗಿ ವುಡ್‌ ಆಮದು ಮಾಡುವುದನ್ನು ಕಡಿಮೆ ಮಾಡಲು ಸಹಾಯ ಮಾಡಿದೆ.

“ಭಾರತವು ಚೀನಾ, ಶ್ರೀಲಂಕಾ ಮತ್ತು ಜರ್ಮನಿಯಿಂದ ಮರ ಮತ್ತು ಪೆನ್ಸಿಲ್ ಸ್ಲ್ಯಾಟ್‌ಗಳನ್ನು ಆಮದು ಮಾಡಿಕೊಳ್ಳುತ್ತಿತ್ತು, ಆದರೆ ಇತ್ತೀಚಿನ ವರ್ಷಗಳಲ್ಲಿ ಈ ಎಲ್ಲಾ ಸ್ಲ್ಯಾಟ್‌ಗಳನ್ನು ಭಾರತದಲ್ಲಿ ತಯಾರಿಸಲಾಗುತ್ತದೆ” ಎಂದು ಜೇಲಂ ಆಗ್ರೋ ಇಂಡಸ್ಟ್ರೀಸ್ ಮಾಲೀಕರಾದ ಮಂಜೂರ್ ಅಹ್ಮದ್ ಅಲ್ಲೆ ಹೇಳುತ್ತಾರೆ.

ಈ ಗ್ರಾಮದಲ್ಲಿ ತಯಾರಾಗುವ ಪೆನ್ಸಿಲ್ ಮರದ ಹಲಗೆಗಳನ್ನು ಭಾರತದ ಅತಿದೊಡ್ಡ ಪೆನ್ಸಿಲ್ ತಯಾರಕರಾದ ನಟರಾಜ್, ಅಪ್ಸರಾ ಮತ್ತು ಹಿಂದೂಸ್ತಾನ್ ಪೆನ್ಸಿಲ್‌ಗಳಿಗೆ ಸರಬರಾಜು ಮಾಡಲಾಗುತ್ತದೆ.‌

ಈ ಪೆನ್ಸಿಲ್‌ಗಳನ್ನು ಮುಖ್ಯವಾಗಿ ಪೋಪ್ಲಾರ್ ಮರಗಳಿಂದ ತಯಾರಿಸಲಾಗುತ್ತದೆ, ಇದು ವಿಶಿಷ್ಟ ಮರವಾಗಿದ್ದು,  ಪೆನ್ಸಿಲ್‌ಗಳನ್ನು ತಯಾರಿಸಲು ಸೂಕ್ತವಾಗಿರುತ್ತದೆ.

ತೇವಾಂಶವು ಸೂಕ್ತವಾಗಿರುವ ಕಾಶ್ಮೀರದ ಕಣಿವೆಗಳಲ್ಲಿ ಪೋಪ್ಲಾರ್ ಮರವು ಉತ್ತಮವಾಗಿ ಬೆಳೆಯುತ್ತದೆ, ಮತ್ತು ಹವಾಮಾನ ಪರಿಸ್ಥಿತಿಗಳು  ಬೆಳವಣಿಗೆಯ ಸಮಯದಲ್ಲಿ ಮರವು ಮೃದುವಾಗಿರಲು ಅನುವು ಮಾಡಿಕೊಡುತ್ತದೆ. ಪೋಪ್ಲಾರ್ ಅನ್ನು  ಬಯಲು ಪ್ರದೇಶಗಳು, ಕಣಿವೆ ಹೊಳೆಗಳು ಮತ್ತು ರಸ್ತೆಗಳ ಉದ್ದಕ್ಕೂ ಖಾಲಿ ಸ್ಥಳಗಳಲ್ಲಿ ಬೆಳೆಯಲಾಗುತ್ತದೆ.

ಮಂಜೂರ್ ಹೇಳುವಂತೆ, “1960 ರ ದಶಕದಲ್ಲಿ, ಪೆನ್ಸಿಲ್‌ಗೆ ಕಚ್ಛಾವಸ್ತುವಾಗಿ ಬಳಸುತ್ತಿದ್ದ ದಿಯೋದರ್  ಮರವನ್ನು ಸರ್ಕಾರವು ನಿಷೇಧಿಸಿತು. ಹೀಗಾಗಿ ಪೋಪ್ಲರ್ ಮರವು 1992-93ರಲ್ಲಿ ದಿಯೋದರ್ ಬದಲಿಗೆ ಪೆನ್ಸಿಲ್‌ನ ಕಚ್ಚಾ ವಸ್ತುವಾಗಿ ಬದಲಾಯಿತು”.

ಉದ್ಯಮ ಬೆಳೆದಂತೆ ದೇಶದ ಇತರ ಭಾಗಗಳಲ್ಲಿನ ತಯಾರಕರಿಗೆ ಮರದ ಹಲಗೆಗಳನ್ನು ಪೆನ್ಸಿಲ್‌ ತಯಾರಿಸಲು ಸರಬರಾಜು ಮಾಡಲಾಯಿತು.

1995 ರವರೆಗೆ ಹಲಗೆಗಳನ್ನು ಕತ್ತರಿಸಿ ದೊಡ್ಡ ಪ್ರಮಾಣದಲ್ಲಿ ಕಳುಹಿಸಲಾಯಿತು. ಅಂತಿಮವಾಗಿ, 2010 ರ ಹೊತ್ತಿಗೆ, ಮರದ ಹಲಗೆ‌ಗಳನ್ನು ಸಂಸ್ಕರಿಸಿ, ಸಣ್ಣ ಇಟ್ಟಿಗೆಗಳು ಮತ್ತು ಬ್ಲಾಕ್‌ಗಳಾಗಿ ವಿಭಜಿಸಿ ತಯಾರಕರಿಗೆ ಕಳುಹಿಸಲಾಯಿತು.

ಆದರೆ 2013 ರಲ್ಲಿ ಮಂಜೂರ್  ಬ್ಲಾಕ್‌ಗಳನ್ನು ಮರದ ಹಲಗೆಗಳಾಗಿ ಪರಿವರ್ತಿಸಲು ಘಟಕವನ್ನು ಸ್ಥಾಪಿಸಿದರು. 78×77 ಮಿಮೀ ಆಯಾಮಗಳೊಂದಿಗೆ 5.2 ಮಿಮೀ ದಪ್ಪಕ್ಕೆ ಬ್ಯಾಂಡ್-ಗರಗಸದ ಗಿರಣಿಗಳಲ್ಲಿ ಸ್ಲ್ಯಾಟ್‌ಗಳನ್ನು ತಯಾರಿಸಲಾಗುತ್ತದೆ. ಮರದ ಸಣ್ಣ ತುಂಡುಗಳನ್ನು ನಂತರ ಒಣಗಿಸಿ ಅಥವಾ ತೇವಾಂಶವನ್ನು ಹೀರಿಕೊಳ್ಳುವ ಯಂತ್ರದಲ್ಲಿ ಇರಿಸಲಾಗುತ್ತದೆ.

ಒಮ್ಮೆ ಸಿದ್ಧವಾದ ಸ್ಲ್ಯಾಟ್‌ಗಳನ್ನು ನಂತರ ಪ್ರತಿ ಚೀಲಕ್ಕೆ 800 ಬ್ಯಾಚ್‌ಗಳಲ್ಲಿ ಪ್ಯಾಕ್ ಮಾಡಲಾಗುತ್ತದೆ ಮತ್ತು ಮುಂದಿನ ಪ್ರಕ್ರಿಯೆಗಳಿಗೆ ಕಳುಹಿಸಲಾಗುತ್ತದೆ. ಸ್ಲ್ಯಾಟ್‌ಗಳನ್ನು ಸಿದ್ಧಪಡಿಸುವುದು ಪೆನ್ಸಿಲ್‌ಗಳನ್ನು ತಯಾರಿಸುವ ಪ್ರಕ್ರಿಯೆಯ ಸುಮಾರು 50% ಆಗಿದೆ. ಸ್ಲ್ಯಾಟ್‌ಗಳು ನಂತರ ಜಮ್ಮು, ಚಂಡೀಗಢ ಮತ್ತು ಗುಜರಾತ್‌ನ ತಯಾರಕರ ಬಳಿಗೆ ಹೋಗಿ ಉಳಿದ ಪ್ರಕ್ರಿಯೆಗಾಗಿ ಸಿದ್ಧಗೊಂಡು ಉತ್ಪನ್ನವನ್ನು ತಯಾರಿಸುತ್ತವೆ.

ಅಂದಿನಿಂದ, ಪುಲ್ವಾಮಾ ಜಿಲ್ಲೆಯಲ್ಲಿ ಅಂತಹ 17 ಘಟಕಗಳು ಬೆಳೆದು ನಿಂತಿವೆ.

ತಜ್ಞರು ಹೇಳುವಂತೆ ಅಗಾಧವಾಗಿ ಸಾಮರ್ಥ್ಯದ ಕಾರಣ ಈ ಪ್ರದೇಶದಲ್ಲಿ ಈ ಉದ್ಯಮವು ತ್ವರಿತ ಬೆಳವಣಿಗೆಯಾಗಿದೆ. “ಉದ್ಯಮದ ಮಾಸಿಕ ವಹಿವಾಟು 3 ಕೋಟಿ ರೂ. ಸ್ಥಳೀಯರು ಮಾತ್ರವಲ್ಲ, ಸರ್ಕಾರವೂ ತೆರಿಗೆಯಿಂದ ಸಾಕಷ್ಟು ಸಂಪಾದಿಸುತ್ತದೆ. ಪ್ಲೈವುಡ್ ಮತ್ತು ಇತರ ವಸ್ತುಗಳನ್ನು ತಯಾರಿಸಲು ಮರವು ಉಪಯುಕ್ತವಾಗಿರುವುದರಿಂದ ವ್ಯವಹಾರವು ಲಾಭದಾಯಕವಾಗುತ್ತದೆ, ”ಎಂಬುದು ತಜ್ಞರ ಅಭಿಮತ.

ಹವಾಮಾನದ ಅನಿಶ್ಚಿತತೆಯು ಸೇಬು ತೋಟಗಳ ಬೆಳವಣಿಗೆ ಮತ್ತು ಉತ್ಪಾದಕತೆಯ ಮೇಲೆ ಪರಿಣಾಮ ಬೀರುತ್ತದೆ ಎಂದು ಮಂಜೂರ್ ಹೇಳುತ್ತಾರೆ. “ಪೋಪ್ಲಾರ್ ಮರಗಳನ್ನು ಬೆಳೆಸುವುದು ಸ್ಥಿರವಾದ ಹೆಚ್ಚುವರಿ ಆದಾಯ ಅಥವಾ  ಹೆಚ್ಚಿನ ಬೇಡಿಕೆಯಿಂದ ಕೂಡಿದ್ದು, ಸೇಬಿಗೆ ಪರ್ಯಾಯವಾಗುತ್ತದೆ” ಎಂದು ಅವರು ಹೇಳುತ್ತಾರೆ.

ಪುಲ್ವಾಮಾದ ಕೈಗಾರಿಕಾ ಸಂಘದ ಅಧ್ಯಕ್ಷ ಶೈಕ್ ನಿಸಾರ್ ಅಹ್ಮದ್ ಹೇಳುವಂತೆ, “ಸರ್ಕಾರವು ಈ ವಲಯವನ್ನು ಬೆಳೆಯುತ್ತಿರುವ ಉದ್ಯಮವೆಂದು ಗುರುತಿಸಬೇಕು ಮತ್ತು ಅದನ್ನು ಉತ್ತೇಜಿಸಲು ಸಹಾಯಧನ ಅಥವಾ ಪ್ರೋತ್ಸಾಹವನ್ನು ಅನುಮತಿಸಬೇಕು. ಇದು ಈ ಪ್ರದೇಶದಲ್ಲಿ ಸಾವಿರಾರು ಯುವಕರನ್ನು ಉದ್ಯೋಗಕ್ಕೆ ನೇಮಿಸಿಕೊಳ್ಳಲು ಮತ್ತು ಬಹುಪಟ್ಟು ಬೆಳವಣಿಗೆ ಸಾಧಿಸಲು ಶಕ್ತಗೊಳಿಸುತ್ತದೆ.”

ಬರ್ಕಾಟ್ ಆಗ್ರೋ ಇಂಡಸ್ಟ್ರೀಸ್ ಮಾಲೀಕರಾದ ಫಿರೋಜ್ ಅಹ್ಮದ್ ಅವರು 2014 ರಲ್ಲಿ ವ್ಯವಹಾರವನ್ನು ಪ್ರವೇಶಿಸಿದರು. “ನನ್ನಲ್ಲಿ ಸುಮಾರು 150 ಉದ್ಯೋಗಿಗಳಿದ್ದಾರೆ, ಆದರೆ ಪ್ರಸ್ತುತ ಕೋವಿಡ್-19 ಸಾಂಕ್ರಾಮಿಕ ಬಿಕ್ಕಟ್ಟಿನಿಂದಾಗಿ ಘಟಕವನ್ನು ತಾತ್ಕಾಲಿಕವಾಗಿ ಮುಚ್ಚಲಾಗಿದೆ” ಎಂದು ಅವರು ಹೇಳುತ್ತಾರೆ.‌

ಉದ್ಯಮಕ್ಕೆ ಭವಿಷ್ಯವು ಭರವಸೆಯಂತೆ ಕಾಣುತ್ತಿದ್ದರೂ, ಲಾಭಗಳನ್ನು ಅತ್ಯುತ್ತಮವಾಗಿ ಪಡೆದುಕೊಳ್ಳಲು ಇನ್ನೂ ಹೆಚ್ಚಿನ ಅಗತ್ಯವಿದೆ ಎಂದು ಫಿರೋಜ್  ಹೇಳುತ್ತಾರೆ.

ಒಂದು ವೇಳೆ ಪೆನ್ಸಿಲ್‌ಗೆ ಕಚ್ಛಾವಸ್ತು ಪೂರೈಸುವ ಇಲ್ಲಿನ ಉದ್ಯಮ ಇನ್ನಷ್ಟು ಬೆಳದರೆ ಈ ಗ್ರಾಮ ದೇಶದ ಮಾದರಿ ಗ್ರಾಮವಾಗಿ ನಿಲ್ಲುವುದರಲ್ಲಿ ಯಾವುದೇ ಅನುಮಾನವಿಲ್ಲ.