ಸಂಕ್ರಾಂತಿ ದಿನದಿಂದ 45 ದಿನಗಳ ಕಾಲ ಅಯೋಧ್ಯೆ‌ಯ ರಾಮ ಮಂದಿರಕ್ಕೆ ದೇಣಿಗೆ ಅಭಿಯಾನ

ನವದೆಹಲಿ: ಭಾರತದ ಬಹುಸಂಖ್ಯಾತ ಜನರ ಆರಾಧ್ಯ ದೈವ ಶ್ರೀರಾಮ‌ನ ಮಂದಿರ ನಿರ್ಮಾಣ ಕಾರ್ಯ ಅಯೋಧ್ಯೆಯಲ್ಲಿ ಶೀಘ್ರದಲ್ಲೇ ಆರಂಭವಾಗಲಿದೆ. ಈ ಹಿನ್ನೆಲೆಯಲ್ಲಿ ಸಂಕ್ರಾಂತಿ ದಿನದಿಂದ ದೇಣಿಗೆ ಸಂಗ್ರಹ ವಿಶೇಷ ಅಭಿಯಾನ ಆರಂಭ ಮಾಡಲಾಗುತ್ತದೆ ಎಂದು ಪೇಜಾವರ ಮಠದ ವಿಶ್ವ ಪ್ರಸನ್ನ ತೀರ್ಥ ಸ್ವಾಮೀಜಿ ತಿಳಿಸಿದ್ದಾರೆ.

ವಸಂತಕುಂಜ್‌ನ ಪೇಜಾವರ ಮಠದ ಶಾಖೆಯಲ್ಲಿ ಸುದ್ದಿಗಾರರ ಜೊತೆಗೆ ಮಾತನಾಡುತ್ತಾ ಈ ವಿಚಾರವನ್ನು ಅವರು ತಿಳಿಸಿದ್ದಾರೆ.

ವಿಶ್ವ ಹಿಂದೂ ಪರಿಷತ್‌ನ ಮಾರ್ಗದರ್ಶಕ ಮಂಡಳಿಯ ಸದಸ್ಯರೂ ಆಗಿರುವ ಶ್ರೀ ಗಳು ನಿರಂತರ 45 ದಿನಗಳ ಕಾಲ ಅಯೋಧ್ಯೆ‌ಯ ರಾಮ ಮಂದಿರ ನಿರ್ಮಾಣಕ್ಕೆ ವಿಶ್ವ‌ದಾದ್ಯಂತ ದೇಣಿಗೆ ಸಂಗ್ರಹ ಅಭಿಯಾನ ನಡೆಯಲಿದೆ ಎಂದು ತಿಳಿಸಿದ್ದಾರೆ. ಪ್ರತಿಯೋರ್ವ ಭಕ್ತರೂ ಕನಿಷ್ಟ ಪಕ್ಷ 10 ರೂ. ಗಳನ್ನಾದರೂ ದೇಣಿಗೆ ರೂಪದಲ್ಲಿ ನೀಡುವಂತೆಯೂ ಶ್ರೀ ಗಳು ಮನವಿ ಮಾಡಿದ್ದಾರೆ.

ಅಲ್ಲದೆ ಪ್ರತಿ ಕುಟುಂಬ ಕಡೇ ಪಕ್ಷ 100 ರೂ. ಗಳನ್ನಾದರೂ ದೇಣಿಗೆ ರೂಪದಲ್ಲಿ ನೀಡಿ ರಸೀದಿ ಪಡೆದುಕೊಳ್ಳುವಂತೆ ಮನವಿ ಮಾಡಿದ್ದು, ಆ ಮೂಲಕ ಈ ಪುಣ್ಯ ಕಾರ್ಯದಲ್ಲಿ ಭಾಗಿಗಳಾಗುವಂತೆ ತಿಳಿಸಿದ್ದಾರೆ. ರಾಮ ಮಂದಿರ ನಿರ್ಮಾಣ ಭಾರತದ ಪರಂಪರೆ, ಸಂಸ್ಕೃತಿಯ ಪ್ರತೀಕ ಎಂದೂ ಅವರು ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.

ಇನ್ನು ರಾಮ ಮಂದಿರ ನಿರ್ಮಾಣ ಮಾಡುವ ಗುತ್ತಿಗೆ‌ಯನ್ನು ಎಲ್ & ಟಿ ಸಂಸ್ಥೆ‌ಗೆ ವಹಿಸಲಾಗಿದೆ. ಟಾಟಾ ಕನ್ಸಲ್ಟನ್ಸಿ ಇದರ ಉಸ್ತುವಾರಿ ವಹಿಸಲಿದೆ. ಈ ಮಂದಿರ ನಿರ್ಮಾಣ‌ಕ್ಕೆ ತಗುಲಬಹುದಾದ ಖರ್ಚು ವೆಚ್ಚಗಳ ಬಗ್ಗೆ ಇನ್ನಷ್ಟೇ ನಿರ್ಧಾರವಾಗಬೇಕಿದೆ. ಇವೆಲ್ಲದರ ಬಗ್ಗೆ ಇಂದು ಸಂಜೆ ನಡೆಯುವ ಸಭೆಯಲ್ಲಿ ನಿರ್ಧಾರವಾಗುವ ಸಾಧ್ಯತೆ ಇದೆ ಎಂದು ಅವರು ಹೇಳಿದ್ದಾರೆ.