ಕಾಂಗ್ರೆಸ್ ಉಪಾಧ್ಯಕ್ಷನಾಗಲು ರಾಹುಲ್‌ಗಿರುವ ಅರ್ಹತೆಯೇನು?

ನವದೆಹಲಿ: ಕಾಂಗ್ರೆಸ್ ಪಕ್ಷದ ಉಪಾಧ್ಯಕ್ಷರಾಗಲು ನಿಮಗಿರುವ ಅರ್ಹತೆ ಏನು ಎಂಬುದನ್ನು ವಿವರಿಸುತ್ತೀರಾ ಎಂದು ಬಿಜೆಪಿ ರಾಹುಲ್ ಗಾಂಧಿಯವರನ್ನು ಕೇಳಿದೆ. ಆರ್‌ಎಸ್‌ಎಸ್ ಮತ್ತು ಬಿಜೆಪಿ ಸರ್ಕಾರದ ಮೇಲೆ ತೀವ್ರ ವಾಗ್ದಾಳಿ ನಡೆಸಿದಕ್ಕಾಗಿ ರಾಹುಲ್‌ಗೆ ಈ ಪ್ರಶ್ನೆಯನ್ನು ಕೇಳಲಾಗಿದೆ.

ಎಫ್‌ಟಿಐಐ (ಫಿಲ್ಮ್ ಆಂಡ್ ಟೆಲಿವಿಷನ್ ಇನ್‌ಸ್ಟಿಟ್ಯೂಟ್ ಆಫ್ ಇಂಡಿಯಾ)ದ ಮುಖ್ಯಸ್ಥರನ್ನಾಗಿ ಗಜೇಂದ್ರ ಚೌವ್ಹಾಣ್ ಅವರನ್ನು ನೇಮಿಸಿದ ಸರ್ಕಾರದ ಕ್ರಮವನ್ನು ರಾಹುಲ್ ನಿನ್ನೆ ಟೀಕಿಸಿದ್ದರು. ಅಲ್ಲದೇ ಬಿಜೆಪಿ ಮತ್ತು ಆರ್‌ಎಸ್‌ಎಸ್ ತನ್ನ ಶಕ್ತಿಯನ್ನು ಬಳಸಿ ಕಳಪೆ ಮಟ್ಟದ ಪ್ರಚಾರ ಮಾಡುತ್ತಿದೆ ಎಂದು ಆರೋಪಿಸಿದ್ದರು.

ಇದಕ್ಕೆ ತಿರುಗೇಟು ನೀಡಿರುವ ಬಿಜೆಪಿ ವಕ್ತಾರ ಜಿ.ವಿ.ಎಲ್. ನರಸಿಂಹ ರಾಮ್, ‘ಯಾವ ಅರ್ಹತೆಯ ಆಧಾರದಲ್ಲಿ ರಾಹುಲ್ ಅವರನ್ನು ಕಾಂಗ್ರೆಸ್ ಉಪಾಧ್ಯಕ್ಷರನ್ನಾಗಿ ಮಾಡಿದೆ ಎಂದು ತಿಳಿಯಬಯಸುತ್ತೇವೆ. ಅವರು ರಾಜಕೀಯದಲ್ಲಿ ಕಳಪೆ ಮಟ್ಟದ ಪ್ರಚಾರವನ್ನು ಪ್ರದರ್ಶಿಸುತ್ತಿಲ್ಲವೇ? ಇತರರ ಮೇಲೆ ಕಲ್ಲು ಬಿಸಾಡುವ ಮುನ್ನ ನಿಮ್ಮ ಗಾಜಿನ ಮನೆಯನ್ನು ಒಂದು ಬಾರಿ ನೋಡಿಕೊಳ್ಳಿ’ ಎಂದಿದ್ದಾರೆ.

ಬಿಜೆಪಿಯ ಪರೇಶ್ ರಾವಲ್ ಕೂಡ ರಾಹುಲ್ ವಿರುದ್ಧ ಕಿಡಿಕಾರಿದ್ದಾರೆ. ರಾಹುಲ್ ಲೋಕಸಭೆಯಲ್ಲ್ಲಿ ಒಂದೇ ಒಂದು ಪ್ರಶ್ನೆ ಕೇಳುವುದನ್ನೂ ನಾನು ನೋಡಿಲ್ಲ. ಈಗ ಅವರಿಗೆ ಹೊಸ ವಿಷಯ ಸಿಕ್ಕಿದೆ. ಅದರ ಬಗ್ಗೆಯಾದರೂ ಅವರಿಗೆ ಮಾತನಾಡಲು ಬಿಡಬೇಕಾಗಿದೆ. ಬಳಿಕ ನಾವು ಅವರಿಗೆ ಉತ್ತರಿಸುತ್ತೇವೆ ಎಂದಿದ್ದಾರೆ.

ಗಜೇಂದ್ರ ಚೌವ್ಹಾಣ್ ಅವರಲ್ಲಿ ವಿದ್ಯಾರ್ಥಿಗಳು ರಾಜಕೀಯ ನಾಯಕನನ್ನು ಕಂಡರೆ, ರಾಹುಲ್ ಗಾಂಧಿಯವರಲ್ಲಿ ಅವರು ಖಂಡಿತ ನಟನನ್ನು ಕಂಡಿರುತ್ತಾರೆ ಎಂದು ವ್ಯಂಗ್ಯವಾಡಿದ್ದಾರೆ.

ರಾಹುಲ್ ಅವರ ಕಳಪೆ ಮಟ್ಟದ ಪ್ರಚಾರದ ಹೇಳಿಕೆ ಕಾಂಗ್ರೆಸ್‌ಗೂ ಅನ್ವಯಿಸುತ್ತಾ ಎಂದು ಸಚಿವ ಅರುಣ್ ಜೇಟ್ಲಿಯವರೂ ಪ್ರಶ್ನಿಸಿದ್ದಾರೆ.

ಒಟ್ಟಿನಲ್ಲಿ ಎಫ್‌ಟಿಐಐನಲ್ಲಿ ರಾಹುಲ್ ನೀಡಿರುವ ಹೇಳಿಕೆ ಇದೀಗ ಕಾಂಗ್ರೆಸ್ ಮತ್ತು ಬಿಜೆಪಿ ನಡುವೆ ವಾಗ್ಯುದ್ಧವನ್ನೇ ಸೃಷ್ಟಿಸಿದೆ.