ಚೀನಾ ವಸ್ತುಗಳಿಗೆ ಬಹಿಷ್ಕಾರ: ಇರುವ ಸವಾಲುಗಳೇನು?

ಲಡಾಖ್‌ನ ಗಾಲ್ವಾನ್ ಕಣಿವೆಯಲ್ಲಿ ಸೋಮವಾರ ತಡರಾತ್ರಿ ಚೀನಾದ ಸೈನಿಕರೊಂದಿಗೆ ನಡೆದ ಮುಖಾಮುಖಿಯಲ್ಲಿ ಭಾರತದ 20 ಸೈನಿಕರು  ಹುತಾತ್ಮರಾಗಿದ್ದಾರೆ. ಈ ಬೆಳವಣಿಗೆಯ ನಂತರ ಚೀನಾ ನಿರ್ಮಿತ ಸರಕುಗಳನ್ನು ಬಹಿಷ್ಕರಿಸುವ ಕರೆಗಳು ಭಾರತದಾದ್ಯಂತ ಸ್ಫೋಟಗೊಂಡಿವೆ. ಪ್ರತಿಭಟನಾಕಾರರು ಚೀನಾದ ವಿರುದ್ಧ ಸೇಡು ತೀರಿಸಿಕೊಳ್ಳುವ ಸಲುವಾಗಿ ಅದರೊಂದಿಗಿನ ವ್ಯಾಪಾರ ಸಂಬಂಧಗಳನ್ನು ಕಡಿದುಕೊಳ್ಳುವಂತೆ ಸರ್ಕಾರಕ್ಕೆ ಒತ್ತಾಯಿಸುತ್ತಿದ್ದಾರೆ.  ಜನರು ಚೀನಾದ ಧ್ವಜ, ಚೀನಾ ನಿರ್ಮಿತ ಉತ್ಪನ್ನಗಳು ಮತ್ತು ಚೀನಾ ಅಧ್ಯಕ್ಷ ಕ್ಸಿ ಜಿನ್‌ಪಿಂಗ್ ಅವರ ಪ್ರತಿಮೆಗಳನ್ನು ಸುಡುತ್ತಿರುವ ಬಗೆಗಿನ ವರದಿಗಳೂ ಬರುತ್ತಿವೆ. ಆದರೆ ಈ ಸಂದರ್ಭದಲ್ಲಿ ಹೊರಹೊಮ್ಮುವ ಪ್ರಶ್ನೆಯೆಂದರೆ, ಈ ಹಂತದಲ್ಲಿ ಚೀನಾದ ಉತ್ಪನ್ನಗಳನ್ನು ಬಹಿಷ್ಕರಿಸಲು ಭಾರತವು ಶಕ್ತವಾಗಿದೆಯೇ? ಎಂಬುದು, ಚೀನಾ ನಿರ್ಮಿತ ಸರಕುಗಳು ಈಗಾಗಲೇ ಹೊಂದಿರುವ ಮಾರುಕಟ್ಟೆ ಪಾಲನ್ನು ಗಮನಿಸಿದರೆ ತುಸು ಮಟ್ಟಿಗೆ ಕಷ್ಟ ಎನಿಸಬಹುದು, ಆದರೆ ದೂರದೃಷ್ಟಿಯ ಯೋಜನೆಯನ್ನು ಹಾಕಿಕೊಂಡು ಹಂತ ಹಂತವಾಗಿ ಆಮದನ್ನು ನಿಲ್ಲಿಸಿದರೆ ಸಫಲತೆ ಸಿಗುವುದು ಕಷ್ಟವೇನಲ್ಲ.

ಪ್ರಮುಖ ಕ್ಷೇತ್ರಗಳ ದತ್ತಾಂಶವನ್ನು ವಿಶ್ಲೇಷಿಸಿದರೆ,  ಸ್ಥಳೀಯ ಪರ್ಯಾಯಗಳೊಂದಿಗೆ ಚೀನಾದ ಉತ್ಪನ್ನಗಳನ್ನು ಕ್ಷಿಪ್ರಗತಿಯಲ್ಲಿ ಬದಲಿಸುವುದು ಭಾರತಕ್ಕೆ ಅಷ್ಟು ಸುಲಭವಲ್ಲ. ಪ್ರಯತ್ನಪಟ್ಟರೆ ದೀರ್ಘಾವಧಿಯಲ್ಲಿ ಸಾಧ್ಯವಾಗಬಹುದು, ಆದರೆ ಹಾದಿ ಕಠಿಣದ್ದಾಗಿದೆ. ಒಗ್ಗಟ್ಟಿನ ಪರಿಶ್ರಮ ಬೇಕೇ ಬೇಕು. 2018-19ನೇ ಸಾಲಿನ ಎಕ್ಸ್‌ಪೋರ್ಟ್‌ ಇಂಪೋರ್ಟ್ ಡೇಟಾ ಬ್ಯಾಂಕಿನ ಪ್ರಕಾರ‌, ಚೀನಾದೊಂದಿಗಿನ ಭಾರತದ ವ್ಯಾಪಾರದಲ್ಲಿ ಭಾರತವು ಒಟ್ಟು 1.17 ಲಕ್ಷ ಕೋಟಿ ರೂ.ಗಳನ್ನು ಗಳಿಸಿದೆ, ರಫ್ತು ಪಾಲು ಶೇ 5.08 ರಷ್ಟಿದೆ. ಆದರೆ, ಚೀನಾವು ಭಾರತದಿಂದ 4.92 ಲಕ್ಷ ಕೋಟಿ ರೂ.ಪಾಯಿಗಳನ್ನು ಗಳಿಸಿದ್ದು, ಆಮದು ಪಾಲು ಶೇ 13.69 ರಷ್ಟಿದೆ.

ನಿಸ್ಸಂಶಯವಾಗಿ, ಇದು ಚೀನಾದ ಉದ್ಯಮ ಮತ್ತು ಅವರ ಉತ್ಪನ್ನಗಳಿಗೆ ಭಾರತವು ದೊಡ್ಡ ಮಾರುಕಟ್ಟೆಯಾಗಿದೆ ಎಂಬುದನ್ನು ಸಾಬೀತುಪಡಿಸುತ್ತದೆ. ಚೀನಾದೊಂದಿಗೆ ಭಾರತದ ವ್ಯಾಪಾರ ಸಮತೋಲನವು 3.74 ಲಕ್ಷ ಕೋಟಿ ರೂ.ಗಳಷ್ಟಿದೆ, ಅಂದರೆ ಭಾರತವು ಚೀನಾ ಭಾರತದಿಂದ ಆಮದು ಮಾಡಿಕೊಳ್ಳುವುದಕ್ಕಿಂತ ಮೂರು ಪಟ್ಟು ಹೆಚ್ಚು ಆಮದು ಮಾಡಿಕೊಳ್ಳುತ್ತದೆ. ಅಂತಹ ಸನ್ನಿವೇಶದಲ್ಲಿ,  ಅದು ಕೂಡ ಜಗತ್ತಿನ ಸೇರಿದಂತೆ ಭಾರತದ ಆರ್ಥಿಕ ರಂಗ ಕುಸಿದಿರುವ ಸಂದರ್ಭದಲ್ಲಿ ಚೀನಾದೊಂದಿಗೆ ಎಲ್ಲಾ ವ್ಯಾಪಾರ ವಹಿವಾಟು ಕಡಿದುಕೊಳ್ಳುವುದು ಸರ್ಕಾರಕ್ಕೆ ಅಷ್ಟು ಸುಲಭದ ಮಾತಲ್ಲ.

 ಇಂದು ಯಾವುದೇ ಉತ್ಪನ್ನವನ್ನು ತೆಗೆದುಕೊಳ್ಳಿ, ಅದು ಕಾರು, ಫೋನ್ ಅಥವಾ ವಿಮಾನವೇ ಆಗಲಿ ಚೀನಾ ಸೇರಿದಂತೆ ಹಲವಾರು ವಿವಿಧ ದೇಶಗಳ ನೂರಾರು ಬಿಡಿಭಾಗಗಳನ್ನು ಅದರಲ್ಲಿ ನಾವು ಕಾಣುತ್ತೇವೆ. ಇಂತಹ ಉತ್ಪನ್ನವನ್ನು “ಚೈನೀಸ್” ಎಂದು ಸ್ಪಷ್ಟವಾಗಿ ಲೇಬಲ್ ಮಾಡುವುದು ಅಸಾಧ್ಯ. ಜಾಗತಿಕ ಉತ್ಪಾದನೆಯಲ್ಲಿ ಆ ದೇಶದ ಪ್ರಮುಖ ಪಾತ್ರವನ್ನು ಗಮನಿಸಿದರೆ, ಅಂತಹ ಲೇಬಲಿಂಗ್ ಭಾರತೀಯ ಗ್ರಾಹಕರಿಗೆ ಹೆಚ್ಚಿನ ನಿರ್ಣಾಯಕ ಉತ್ಪನ್ನಗಳನ್ನು ನೀಡಬಹುದು. ಉದಾಹರಣೆಗೆ, ಕ್ಸಿಯಾನ್ ಏರ್ಕ್ರಾಫ್ಟ್ ಇಂಡಸ್ಟ್ರಿಯಲ್ ಕಾರ್ಪ್ ಬೋಯಿಂಗ್‌ಗೆ ಘಟಕಗಳ ಪ್ರಮುಖ ಪೂರೈಕೆದಾರನಾಗಿದ್ದು, ಅದರ 737 ಮ್ಯಾಕ್ಸ್ ಮತ್ತು 747 ವಿಮಾನಗಳು ಭಾರತೀಯ ವಾಯುಪಡೆಗಳ ಭಾಗವಾಗಿದೆ. ಕ್ಸಿಯಾನ್ ಚೀನಾದ ಕಂಪನಿಯಾಗಿದೆ ಎಂಬ ಕಾರಣಕ್ಕೆ ಭಾರತವು ಸೋರ್ಸಿಂಗ್ ಆಯ್ಕೆಗಾಗಿ ಬೋಯಿಂಗ್ ಅನ್ನು ಬಹಿಷ್ಕರಿಸಲು ಸಾಧ್ಯವಿದೆಯೇ?

ಈ ನಡುವೆ, 2019ರಲ್ಲಿ ಭಾರತೀಯ ಸ್ಟಾರ್ಟ್ ಅಪ್‌ಗಳಲ್ಲಿ ಚೀನಾದ ಹೂಡಿಕೆ ಶೇಕಡಾ 94ರಷ್ಟು ಏರಿಕೆಯಾಗಿದೆ. 2018ರಲ್ಲಿ ಚೀನಾ ಭಾರತದಲ್ಲಿ 15,000 ಕೋಟಿ ರೂಪಾಯಿಗಳ ಹೂಡಿಕೆ ಮಾಡಿತು, ಅದು 2019ರಲ್ಲಿ 29,000 ಕೋಟಿ ರೂಪಾಯಿಗೆ ಏರಿತು. ಭಾರತದ 30 ದೊಡ್ಡ ಸ್ಟಾರ್ಟ್ ಅಪ್‌ಗಳಲ್ಲಿ ಸುಮಾರು 18 ಸ್ಟಾರ್ಟ್ ಅಪ್‌ಗಳಿಗೆ ಚೀನಾದ ಹೂಡಿಕೆ ಸಿಕ್ಕಿದೆ. ಇವುಗಳಲ್ಲಿ ಒಎಲ್‌ಎ, ಹೈಕ್, ಬಿಗ್ ಬಾಸ್ಕೆಟ್, ಬೈಜು, ದೆಲ್ಹಿವರಿ, ಡ್ರೀಮ್ 11, ಹೈಕ್, ಓಯೊ, ಪೇಟಿಎಂ, ಸ್ನ್ಯಾಪ್‌ಡೀಲ್ ಮತ್ತು ಝೋಮ್ಯಾಟೊ ಬ್ರಾಂಡ್‌ಗಳು ಸೇರಿವೆ ಎಂದು ವರದಿ ತಿಳಿಸಿದೆ. ಭಾರತದಲ್ಲಿ ಈ ಚೀನೀ ಉತ್ಪನ್ನಗಳ ಬಲೂನಿಂಗ್ ಅನ್ನು ಗಮನಿಸಿದಾಗ, ಇದ್ದಕ್ಕಿದ್ದಂತೆ ಎಲ್ಲವನ್ನು ಬಹಿಷ್ಕರಿಸುವುದು ಅಸಾಧ್ಯವೆಂದು ತೋರುತ್ತದೆ, ಅದರಲ್ಲೂ ವಿಶೇಷವಾಗಿ ಕುಸಿದ ಆರ್ಥಿಕತೆಯನ್ನು ಪುನರುಜ್ಜೀವನಗೊಳಿಸಲು ವ್ಯಾಪಾರ ಅವಕಾಶಗಳ ತುರ್ತು ಅಗತ್ಯದೊಂದಿಗೆ ದೇಶವು ಸಹಜ ಸ್ಥಿತಿಗೆ ಮರಳುತ್ತಿರುವ ಈ ಸಂದರ್ಭದಲ್ಲಿ ಏಕಾಏಕಿ ಚೀನಾದೊಂದಿಗೆ ವ್ಯಾಪಾರ ಕಡಿದುಕೊಳ್ಳುವುದು ಸುಲಭ ಅಲ್ಲವೇ ಅಲ್ಲ.

ಇದಕ್ಕಾಗಿಯೇ ʼವೋಕಲ್‌ ಫಾರ್‌ ಲೋಕಲ್‌ʼ ಅನ್ನು ಪ್ರಧಾನಿ ನರೇಂದ್ರ ಮೋದಿ ಒತ್ತಿ ಹೇಳಿದ್ದಾರೆ. ಪ್ರತಿ ಭಾರತೀಯ ಸ್ಥಳೀಯವಾಗಿ ಉತ್ಪಾದನೆಗೊಳ್ಳುವ ವಸ್ತುಗಳಿಗೆ ಹೆಚ್ಚು ಹೆಚ್ಚು ಅವಲಂಬಿತನಾದರೆ ಸ್ವಯಂಚಾಲಿತವಾಗಿಯೇ ಆಮದುಗೊಂಡ ವಸ್ತುಗಳಿಗೆ ಬೇಡಿಕೆ ಕಡಿಮೆಯಾಗುತ್ತದೆ.  ನಮ್ಮ ಕರಕುಶಲಕರ್ಮಿಗಳು, ನಮ್ಮ ಕೈಗಾರಿಕೆಗಳು ಉತ್ಪಾದಿಸಿದ ವಸ್ತುಗಳಿಗೆ ನಾವು ಉತ್ತೇಜನ ನೀಡಬೇಕು. ಚೀನಿ ವಸ್ತುಗಳ ಮಾರಾಟದಲ್ಲಿ ಜೀವನೋಪಾಯ ಕಂಡುಕೊಂಡಿರುವ ನಮ್ಮ ದೇಶದ ಚಿಲ್ಲರೆ ವ್ಯಾಪಾರಿಗಳು ಸ್ವದೇಶಿ ವಸ್ತುಗಳ ಮಾರಾಟದಲ್ಲಿ ತೊಡಗಿಕೊಳ್ಳುವಂತಹ ಪೂರಕ ವಾತಾವರಣವನ್ನು ನಾವು ಸೃಷ್ಟಿ ಮಾಡಬೇಕು. ಆಗ ಮಾತ್ರ ಆತ್ಮನಿರ್ಭರ ಭಾರತದ ನಿರ್ಮಾಣ ಸಾಧ್ಯ.