ಭಾರತೀಯ ಸಮುದ್ರ ತೀರ ರಕ್ಷಣಾ ಪಡೆಯ ಹಡಗು ʼಸಚೇತ್‌ʼಗೆ ರಾಜನಾಥ್ ಸಿಂಗ್ ಚಾಲನೆ

ನವದೆಹಲಿ: ಕೇಂದ್ರ ರಕ್ಷಣಾ ಸಚಿವ ಶ್ರೀ ರಾಜ್ ನಾಥ್ ಸಿಂಗ್ ಭಾರತೀಯ ಸಮುದ್ರ ತೀರ ರಕ್ಷಣಾ ಪಡೆಯ ಹಡಗು (ಐಸಿಜಿಎಸ್) ‘ಸಚೇತ್’ ಮತ್ತು 2 ಪ್ರತಿಬಂಧಕ ನಾವೆ (ಐಬಿಎಸ್) ಸಿ – 450 ಮತ್ತು ಸಿ – 451 ಗಳಿಗೆ ಗೋವಾದಲ್ಲಿ ವಿಡಿಯೋ ಕಾನ್ಫೆರೆನ್ಸ್ ಮೂಲಕ ಚಾಲನೆ ನೀಡಿದರು.

ಭಾರತೀಯ ಮೂಲದ ಕಂಪನಿಗಳೇ ಈ ಹಡಗುಗಳ ನಿರ್ಮಾಣ ಕಾರ್ಯವನ್ನು ಮಾಡಿದ್ದು, ಇದರಲ್ಲಿ ಅತ್ಯಾಧುನಿಕ ತಂತ್ರಜ್ಞಾನವನ್ನೊಳಗೊಂಡ ನ್ಯಾವಿಗೇಶನ್ ಮತ್ತು ಸಂವಹನ ಪರಿಕರಗಳನ್ನು ಅಳವಡಿಕೆ ಮಾಡಲಾಗಿದೆ. ಈ ಹಡಗುಗಳು ಕರಾವಳಿ ತೀರದ ಸಾಮರ್ಥ್ಯ ಹೆಚ್ಚಿಸುವ ನಿಟ್ಟಿನಲ್ಲಿ ಮಹತ್ವದ ಮೈಲುಗಲ್ಲಾಗಲಿದೆ ಎಂದು ರಾಜನಾಥ್ ಸಿಂಗ್ ಅಭಿಪ್ರಾಯ ಪಟ್ಟಿದ್ದಾರೆ. ಅಲ್ಲದೆ ಇವುಗಳು ದೇಶಕ್ಕೆ ಹೆಮ್ಮೆಯ ವಿಚಾರಗಳಾಗಿವೆ ಎಂದೂ ಅವರು ತಿಳಿಸಿದ್ದಾರೆ. ದೇಶದ ಭದ್ರತೆ, ಸುರಕ್ಷತೆಯ ದೃಷ್ಟಿಯಿಂದಲೂ ಈ ಹಡಗುಗಳು ರಕ್ಷಣಾ ಪಡೆಗಳಿಗೆ ಮತ್ತಷ್ಟು ಶಕ್ತಿ ತುಂಬಲಿದೆ ಎಂದು ಅವರು ತಿಳಿಸಿದ್ದಾರೆ.

ಇನ್ನು ಸಮುದ್ರ ತೀರಗಳಲ್ಲಿ ದೇಶದ ರಕ್ಷಣೆಯಲ್ಲಿ ನಿರತರಾಗಿರುವ ಐಸಿಜಿಯ ಪಾತ್ರವನ್ನೂ ಈ ಸಂದರ್ಭ ನೆನಪಿಸಿಕೊಂಡಿದ್ದಾರೆ. ಇದು ವಿಶ್ವದ ನಾಲ್ಕನೇಯ ಅತೀ ದೊಡ್ಡ ಪಡೆಯಾಗಿ, ಒಂದು ವಿಶ್ವಾಸಾರ್ಹ ಶಕ್ತಿಯಾಗಿ ತನ್ನ ಸಾಮರ್ಥ್ಯ ವನ್ನು ನಿರೂಪಿಸಿದೆ ಎಂಬುದಾಗಿಯೂ ಅವರು ತಿಳಿಸಿದ್ದಾರೆ. ದೇಶಕ್ಕೆ ಮಾರಕವಾದ ವಿಚಾರಗಳು ಸಮುದ್ರದ ಮೂಲಕವೂ ನಡೆಯುವುದು ಸಾಧ್ಯವಿದ್ದು, ಅವುಗಳನ್ನು ಸಮರ್ಥವಾಗಿ ಎದುರಿಸುವ ಮೂಲಕ ಐಸಿಜಿಯು ದೇಶಸೇವೆ ಮಾಡುತ್ತಿದೆ ಎಂದು ಪಡೆಗೆ ಪ್ರಶಂಸೆ ವ್ಯಕ್ತಪಡಿಸಿದ್ದಾರೆ.

105 ಮೀಟರ್ ಉದ್ದದ ಹಡಗು ‘ಸಚೇತ್’ ಸುಮಾರು 2,350 ಟನ್­ಗಳನ್ನು ಸ್ಥಳಾಂತರಿಸುವ ಸಾಮರ್ಥ್ಯ ಹೊಂದಿದೆ, ಮತ್ತು 26 ನಾಟ್ ಗರಿಷ್ಟ ವೇಗ ಪಡೆಯಲು 9,100 ಕಿಲೊ ವ್ಯಾಟ್ನ ಸಾಮರ್ಥ್ಯದ 2 ಡಿಸೇಲ್ ಇಂಜಿನ್­ಗಳನ್ನು ಇದಕ್ಕೆಂದೇ ವಿನ್ಯಾಸಗೊಳಿಸಲಾಗಿದ್ದು 6000 ದೂರ ಕ್ರಮಿಸಬಲ್ಲ ಸಾಮರ್ಥ್ಯ ಹೊಂದಿದೆ. 2 ಇಂಜಿನ್­ವುಳ್ಳ ಹೆಲಿಕಾಪ್ಟರ್ ಮತ್ತು 4 ಅತಿ ವೇಗದ ಬೋಟ್­ಗಳನ್ನು ಮತ್ತು ಶೋಧ ಮತ್ತು ರಕ್ಷಣಾ ಕಾರ್ಯಾಚರಣೆಗಾಗಿ ತ್ವರಿತಗತಿಯಲ್ಲಿ ಇಳಿಯಲು ಅನುಕೂಲವಾಗುವಂತಹ ಗಾಳಿ ತುಂಬಬಹುದಾದ ಒಂದು ಬೋಟ್ ವ್ಯವಸ್ಥೆ ಇರುವಂತೆ ಈ ನೌಕೆಯನ್ನು ವಿನ್ಯಾಸಗೊಳಿಸಲಾಗಿದೆ. ಕನಿಷ್ಟ ಪ್ರದೂಷಣೆ ಜವಾಬ್ದಾರಿ ಮತ್ತು ಸಮುದ್ರದಲ್ಲಿ ತೈಲ ಸೋರಿಕೆಯಾಗುವುದನ್ನು ತಡೆಗಟ್ಟುವ ಸಾಮರ್ಥ್ಯವನ್ನು ಈ ಹಡಗು ಹೊಂದಿದೆ.

ಸಚೇತ್ ಎಂದರೆ ಎಚ್ಚರಿಕೆ. ಇದು ರಾಷ್ಟ್ರದ ಸಮುದ್ರ ತೀರದ ಹಿತಾಸಕ್ತಿಗೆ ‘ಸೇವೆ ಸಲ್ಲಿಸಲು ಮತ್ತು ರಕ್ಷಿಸಲು’ ಐಸಿಜಿ ಸದಾ ಸಿದ್ಧವಾಗಿರುತ್ತದೆ ಮತ್ತು ಆಸಕ್ತಿ ಹಾಗೂ ಬದ್ಧತೆಯನ್ನು ಹೊಂದಿದೆ. 11 ಅಧಿಕಾರಿಗಳು ಮತ್ತು 110 ಸಿಬ್ಬಂದಿ ನಿರ್ವಹಣೆಯ ಐಸಿಜಿ ಎಸ್ ಸಚೇತ್ ಅನ್ನು ಡೆಪ್ಯುಟಿ ಇನಸ್ಪೆಕ್ಟರ್ ಜನರಲ್ ರಾಜೇಶ್ ಮಿತ್ತಲ್ ಅವರು ಮುನ್ನಡೆಸುತ್ತಿದ್ದಾರೆ. ಕೋವಿಡ್ – 19 ಸಾಂಕ್ರಾಮಿಕ ರೋಗದ ಹಿನ್ನೆಲೆಯಲ್ಲಿ ಕಟ್ಟುನಿಟ್ಟಾದ ಸಾಮಾಜಿಕ ಅಂತರ ಕಾಪಾಡಿಕೊಂಡು ಡಿಜಿಟಲ್ ಮಾಧ್ಯಮದ ಮೂಲಕ ನೌಕೆಯನ್ನು ನಿಯೋಜಿಸುತ್ತಿರುವುದು ಭಾರತದ ಕಡಲ ತೀರದ ಇತಿಹಾಸದಲ್ಲೇ ಇದೇ ಮೊದಲು.

ಸಿ – 450 ಮತ್ತು ಸಿ – 451 ಐಬಿ ಗಳನ್ನು ಸ್ಥಳೀಯವಾಗಿ ಲಾರ್ಸನ್ ಆಂಡ್ ಟರ್ಬೊ ಅವರಿಂದ ಹಜೀರಾ ಶಿಪ್ ಯಾರ್ಡ್ ನಲ್ಲಿ ವಿನ್ಯಾಸಗೊಳಿಸಲಾಗಿದೆ. ಇದರಲ್ಲಿ ಅತ್ಯಾಧುನಿಕ ನ್ಯಾವಿಗೇಶನ್ ಮತ್ತು ಸಂವಹನ ಸಾಧನಗಳನ್ನು ಅಳವಡಿಸಲಾಗಿದೆ. 30 ಮೀಟರ್ ಉದ್ದದ ದೋಣಿಗಳು 45 ಕ್ಕೂ ಹೆಚ್ಚು ನಾಟ್ ಗಳ ವೇಗದಲ್ಲಿ ಚಲಿಸುವ ಸಾಮರ್ಥ್ಯ ಹೊಂದಿವೆ. ಸಮುದ್ರ ತೀರದ ಗಸ್ತು ಹಾಗೂ ಕಡಿಮೆ ತೀವ್ರತೆಯ ಸಮುದ್ರ ತೀರದ ಕಾರ್ಯಾಚರಣೆಗಳು ಮತ್ತು ಹೆಚ್ಚಿನ ವೇಗದ ಪ್ರತಿಬಂಧಕ್ಕಾಗಿ ಇವುಗಳನ್ನು ವಿನ್ಯಾಸಗೊಳಿಸಲಾಗಿದೆ. ತ್ವರಿತಗತಿಯ ಪ್ರತಿಕ್ರಿಯೆ ನೀಡುವ ಸಾಮರ್ಥ್ಯ ಹೊಂದಿದ ಈ ಐಬಿಗಳು ಕಡಲ ತೀರದ ಯಾವುದೇ ತುರ್ತು ಪರಿಸ್ಥಿತಿಗೆ ಪ್ರತಿಕ್ರಿಯಿಸಲು ಮತ್ತು ತಡೆಯಲು ಸೂಕ್ತ ವೇದಿಕೆಯಾಗಿವೆ. ಸಹಾಯಕ ಕಮಾಡಂಟ್ ಗೌರವ್ ಕುಮಾರ್ ಗೋಲಾ ಮತ್ತು ಸಹಾಯಕ ಕಮಾಡಂಟ್ ಅಕಿನ್ ಜುಟ್ಸಿ ಈ ನೌಕೆಗಳ ಮುಂದಾಳತ್ವ ವಹಿಸಿದ್ದಾರೆ. ಈ ನೌಕೆಗಳು ಕಡಲ ತೀರದ ಗಸ್ತು ಪಡೆಗಳಿಗೆ ಮತ್ತಷ್ಟು ಬಲ ತುಂಬಲಿದೆ.