ಪಾಕ್‌ ಸ್ಮಗ್ಲರ್‌ಗಳ ಹೊಸ ತಂತ್ರ: ಡ್ರಗ್ಸ್‌ ಕಳ್ಳಸಾಗಾಣೆಗೆ ಅಪ್ರಾಪ್ತರ ಬಳಕೆ

ನವದೆಹಲಿ: ಪಾಕಿಸ್ಥಾನ ಮೂಲದ ಕಳ್ಳಸಾಗಣೆದಾರರು ಪಂಜಾಬ್ ಗಡಿಯ ಮೂಲಕ ಭಾರತದಲ್ಲಿ ಮಾದಕವಸ್ತುಗಳನ್ನು ಕಳ್ಳಸಾಗಣೆ ಮಾಡಲು ಹೊಸ ಹೊಸ ಮಾರ್ಗಗಳನ್ನು ರೂಪಿಸುತ್ತಿದ್ದಾರೆ. ಕಾನೂನು ಪರಿಶೀಲನೆಯಿಂದ ತಪ್ಪಿಸಿಕೊಳ್ಳಲು ಹೊಸಬರನ್ನು ಕೃತ್ಯಗಳಿಗೆ ಬಳಸಿಕೊಳ್ಳುತ್ತಿದ್ದಾರೆ. ಅದರಲ್ಲೂ ಅಪ್ರಾಪ್ತರಿಗೆ ಆದ್ಯತೆ ನೀಡುತ್ತಿದ್ದಾರೆ

ಬಂಧನಕ್ಕೊಳಗಾದರೆ, ಬಾಲಾಪರಾಧಿಗಳಾಗಿ ಜೈಲಿಗೆ ಹೋಗುವಂತೆ ತಪ್ಪಿಸಬಹುದು, ಹೀಗಾಗಿ ಅಪ್ರಾಪ್ತ ವಯಸ್ಕರನ್ನು ಕೊರಿಯರ್‌ಗಳಾಗಿ ನೇಮಿಸಿಕೊಳ್ಳುವಂತೆ  ಭಾರತೀಯ ಸಹವರ್ತಿಗಳಿಗೆ ಪಾಕ್‌ ಕಳ್ಳಸಾಗಾಣೆದಾರರು ಮನವಿ ಮಾಡಿಕೊಳ್ಳುತ್ತಿದ್ದಾರೆ.

ಈ ನಡುವೆ, ಗಡಿ ಭದ್ರತಾ ಪಡೆ ಈ ವರ್ಷ ಇಂದಿನವರೆಗೆ ತೀವ್ರ ಕಾರ್ಯಾಚರಣೆ ನಡೆಸಿ 203 ಕ್ಕೂ ಹೆಚ್ಚು ಭಾರತೀಯ ಮಾದಕವಸ್ತು ಕಳ್ಳಸಾಗಣೆದಾರರು ಮತ್ತು 16 ಪಾಕಿಸ್ತಾನಿ ಪ್ರಜೆಗಳನ್ನು ಬಂಧಿಸಿದೆ, ಮುಖ್ಯವಾಗಿ ಪಂಜಾಬ್‌ನ ಅಮೃತಸರ, ತರಣ್ ತರಾನಾ ಮತ್ತು ಫಿರೋಜ್‌ಪುರದ ಹೆಚ್ಚಿನ ಅಪಾಯದ ಗಡಿ ಜಿಲ್ಲೆಗಳಲ್ಲಿ ಈ ಬಂಧನ ನಡೆದಿದೆ. ಕಾರ್ಯಾಚರಣೆ ವೇಳೆ ಬಿಎಸ್‌ಎಫ್‌ ಮೂವರು ಪಾಕಿಸ್ಥಾನಿ ನುಸುಳುಕೋರರನ್ನು ಸಹ ಸಂಹರಿಸಿದೆ.

ನೆಲ ಮತ್ತು ವೈಮಾನಿಕ ಕಣ್ಗಾವಲುಗಳನ್ನು ಪಡೆಗಳು ಹೆಚ್ಚಿಸಿವೆ. ಇದರ ನಡುವೆಯೂ ಪತ್ತೆಹಚ್ಚುವಿಕೆಯಿಂದ ತಪ್ಪಿಸಿಕೊಳ್ಳಲು ಪಾಕಿಸ್ಥಾನಿ ಕಳ್ಳಸಾಗಣೆದಾರರು ಡ್ರೋನ್‌ಗಳು ಮತ್ತು ಜಿಪಿಎಸ್ ಆಧಾರಿತ ವಿತರಣಾ ವಿಧಾನಗಳ ಬಳಕೆಯನ್ನು ಮಾಡುತ್ತಿದ್ದಾರೆ.

ಹೀಗಾಗಿ ಡ್ರೋನ್ ವಿರೋಧಿ ವ್ಯವಸ್ಥೆಗಳು, ಚಲನೆಯ ಸಂವೇದಕಗಳು ಮತ್ತು ರಾತ್ರಿ ದೃಷ್ಟಿ ಸಾಧನಗಳನ್ನು ಪಡೆಗಳು ನಿಯೋಜಿಸಿವೆ ಮತ್ತು ಇವುಗಳ ಸಹಾಯದಿಂದ ಕಾರ್ಯಾಚರಣೆಯನ್ನು ಕ್ಷಿಪ್ರಗೊಳಿಸಿ 200 ಪಾಕ್ ಡ್ರೋನ್‌ಗಳು ಜೊತೆಗೆ 287 ಕೆಜಿ ಹೆರಾಯಿನ್, 13 ಕೆಜಿ ಐಸಿಇ ಮಾದಕವಸ್ತು, ಎಕೆ -47 ಸೇರಿದಂತೆ 174 ಶಸ್ತ್ರಾಸ್ತ್ರಗಳು, 12 ಹ್ಯಾಂಡ್ ಗ್ರೆನೇಡ್‌ಗಳು ಮತ್ತು ಈ ಡ್ರೋನ್‌ಗಳು ಭಾರತದ ಪ್ರದೇಶದೊಳಗೆ ಸಾಗಿಸಿದ 10 ಕೆಜಿಗೂ ಹೆಚ್ಚು ಹೈ ಸ್ಫೋಟಕಗಳನ್ನು ಇದುವರೆಗೆ ವಶಪಡಿಸಿಕೊಂಡಿದೆ.

ಬಿಎಸ್‌ಎಫ್ ವಕ್ತಾರ, ಡೆಪ್ಯೂಟಿ ಇನ್ಸ್‌ಪೆಕ್ಟರ್ ಜನರಲ್, ಎಕೆ ವಿದ್ಯಾರ್ಥಿ, ಕೆಲವು ಗ್ರಾಮಸ್ಥರ ಸ್ವಯಂಪ್ರೇರಿತ ಸಹಾಯ ಮತ್ತು ಪಂಜಾಬ್ ಪೊಲೀಸ್ ಮತ್ತು ಇತರ ಕೇಂದ್ರ ಸಂಸ್ಥೆಗಳೊಂದಿಗೆ ಜಂಟಿ ಕಾರ್ಯಾಚರಣೆಗಳು ಅಂತರರಾಷ್ಟ್ರೀಯ ಮಾದಕವಸ್ತು ದಳ್ಳಾಲಿಗಳ ಸ್ಥಳೀಯ ಮಾರ್ಗಗಳನ್ನು ಪತ್ತೆಹಚ್ಚುವಲ್ಲಿ ಫಲಪ್ರದವಾಗಿವೆ ಎಂದು ಹೇಳಿದರು.