ಆಪರೇಷನ್ ಸಮುದ್ರ ಸೇತು : ಮಾಲ್ಡೀವ್ಸ್‌ನ ಮಾಲೆಗೆ ತಲುಪಿದ ಭಾರತೀಯ ನೌಕಾಹಡಗು

ನವದೆಹಲಿ: ಆಪರೇಷನ್ ಸಮುದ್ರ ಸೇತು ಭಾಗವಾಗಿ ಭಾರತೀಯ ಪ್ರಜೆಗಳನ್ನು ಸ್ಥಳಾಂತರಿಸಲು ಭಾರತೀಯ ನೌಕಾಪಡೆಯ ಐಎನ್‌ಎ ಜಲಾಶ್ವ ಗುರುವಾರ ಬೆಳಿಗ್ಗೆ ಮಾಲ್ಡೀವ್ಸ್‌ನ ಮಾಲೆ ಬಂದರಿಗೆ ಪ್ರವೇಶಿಸಿದೆ. ಈ ಹಡಗು ಶುಕ್ರವಾರ ಮಾಲ್ಡೀವ್ಸ್‌ನಿಂದ ಕೊಚ್ಚಿಗೆ ಬರಲಿದೆ.

ಮಾರಣಾಂತಿಕ ಕೊರೋನವೈರಸ್ COVID-19 ಹಿನ್ನಲೆಯಲ್ಲಿ ಲಾಕ್ ಡೌನ್ ಅನ್ನು ವಿಧಿಸಿದ ಕಾರಣ ಸಿಲುಕಿರುವ ಸುಮಾರು 1,000 ಭಾರತೀಯ ಪ್ರಜೆಗಳನ್ನು ಹಡಗಿನಲ್ಲಿ ಭಾರತಕ್ಕೆ ಕರೆತರಲಾಗುತ್ತದೆ.

ಚಾಲ್ತಿಯಲ್ಲಿರುವ ಲಾಕ್‌ಡೌನ್‌ನ ದೃಷ್ಟಿಯಿಂದ, ಮೇ 8 ರಿಂದ ಪ್ರಾರಂಭವಾಗುವ ಮೊದಲ ಹಂತದ ಆಪರೇಷನ್ ಭಾಗವಾಗಿ ಮಾಲ್ಡೀವ್ಸ್‌ನಿಂದ ಭಾರತೀಯ ಪ್ರಜೆಗಳನ್ನು ಸ್ಥಳಾಂತರಿಸುವ ಕಾರ್ಯವನ್ನು ಭಾರತೀಯ ನೌಕಾಪಡೆಗೆ ವಹಿಸಲಾಗಿದೆ. ಭಾರತೀಯ ನೌಕಾ ಹಡಗುಗಳಾದ ಜಲಾಶ್ವ ಮತ್ತು ಮಾಗರ್ ಮೇ 5 ರಂದು ಮಾಲ್ಡೀವ್ಸ್ ರಾಜಧಾನಿಗೆ ತೆರಳಿತ್ತು.

ಗಲ್ಫ್ ದೇಶಗಳಲ್ಲಿ ಸಿಲುಕಿದ್ದ ನಾಗರಿಕರನ್ನು ಕರೆತರಲು ಒಟ್ಟು 14 ಹಡಗುಗಳನ್ನು ಸಿದ್ಧಪಡಿಸಲಾಗಿದೆ ಮತ್ತು ಅದರಲ್ಲಿ ಎರಡು ಹಡಗುಗಳು ಮೇ 5 ರಂದು ಮುಂಜಾನೆ ಪ್ರಯಾಣ ಆರಂಭಿಸಿವೆ.

“ಐಎನ್‌ಎಸ್ ಜಲಾಶ್ವ ಮೊದಲ ಹಂತದ ಆಪರೇಷನ್ ಸಮುದ್ರ ಸೇತು ಭಾಗವಾಗಿ ಭಾರತೀಯರನ್ನು ಕರೆತರಲು ಮಾಲ್ಡೀವ್ಸ್‌‌ನ ಮಾಲೆ ಬಂದರಿಗೆ ಪ್ರವೇಶಿಸುತ್ತಿದೆ” ಎಂದು ಇಂಡಿಯಾ ಇನ್ ಮಾಲ್ಡಿವ್ಸ್ ಟ್ವೀಟ್ ಮಾಡಿದೆ.

ಈ ಹಡಗುಗಳು ಸಾಮಾಜಿಕ ಅಂತರ ಮತ್ತು ನೈರ್ಮಲ್ಯದಂತಹ ಪ್ರೋಟೋಕಾಲ್ ಪ್ರಕಾರ ವ್ಯವಸ್ಥೆಗಳನ್ನು ಮಾಡಿವೆ. ಸ್ಥಳಾಂತರಿಸಲ್ಪಡುವವರಿಗೆ ಸ್ಥಳಾವಕಾಶ ಕಲ್ಪಿಸಲು ಭಾರತೀಯ ನೌಕಾಪಡೆ ಅನಿವಾರ್ಯವಲ್ಲದ ಉಪಕರಣಗಳನ್ನು ಹಡಗಿನಿಂದ ತೆಗೆದುಹಾಕಿದೆ.

ಇದಲ್ಲದೆ, ಸದರ್ನ್ ನೇವಲ್ ಕಮಾಂಡ್‌ಗೆ ಲಗತ್ತಿಸಲಾದ ಐಎನ್ಎಸ್ ಶಾರ್ದುಲ್ ಸಹ ಕಾರ್ಯಾಚರಣೆಯಲ್ಲಿ ತೊಡಗಿಸಿಕೊಂಡಿದೆ ಮತ್ತು ದುಬೈನಲ್ಲಿ ಸಿಲುಕಿದ್ದ ನಾಗರಿಕರನ್ನು ಕರೆತರುತ್ತಿದೆ.

ಸ್ಟ್ಯಾಂಡ್‌ಬೈನಲ್ಲಿ 14 ಹಡಗುಗಳಿವೆ ಮತ್ತು ಕೇಂದ್ರ ಸರ್ಕಾರದ ನಿರ್ದೇಶನಗಳಿಗಾಗಿ ಇವು ಕಾಯುತ್ತಿದೆ. “ಸರ್ಕಾರವು ನಿರ್ದೇಶನಗಳನ್ನು ನೀಡಿದ ನಂತರ ನೌಕಾಯಾನ ಪ್ರಾರಂಭವಾಗುತ್ತದೆ” ಎಂದು ಭಾರತೀಯ ನೌಕಾಪಡೆಯ ಹಿರಿಯ ಅಧಿಕಾರಿ ಹೇಳಿದರು.

2006 ರಲ್ಲಿ ಆಪರೇಷನ್ ಸುಕೂನ್ ಮತ್ತು 2015 ರಲ್ಲಿ ಆಪರೇಷನ್ ರಾಹತ್­ನ ಭಾಗವಾಗಿ ಭಾರತೀಯ ನೌಕಾಪಡೆಯು ವಿದೇಶಗಳಿಂದ ಇದೇ ರೀತಿಯ ಸ್ಥಳಾಂತರ ಕಾರ್ಯಾಚರಣೆಯನ್ನು ನಡೆಸಿತ್ತು.

ನೌಕಾಪಡೆಯು ಯುದ್ಧ ಪೀಡಿತ ಪ್ರದೇಶಗಳಾದ ಲೆಬನಾನ್ (2006) ಮತ್ತು ಯೆಮೆನ್ (2015)ಗಳಲ್ಲಿ ಸ್ಥಳಾಂತ ಕಾರ್ಯಾಚರಣೆಗಳನ್ನು ನಡೆಸಿತ್ತು. ಇದಕ್ಕೂ ಮುನ್ನ, 1990 ರಲ್ಲಿ ಇರಾಕ್ ಮತ್ತು ಕುವೈಟ್ ನಡುವಿನ ಮೊದಲ ಕೊಲ್ಲಿ ಯುದ್ಧದ ಸಮಯದಲ್ಲಿ ಸ್ಥಳಾಂತರ ಕಾರ್ಯಾಚರಣೆ ನಡೆದಿದ್ದು, ಆ ವೇಳೆ ಸುಮಾರು 1.5 ಲಕ್ಷ ಜನರನ್ನು ಸ್ಥಳಾಂತರಿಸಲಾಗಿತ್ತು.