ದೆಹಲಿಯಲ್ಲಿ ಏಮ್ಸ್‌ಗೆ ʼಪರಿಕ್ರಮʼದ ಮೂಲಕ ಕೊರೋನಾ ವಾರಿಯರ್ಸ್­ಗೆ ಗೌರವ ಸಲ್ಲಿಸಿದ ಪೊಲೀಸರು

ನವದೆಹಲಿ: ಕೋವಿಡ್-19 ವಿರುದ್ಧ ತಮ್ಮ ಜೀವವನ್ನೇ ಪಣಕ್ಕಿಟ್ಟು ಹೋರಾಟ ನಡೆಸುತ್ತಿರುವ ವೈದ್ಯಕೀಯ ಸಿಬ್ಬಂದಿಗಳಿಗೆ ಗೌರವ ಸಲ್ಲಿಸುವ ಸಲುವಾಗಿ ದೆಹಲಿ ಪೊಲೀಸ್ ಇಲಾಖೆಯ ಮಹಿಳಾ ಪೊಲೀಸರೂ ಸೇರಿದಂತೆ 51 ಪಾಟ್ರೋಲ್ ಬೈಕ್‌ಗಳಲ್ಲಿ ಏಮ್ಸ್‌ಗೆ “ಪರಿಕ್ರಮ” ಸಲ್ಲಿಸಿದರು.

ಕೊರೋನಾ ಹೋರಾಟ ನಡೆಸುತ್ತಿರುವ ಬೇರೆ ಬೇರೆ ಆಸ್ಪತ್ರೆಯಲ್ಲಿ ಕಾರ್ಯ ನಿರ್ವಹಿಸುವ ವೈದ್ಯಕೀಯ ಸಿಬ್ಬಂದಿಗಳಿಗೆ ಅವರಿರುವಲ್ಲಿಗೇ ತೆರಳಿ ಗೌರವ ಸಲ್ಲಿಸುವ ಕ್ರಮವಾಗಿದೆ. ಸ್ವ ಹಿತ ಬಿಟ್ಟು ಸಮಾಜದ ಜನರ ಆರೋಗ್ಯ ಕಾಳಜಿ ವಹಿಸುವವರಿಗೆ ಗೌರವ ಸೂಚಿಸಲು ಆರಂಭಿಸಲಾದ ಈ ಪರಿಕ್ರಮವನ್ನು ಈಗ ದೆಹಲಿಯ ಪೊಲೀಸರು ಪ್ರದರ್ಶಿಸುವ ಮೂಲಕ ಆರೋಗ್ಯ ರಕ್ಷಕರಿಗೆ ಅಭಿನಂದನೆ ಸಲ್ಲಿಸಿರುವುದಾಗಿ ಡೆಪ್ಯುಟಿ ಪೊಲೀಸ್ ಕಮಿಷನರ್ ಅತುಲ್ ಕುಮಾರ್ ಮಾಹಿತಿ ನೀಡಿದ್ದಾರೆ.

ಜೊತೆಗೆ ಸೋಂಕು ನಿಯಂತ್ರಣ ಹಿನ್ನೆಲೆಯಲ್ಲಿ ಪ್ರಧಾನಿ ಮೋದಿ ಜಾರಿಗೊಳಿಸಿದ ಲಾಕ್ಡೌನ್ ನಂತರದಲ್ಲಿ ಸುಮಾರು 1 ಲಕ್ಷ ಜನರಿಗೆ ಆಹಾರ ಒದಗಿಸುವ ಕೆಲಸ ಮಾಡುತ್ತಿರುವ ಗುರುದ್ವಾರದ ಬಾಂಗ್ಲಾ ಸಾಹಿಬ್ ಗುರುದ್ವಾರ ಅವರಿಗೂ ಪೊಲೀಸರು ಪರಿಕ್ರಮ ಪ್ರದರ್ಶನದ ಮೂಲಕ ಗೌರವ ಸಲ್ಲಿಸಿದ್ದಾರೆ. ಹಿರಿಯ ಪೊಲೀಸ್ ಅಧಿಕಾರಿಗಳನ್ನೊಳಗೊಂಡಂತೆ ಡೆಪ್ಯುಟಿ ಕಮಿಷನರ್ ಆಫ್ ಪೊಲೀಸ್ ಇಶ ಸಿಂಘಾಲ್ ನೇತೃತ್ವದಲ್ಲಿ ಗೌರವ ಸಲ್ಲಿಸಿದರು.

ವೈದ್ಯಕೀಯ ಸಿಬ್ಬಂದಿಗಳ ನಿಸ್ವಾರ್ಥ ಸೇವೆಗೆ ಗೌರವ ಸಲ್ಲಿಸುವ ಸಲುವಾಗಿ ಏಮ್ಸ್ ಆರಂಭಿಸಿದ ಪರಿಕ್ರಮ ವಿಧಾನವನ್ನು ಇದೀಗ ಫೊಲೀಸರು ಅನುಸರಿಸಿದ್ದು ಈ ಮಾದರಿ ಕ್ರಮಕ್ಕೆ ಪ್ರಧಾನಿ ಮೋದಿ ಅವರೂ ಟ್ವಿಟ್ಟರ್ ಮೂಲಕ ಪ್ರಶಂಸಿಸಿದ್ದಾರೆ. ಅಲ್ಲದೆ ಗುರುದ್ವಾರದ ಜನ ಸೇವೆ ಅಭಿನಂದನಾರ್ಹ ಮತ್ತು ಎಲ್ಲರಿಗೂ ಮಾದರಿಯಾಗಿದೆ ಎಂದು ಬರೆದುಕೊಂಡಿದ್ದಾರೆ.