ಮಾಸ್ಕ್‌ ಮತ್ತು ಸ್ಯಾನಿಟೈಸರ್ ತಯಾರಿಸುವ ಮೂಲಕ ಕೊರೋನಾ ವಿರುದ್ಧ ಹೋರಾಟದಲ್ಲಿ ಕೈಜೋಡಿಸಿದ ಕೈದಿಗಳು

ನವದೆಹಲಿ: ಕೊರೋನಾ ಸೋಂಕಿನಿಂದ ರಕ್ಷಿಸಿಕೊಳ್ಳುವ ಸಲುವಾಗಿ ಮಾಸ್ಕ್ ಧರಿಸುವಂತೆ ಜನ ಸಾಮಾನ್ಯರಿಗೆ ಸರ್ಕಾರಗಳು ಸೂಚಿಸುತ್ತಲೇ ಬಂದಿವೆ. ಸೋಂಕು ಹರಡುವ ಸಾಧ್ಯತೆಗಳನ್ನು ತಡೆಯುವ ನಿಟ್ಟಿನಲ್ಲಿ ಬಳಸಿ ಎಸೆಯುವ ಮಾಸ್ಕ್­ಗಳನ್ನು ಬಳಕೆ ಮಾಡುವುದು ಹೆಚ್ಚು ಸೂಕ್ತ ಎಂದು ಸರ್ಕಾರ ಮಾಹಿತಿ ನೀಡಿದೆ. ಈ ನಿಟ್ಟಿನಲ್ಲಿ ತೆಲಂಗಾಣದ ಕಾರಾಗೃಹಗಳಲ್ಲಿರುವ ಕೈದಿಗಳು ಮಾಸ್ಕ್ ತಯಾರಿಸುವ ಕೆಲಸ ಮಾಡುವ ಮೂಲಕ ವೈದ್ಯಕೀಯ ಸಿಬ್ಬಂದಿ, ಪೊಲೀಸರು ಮತ್ತು ಇತರ ಆರೋಗ್ಯ ರಕ್ಷಕರಿಗೆ ನೆರವಾಗಲು ಹೊರಟಿದ್ದಾರೆ.

ರಾಜ್ಯದ ಕೇಂದ್ರ ಹಾಗೂ ಜಿಲ್ಲಾ ಕಾರಾಗೃಹಗಳಲ್ಲಿರುವ ಕೈದಿಗಳು ಮಾಸ್ಕ್ ತಯಾರಿಯಲ್ಲಿ ತೊಡಗಿದ್ದು ವೈದ್ಯಕೀಯ ಸಿಬ್ಬಂದಿ, ಸರ್ಕಾರಿ ಅಧಿಕಾರಿಗಳು, ಪೊಲೀಸರಿಗೆ, ಮಾಹಿತಿ ಮತ್ತು ತಂತ್ರಜ್ಞಾನ ಸಂಸ್ಥೆಯ ಸಿಬ್ಬಂದಿಗಳಿಗೆ ಒದಗಿಸುತ್ತಿರುವುದಾಗಿ ಅಧಿಕಾರಿಯೊಬ್ಬರು ಮಾಹಿತಿ ನೀಡಿದ್ದಾರೆ. ಈ ಉತ್ಪನ್ನಗಳನ್ನು ತೆಲಂಗಾಣ ಕಾರಾಗೃಹ ಇಲಾಖೆ ‘ಮೈ ನೇಷನ್’ ಬ್ರಾಂಡ್ ಹೆಸರಲ್ಲಿ ಮಾರಾಟ ಮಾಡುತ್ತಿರುವುದಾಗಿ ತಿಳಿಸಿದ್ದಾರೆ. ಈ ಮಾಸ್ಕ್­ಗಳನ್ನು ಒಗೆದು ಮರು ಬಳಕೆ ಮಾಡುವುದೂ ಸಾಧ್ಯವಿದೆ ಎಂದು ಅವರು ತಿಳಿಸಿದ್ದಾರೆ. ಜೊತೆಗೆ ಸ್ಯಾನಿಟೈಸರ್, ಹ್ಯಾಂಡ್ ವಾಷ್, ಸಾಬೂನುಗಳು, ಫಿನಾಯಿಲ್­ಗಳೂ ಸೇರಿದಂತೆ ಇನ್ನಿತರ ಆರೋಗ್ಯ ಪೂರಕ ನೈರ್ಮಲ್ಯ ಕಿಟ್­ಗಳನ್ನು ತಯಾರಿಸಲಾಗುತ್ತಿದೆ. ತಜ್ಞರು ಈ ಕೈದಿಗಳಿಗೆ ಸ್ಯಾನಿಟೈಸರ್ ತಯಾರಿಕೆ ಕಲಿಸಿದ್ದು, ವೃತ್ತಿಪರ ಟೈಲರ್­ಗಳು ಮುಖಗವಸು ತಯಾರಿಕೆಯ ಕುರಿತು ಮಾಹಿತಿ ನೀಡಿರುವುದಾಗಿ ಅಧಿಕಾರಿಗಳು ತಿಳಿಸಿದ್ದಾರೆ.

ಈ ವರೆಗೆ 30,000 ಕ್ಕೂ ಆಧಿಕ ಮಾಸ್ಕ್­ಗಳು ಮತ್ತು 6000 ಲೀ. ಗಳಷ್ಟು ಸ್ಯಾನಿಟೈಸರ್ ಮಾರಾಟ ಮಾಡಲಾಗಿದೆ. ಹೈದರಾಬಾದ್ ಮತ್ತು ಇತರ ಜಿಲ್ಲಾ ಜೈಲುಗಳಲ್ಲಿನ ಚಂಚಲಗುಡ ಮತ್ತು ಚೆರ್ಲಪಲ್ಲಿ ಕೇಂದ್ರ ಕಾರಾಗೃಹಗಳಲ್ಲಿ ಪ್ರತಿದಿನ ಸುಮಾರು 9,000 ಫೇಸ್ ಮಾಸ್ಕ್ ಮತ್ತು 3,000 ಲೀಟರ್ ಸ್ಯಾನಿಟೈಸರ್ ಉತ್ಪಾದಿಸಲಾಗುತ್ತಿದೆ. ಚಂಚಲಗುಡ ಕೇಂದ್ರ ಕಾರಾಗೃಹಗಳಲ್ಲಿ ಮಾತ್ರ 50 ಕೈದಿಗಳು ಪ್ರತಿದಿನ 2,000 ಮುಖವಾಡಗಳನ್ನು ತಯಾರಿಸುತ್ತಿದ್ದಾರೆ. ತಿಂಗಳ ಅಂತ್ಯದ ಒಳಗೆ 60,000 ಮಾಸ್ಕ್ ತಯಾರಿಸುವ ಗುರಿ ಹೊಂದಿರುವುದಾಗಿ ಅಧಿಕಾರಿಗಳು ತಿಳಿಸಿದ್ದಾರೆ.

ಇನ್ನು ಉತ್ತರ ಪ್ರದೇಶದ ಗಾಜಿಯಾಬಾದ್ ಮತ್ತು ಗೌತಮ್ ಬುದ್ಧ ನಗರ ಜೈಲುಗಳಲ್ಲಿನ ಕೈದಿಗಳು ಸುಮಾರು 85,000 ಮರುಬಳಕೆ ಕಾಟನ್ ಮುಖಗವಸುಗಳನ್ನು ತಯಾರಿಸಿದ್ದಾರೆ.

ಇನ್ನು ಈ ಮುಖಗವಸುಗಳನ್ನು ತಯಾರಿಸಲು ಸ್ಥಳೀಯ ಪ್ರದೇಶಗಳಿಂದಲೇ ಬಟ್ಟೆಗಳನ್ನೂ ಸಂಗ್ರಹಿಸಲಾಗುತ್ತದೆ ಎಂದು ಅಧಿಕಾರಿಗಳು ಮಾಹಿತಿ ನೀಡಿದ್ದು, ಕೈದಿಗಳ ಈ ಸಮಾಜಸೇವೆಯನ್ನು ಶ್ಲಾಘಿಸಿದ್ದಾರೆ.