ಯು.ಎಸ್. ನಲ್ಲಿ ಅತ್ಯಂತ ದೊಡ್ಡ ಪರಿಹಾರ ಕಾರ್ಯದಲ್ಲಿ ತೊಡಗಿರುವ ಹೆಚ್‌ಎಸ್‌ಎಸ್‌ ಸ್ವಯಂಸೇವಕರು

ವಾಷಿಂಗ್ಟನ್ : ಕೊರೋನಾ ವೈರಸ್ ಪೀಡಿತ ಯುಎಸ್­ನಲ್ಲಿ ಹಿಂದು ಸ್ವಯಂಸೇವಕ ಸಂಘದ 1500 ಹೆಚ್ಚು ಸ್ವಯಂಸೇವಕರು ಪರಿಹಾರ ಕಾರ್ಯದಲ್ಲಿ ತೊಡಗಿಕೊಂಡಿದ್ದು ಇದು ಕರೋನಾ ಪೀಡಿತ ಯುಎಸ್ ನಲ್ಲಿ ಈವರೆಗೆ ಕೈಗೊಳ್ಳಲಾಗಿರುವ ಅತ್ಯಂತ ದೊಡ್ಡ ಮಟ್ಟದ ಪರಿಹಾರ ಕಾರ್ಯವಾಗಿದೆ.

ಸಂಘ ಪರಿವಾರದ ಹಿನ್ನೆಲೆಯ ಅಂತಾರಾಷ್ಟ್ರೀಯ ಸೇವಾ ಸಂಸ್ಥೆ “ಸೇವಾ ಇಂಟರನ್ಯಾಷನಲ್” ಈವರೆಗೆ 5 ಲಕ್ಷಕ್ಕೂ ಹೆಚ್ಚು ಯು.ಎಸ್. ಡಾಲರ್ ಸಂಗ್ರಹಿಸಿದ್ದು ಕಳೆದ ಕೆಲವು ವಾರಗಳಿಂದ ಅಮೇರಿಕಾದ ‌28 ರಾಜ್ಯಗಳಲ್ಲಿ ಸೇವಾ ಚಟುವಟಿಕೆಯಲ್ಲಿ ತೊಡಗಿಸಿಕೊಂಡಿದ್ದು ಒಟ್ಟು ಪರಿಹಾರ ಕಾರ್ಯದ ಮುಂದಾಳತ್ವವಹಿಸಿದೆ.
ಸಂಕಷ್ಟದಲ್ಲಿರುವವರಿಗೆ ಸಹಾಯ ಮಾಡುವುದು ಸಂಘದ ಪರಂಪರೆಯಲ್ಲಿಯೇ ಇದೆ. ಕೊರೋನಾ ವೈರಸ್ನಿಂದಾಗಿ ಸಂಕಷ್ಟದಲ್ಲಿರುವ ಸ್ಥಳೀಯ ಸಮುದಾಯದ ಸಹಾಯಕ್ಕಾಗಿ ಈಗ ಸ್ವಯಂಸೇವಕರು ಕಾರ್ಯೋನ್ಮುಖರಾಗಿದ್ದಾರೆ ಎಂದು ಸಂಘದ ಸಹ ಸಂಪರ್ಕ ಪ್ರಮುಖರಾದ ವಿಕಾಸ ದೇಶಪಾಂಡೆ ಹೇಳುತ್ತಾರೆ.‌

ಈಗಾಗಲೇ ಕೊರೋನಾವೈರಸ್ನಿಂದಾಗಿ ತತ್ತರಿಸಿರುವ ಅಮೇರಿಕಾದಲ್ಲಿ ಮುಂಬರುವ ದಿನಗಳಲ್ಲಿ ಸಮಸ್ಯೆಯ ತೀವೃತೆಯ ಆಧಾರದಲ್ಲಿ ಹೆಚ್ಚೆಚ್ಚು ಪರಿಹಾರ ಕಾರ್ಯಗಳನ್ನು ಕೈಗೊಳ್ಳಲಾಗುವುದು. ನಮ್ಮ ಸಂಘಟನಾ ವ್ಯಾಪ್ತಿ ಹೆಚ್ಚಿರುವುದರಿಂದ ಸ್ಥಳೀಯ ಸಮುದಾಯಕ್ಕೆ ಹೆಚ್ಚೆಚ್ಚು ಸೇವೆ ಸಲ್ಲಿಸಲು ಸಾಧ್ಯವಿದೆ ಎಂದು ವಿಕಾಸ್ ಅಭಿಪ್ರಾಯಪಟ್ಟಿದ್ದಾರೆ.‌

ಸೇವಾ ಇಂಟರ್ನ್ಯಾಷನಲ್ ಮುಂದಾಳತ್ವದಲ್ಲಿ ನಡೆಯುತ್ತಿರುವ ಪರಿಹಾರ ಕಾರ್ಯಗಳಲ್ಲಿ ‌200 ಕ್ಕೂ ಹೆಚ್ಚು ಭಾರತೀಯ ಸಂಜಾತರು ಹಾಗೂ ಅಮೇರಿಕಾದ ಇತರ ಸ್ವಯಂಸೇವಾ ಸಂಘಟನೆಗಳ 2500 ಹೆಚ್ಚು ಸ್ವಯಂಸೇವಕರು ಪರಿಹಾರ ಕಾರ್ಯಕ್ಕೆ ಕೈಜೋಡಿಸಲು ಮುಂದಾಗಿದ್ದಾರೆ. ಜೊತೆಗೆ 75 ಕ್ಕೂ ಹೆಚ್ಚು ಸಂಘಟನೆಗಳು ಸೇವಾ ಇಂಟರ್ನ್ಯಾಷನಲ್ ಜೊತೆ ಜೊಡಿಸಿಕೊಂಡಿವೆ.

ಅಂದಾಜು ‌3.5 ಮಿಲಿಯನ್ ಯುಸ್ ಡಾಲರ್ ಸಂಗ್ರಹಿಸಲು ಯೋಜನೆ ಹಮ್ಮಿಕೊಂಡಿರುವ ಸೇವಾ ಇಂಟರನ್ಯಾಷನಲ್ ಈಗಾಗಲೇ 8 ಸಹಾಯವಾಣಿ ಹಾಗೂ ಪ್ಲಾಸ್ಮಾ ದಾನಿಗಳ ನೊಂದಣಿ ಪ್ರಾರಂಭಿಸಿದ್ದು, 60 ಜನ ಈಗಾಗಲೇ ಪ್ಲಾಸ್ಮಾ ದಾನಕ್ಕೆ ನೊಂದಣಿ ಮಾಡಿಕೊಂಡಿದ್ದಾರೆ.

ಕೊರೋನಾ ಪೀಡಿತರ ಸಹಾಯಕ್ಕಾಗಿ ಹಾಗೂ ಕೊರೋನಾ ಹೋರಾಟಗಾರರಿಗೆ ಸೂಕ್ತ ಭದ್ರತಾ ಕವಚ ಒದಗಿಸುವ ಕಾರ್ಯ ಈಗಾಗಲೇ ಪ್ರಾರಂಭವಾಗಿದ್ದು ಅಮೇರಿಕಾದಲ್ಲಿರುವ ಬೇರೆ ದೇಶಗಳ ವಿದ್ಯಾರ್ಥಿಗಳನ್ನು ಗುರುತಿಸಿ ಅವರಿಗೆ ಉಚಿತ ಊಟ, ವಸತಿ ಹಾಗೂ ಪಡಿತರವನ್ನು ನೀಡುವ ಕೆಲಸ ಕೂಡ ಆಗಿದೆ.

ಓವರಸೀಸ್ ವಾಲೆಂಟಿಯರ್ಸ ಫಾರ್ ಬೆಟರ್ ಇಂಡಿಯಾ ಸಂಸ್ಥೆಯ ಸ್ವಯಂಸೇವಕರು ಸುಮಾರು ‌25 ಸಾವಿರ ವಸತಿರಹಿತರಿಗೆ ಹಾಗೂ ದಿನಗೂಲಿಗಳಿಗೆ ಜನಕ್ಕೆ ಊಟ ನೀಡಿದ್ದು ಆರೋಗ್ಯ ಕಾರ್ಯಕರ್ತರಿಗೆ ನಾಲ್ಕು ಸಾವಿರ ಮಾಸ್ಕ್­ಗಳನ್ನು ನೀಡಿದೆ.

ಸೇವಾ ಫಾರ್ ಕಮ್ಯೂನಿಟಿ ಎಂಬ ಸೇವಾ ಸಂಸ್ಥೆ ಅಮೇರಿಕಾದ ಪೂರ್ವೋತ್ತರ ರಾಜ್ಯಗಲಲ್ಲಿ ಒಂದು ಲಕ್ಷ ಯುಎಸ್ ಡಾಲರ್ ಸಂಗ್ರಹಿಸಿ ಪರಿಹಾರ ಕಾರ್ಯ ಕೈಗೆತ್ತಿಕೊಂಡಿದೆ.