ಕೊರೋನಾ ನಂತರದಲ್ಲಿ ಭಾರತವನ್ನು ವಿಶ್ವಕ್ಕೇ ಮಾದರಿಯಾಗಿಸೋಣ : ಮೋದಿ

ನವದೆಹಲಿ: ಕೊರೋನಾ ನಂತರದ ಜಗತ್ತು ಹೊಸ ವಾಣಿಜ್ಯ, ವ್ಯವಹಾರಗಳತ್ತ ಮುಖ ಮಾಡುತ್ತದೆ. ಅಂತಹ ಸಂದರ್ಭದಲ್ಲಿ ಭಾರತದ ಯುವ ಜನತೆ ವಿಶ್ವಕ್ಕೆ ಮುಂದಾಳುಗಳಂತೆ ಕಾರ್ಯ ನಿರ್ವಹಿಸುವ ಮೂಲಕ, ದೇಶವನ್ನು ಎತ್ತರಕ್ಕೆ ಕೊಂಡೊಯ್ಯಬೇಕು ಎಂಬುದಾಗಿ ಪ್ರಧಾನಿ ನರೇಂದ್ರ ಮೋದಿ ಕರೆ ಕೊಟ್ಟಿದ್ದಾರೆ.

ಹೊಸತನಕ್ಕೆ, ಹೊಸ ತಂತ್ರಜ್ಞಾನಗಳ ಅಭಿವೃದ್ಧಿಗೆ ಹೆಸರುವಾಸಿಯಾದ ಭಾರತ, ಮುಂದಿನ ದಿನಗಳಲ್ಲಿಯೂ ವಿಶ್ವಕ್ಕೆ ಹೊಸ ಸಂಸ್ಕೃತಿಗಳನ್ನು ತಿಳಿಸಿ ಕೊಡುವ ಕೆಲಸ ಮಾಡಬೇಕು ಎಂದು ಲಿಂಕ್ಡ್ಇನ್ ಮೂಲಕ ತಿಳಿಸಿದ್ದಾರೆ. ಬಡವರಿಗೆ ಪೂರಕವಾದ, ದುರ್ಬಲ ವರ್ಗಕ್ಕೆ ಸಹಕಾರಿಯಾಗುವಂತಹ ವಿಚಾರಗಳಲ್ಲಿ ಗಮನ ಹರಿಸುವಂತೆಯೂ ಮೋದಿ ಮನವಿ ಮಾಡಿದ್ದಾರೆ. ಕೊರೋನಾ ನಂತರದ ಜಗತ್ತಿನಲ್ಲಿ ಎಲ್ಲಾ ರಾಷ್ಟ್ರಗಳಿಗಿಂತಲೂ ಭಾರತ ಮುಂಚೂಣಿಯಲ್ಲಿರುವಂತೆ ಮಾಡಬೇಕಾಗಿದೆ. ಆ ನಿಟ್ಟಿನಲ್ಲಿ ನಮ್ಮ ಯೋಚನೆ ಹಾಗೂ ಕೆಲಸಗಳು ಸಾಗಬೇಕು ಎಂಬುದಾಗಿ ಅವರು ಹೇಳಿದ್ದಾರೆ.

ಜಾಗತಿಕ ಬೇಡಿಕೆಗೆ ಅನುಗುಣವಾಗಿ ಪ್ರಸ್ತುತತೆಯನ್ನು ಕಂಡುಹಿಡಿಯಬೇಕು. ಅದಕ್ಕೆ ಅನುಗುಣವಾಗಿ ಕೆಲಸ ಮಾಡಬೇಕು. ನಮ್ಮ ದೇಶದ ಜನರ ಕೌಶಲಗಳು, ಸಾಮರ್ಥ್ಯಗಳನ್ನು ಬಳಸಿಕೊಳ್ಳುವ ಮೂಲಕ ದೇಶವನ್ನು ಮಾದರಿಯನ್ನಾಗಿಸುವ ಪ್ರಯತ್ನ ಮಾಡಬೇಕು ಎಂಬುದಾಗಿಯೂ ತಿಳಿಸಿದ್ದಾರೆ. ಬಿಕ್ಕಟ್ಟಿನ ಕ್ಷೇತ್ರಗಳ ಬಗ್ಗೆ ಮಾಹಿತಿ ಪಡೆದುಕೊಂಡು, ಅವುಗಳನ್ನು ನಿವಾರಣೆ ಮಾಡುವ ಮೂಲಕ ಹೊಸ ಅವಕಾಶಗಳನ್ನು ಸೃಷ್ಟಿಸೋಣ ಎಂದು ಅವರು ಜನರಿಗೆ ಕಿವಿಮಾತು ಹೇಳಿದ್ದಾರೆ.

ಇನ್ನು ಸುಲಭವಾಗಿ ಸಾಗುವ, ಪರಿಸ್ಥಿತಿಗನುಗುಣವಾಗಿ ಕೆಲಸಗಳನ್ನು ಮಾಡುವ ಮೂಲಕ ಬಿಕ್ಕಟ್ಟು ಶಮನಕ್ಕೆ ಮುಂದಾಗಬೇಕು. ಡಿಜಿಟಲ್ ವ್ಯವಸ್ಥೆ ಹೆಚ್ಚು ಬಳಕೆಯಾಗುವಂತೆ ನಮ್ಮ ಮುಂದಿನ ನಡೆಗಳಿದ್ದರೆ ಉತ್ತಮ ಎಂದು ಅವರು ತಿಳಿಸಿದ್ದಾರೆ. ಆ ಮೂಲಕ ಹೊಸ ಇತಿಹಾಸ ನಿರ್ಮಾಣಕ್ಕೆ ಭಾರತ ಸಾಕ್ಷಿಯಾಗಬೇಕು ಎಂದೂ ಮೋದಿ ಅವರು ತಿಳಿಸಿದ್ದಾರೆ.