ರಾಮಲಲ್ಲಾ ವಿಗ್ರಹ ಸ್ಥಳಾಂತರ ಕಾರ್ಯದಲ್ಲಿ ಭಾಗಿಯಾಗಲಿದ್ದಾರೆ ಯೋಗಿ

ಅಯೋಧ್ಯಾ: ಮಾರ್ಚ್ 25 ರಂದು ಉತ್ತರ ಪ್ರದೇಶ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್ ಅವರು ರಾಮ್ ಲಲ್ಲಾ ಪ್ರತಿಮೆಯನ್ನು ಹೊಸ ತಾತ್ಕಾಲಿಕ ರಚನೆಗೆ ಸ್ಥಳಾಂತರಿಸುವ ಆಚರಣೆಗಳಲ್ಲಿ ಭಾಗವಹಿಸಲಿದ್ದಾರೆ. ಇದು ನವರಾತ್ರಿಯ ಆರಂಭವನ್ನೂ ಸೂಚಿಸುತ್ತದೆ.

ಭವ್ಯವಾದ ರಾಮ ದೇವಾಲಯದ ನಿರ್ಮಾಣಕ್ಕೆ ದಾರಿ ಮಾಡಿಕೊಡಲು ರಾಮಲಲ್ಲಾ ವಿಗ್ರಹವನ್ನು ಮನಸ್ ಭವನದಲ್ಲಿ ವಿಶೇಷವಾಗಿ ನಿರ್ಮಿಸಿದ ರಚನೆಗೆ ಸ್ಥಳಾಂತರಿಸಲಾಗುತ್ತಿದೆ.

ಮೂಲಗಳ ಪ್ರಕಾರ, ಮಾರ್ಚ್ 24ರ ಸಂಜೆ ಆದಿತ್ಯನಾಥ್ ಅಯೋಧ್ಯೆಯನ್ನು ತಲುಪಲಿದ್ದು, ಹೊಸ ರಚನೆಯಲ್ಲಿ ದೇವರನ್ನು ಪ್ರತಿಷ್ಠಾಪನೆ ಮಾಡಿದ ನಂತರ ಪ್ರಾರ್ಥನೆ ಸಲ್ಲಿಸಲಿದ್ದಾರೆ. ಅವರು ಪವಿತ್ರ ನಗರದಲ್ಲಿ ಹೆಚ್ಚಿನ ಸಂಖ್ಯೆಯ ಸಂತರು ಮತ್ತು ಭಕ್ತರೊಂದಿಗೆ ಪ್ರಾಣ-ಪ್ರತಿಷ್ಠೆ ಆಚರಣೆಗಳಲ್ಲಿ ಭಾಗವಹಿಸಲಿದ್ದಾರೆ.

ಅಲ್ಲದೇ, ಫೈಬರ್­ನಿಂದ ಮಾಡಿದ ಹೊಸ ತಾತ್ಕಾಲಿಕ ದೇವಾಲಯಕ್ಕೆ ದೇವರ ವಿಗ್ರಹವನ್ನು ಸ್ಥಳಾಂತರಿಸಲು ಈಗಾಗಲೇ ಭರದ ಸಿದ್ಧತೆಗಳು ನಡೆಯುತ್ತಿವೆ, ಇದು ಮಾರ್ಚ್ 25 ರಿಂದ ಸಾರ್ವಜನಿಕರಿಗೆ ದರ್ಶನಕ್ಕೆ ಮುಕ್ತವಾಗಲಿದೆ.

ವಿಗ್ರಹವನ್ನು ಸ್ಥಳಾಂತರಿಸುವ ಕಾರ್ಯ ಮತ್ತು ಹೊಸ ತಾತ್ಕಾಲಿಕ ದೇವಾಲಯದಲ್ಲೂ ಬಿಗಿ ಭದ್ರತಾ ವ್ಯವಸ್ಥೆ ಮಾಡಲಾಗುತ್ತಿದೆ.

ಹೊಸ ರಚನೆಯಲ್ಲಿ ಹತ್ತಿರದಿಂದ ವಿಗ್ರಹದ ದರ್ಶನ ಪಡೆಯಲು ಭಕ್ತರಿಗೆ ಸಾಧ್ಯವಾಗಲಿದೆ.