ಗಾಂಧಿ ಜಯಂತಿ ಹಿನ್ನಲೆ: ‘ಗಾಂಧಿ ಸಂಕಲ್ಪ ಯಾತ್ರೆ’ಗೆ ಅಮಿತ್ ಶಾ ಚಾಲನೆ

ನವದೆಹಲಿ: ರಾಷ್ಟ್ರಪಿತ ಮಹಾತ್ಮ ಗಾಂಧೀಜಿಯವರ 150ನೇ ಜನ್ಮ ವರ್ಷಾಚರಣೆಯ ಹಿನ್ನಲೆಯಲ್ಲಿ ಬಿಜೆಪಿಯು ‘ಗಾಂಧಿ ಸಂಕಲ್ಪ ಯಾತ್ರೆ’ಯನ್ನು ಹಮ್ಮಿಕೊಂಡಿದ್ದು, ಕೇಂದ್ರ ಗೃಹ ಸಚಿವ ಅಮಿತ್ ಶಾ ಅವರು ಇಂದು ದೆಹಲಿಯಲ್ಲಿ ಇದಕ್ಕೆ ಚಾಲನೆಯನ್ನು ನೀಡಿದರು.

ದೇಶದಾದ್ಯಂತ ‘ಗಾಂಧಿ ಸಂಕಲ್ಪ ಯಾತ್ರೆ’ಯನ್ನು ಬಿಜೆಪಿ ಹಮ್ಮಿಕೊಂಡಿದೆ. ದೆಹಲಿಯಲ್ಲಿ ಇದಕ್ಕೆ ಚಾಲನೆ ನೀಡಿದ ಶಾ ಸುಮಾರು 500 ಮೀಟರ್ ಪಾದಾಯಾತ್ರೆಯನ್ನೂ ನಡೆಸಿದರು.

ಈ ವೇಳೆ ಮಾತನಾಡಿದ ಅವರು, “ಮಹಾತ್ಮ ಗಾಂಧೀಜಿಯವರ ಸತ್ಯಾಗ್ರಹ ಚಳುವಳಿಯು ಬ್ರಿಟಿಷರನ್ನು ಭಯಭೀತಗೊಳಿಸಿತ್ತು. ಮಹಾತ್ಮ ವಿಶ್ವಕ್ಕೆ ಸತ್ಯ ಮತ್ತು ಅಹಿಂಸೆಯ ದಾರಿಯನ್ನು ತೋರಿಸಿದರು” ಎಂದಿದ್ದಾರೆ.

ಏಕ ಬಳಕೆ ಪ್ಲಾಸ್ಟಿಕ್ ಸಮಸ್ಯೆಯ ಬಗ್ಗೆ ಉಲ್ಲೇಖ ಮಾಡಿದ ಅವರು, ಈ ಪ್ಲಾಸ್ಟಿಕ್ ಕರಗಲು 400 ವರ್ಷಗಳೇ ಬೇಕಾಗುತ್ತದೆ. ಈ ಪ್ಲಾಸ್ಟಿಕ್ ಪ್ರಾಣಿಗಳಿಗೆ ತೀವ್ರ ಸ್ವರೂಪದ ಹಾನಿಯನ್ನುಂಟು ಮಾಡುತ್ತಿದೆ. ಹೀಗಾಗಿ ಏಕ ಬಳಕೆ ಪ್ಲಾಸ್ಟಿಕ್ ನಿಷೇಧಿಸಿ, ಪರಿಸರ ಉಳಿಸುವ ಕಾರ್ಯ ಎಲ್ಲರಿಂದಾಗಬೇಕದಾಗಿದೆ ಎಂದಿದ್ದಾರೆ.

ಪ್ರಧಾನಿ ನರೇಂದ್ರ ಮೋದಿಯವರು ಮಹಾತ್ಮ ಗಾಂಧೀಯವರ ಪರಂಪರೆಯನ್ನು ಮುಂದಕ್ಕೆ ಕೊಂಡೊಯ್ಯುತ್ತಿದ್ದಾರೆ ಎಂದ ಶಾ, 2014ರಲ್ಲಿ ಮೋದಿ ಬಯಲು ಶೌಚ ಮುಕ್ತಕ್ಕಾಗಿ ಕರೆ ನೀಡಿದರು ಮತ್ತು ದೇಶವ್ಯಾಪಿಯಾಗಿ ನೈರ್ಮಲ್ಯ ಅಭಿಯಾನ ಆರಂಭವಾಯಿತು. ತಳಮಟ್ಟದಿಂದಲೇ ಕಾರ್ಯಕ್ರಮಗಳು ನಡೆದವು, 150ನೇ ಬಾಪು ಜನ್ಮದಿನದ ವೇಳೆ ನಿಜಕ್ಕೂ ಮಹತ್ವವಾದುದನ್ನು ಸಾಧಿಸಲಾಗಿದೆ ಎಂದಿದ್ದಾರೆ.