ಗಣಪನ 19,022 ಮೂರ್ತಿಗಳ ಸಂಗ್ರಹ ಹೊಂದಿರುವ ಹೈದರಾಬಾದ್ ವ್ಯಕ್ತಿ

ಹೈದರಾಬಾದ್: ಹೈದರಾಬಾದ್­ನ ಪಬ್ಸೆಟ್ಟಿ ಶೇಖರ್ ಎಂಬುವವರು ಗಣಪತಿಯ 19,022 ಮೂರ್ತಿಗಳ ಸಂಗ್ರಹವನ್ನು ಹೊಂದಿದ್ದಾರೆ. ಮಾತ್ರವಲ್ಲದೇ, ಗಣಪನ 20,426 ಫೋಟೊಗಳು, 1098 ಪೋಸ್ಟರ್‌ಗಳು, 200 ಗಣೇಶ ಕೀ ಚೈನ್‌ಗಳು ಇವರ ಬಳಿ ಇವೆ. ಗಣೇಶನಿಗೆ ಸಂಬಂಧಿಸಿದ 201 ಆಡಿಯೋ ವೀಡಿಯೋ ಕ್ಯಾಸೆಟ್‌ಗಳೂ ಇವರ ಬಳಿ ಇವೆ.

ಗಣಪತಿ ಬಗೆಗಿನ ತಮ್ಮ ಭಕ್ತಿಯ ಬಗ್ಗೆ ಹೇಳಿಕೊಂಡಿರುವ ಶೇಖರ್ ಅವರು, “1973ರ ವೇಳೆ ನನ್ನ ಬಾಲ್ಯದಲ್ಲಿ ಪೋಷಕರೊಂದಿಗೆ ಶಿರಡಿ ಸಾಯಿಬಾಬಾ ಮಂದಿರಕ್ಕೆ ಭೇಟಿ ನೀಡಿದ್ದೆ. ಅಲ್ಲಿಂದ ಬರುವಾಗ ಗಣೇಶನ ಮೂರ್ತಿಯನ್ನು ತಂದೆ, ಅಲ್ಲಿಂದ ನಾನು ಗಣೇಶನ ಮೂರ್ತಿಗಳ ಸಂಗ್ರಹವನ್ನು ಆರಂಭಿಸಿದೆ” ಎನ್ನುತ್ತಾರೆ.

“ಭಾರತ ಮಾತ್ರವಲ್ಲದೆ ಅಮೆರಿಕ, ಜಪಾನ್, ಚೀನಾ, ಅಫ್ಘಾನಿಸ್ತಾನ ಸೇರಿದಂತೆ ಹಲವು ದೇಶಗಳ ಗಣೇಶನ ವಿಗ್ರಹಗಳ ಸಂಗ್ರಹ ನನ್ನ ಬಳಿ ಇದೆ. ಬಾಲಗಣಪತಿಯಿಂದ ಹಿಡಿದು ಸಂಕಟಹರ ಗಣಪತಿ, ಶುಭ ದೃಷ್ಟಿ ಗಣಪತಿ ಸೇರಿದಂತೆ ಸುಮಾರು 32 ಅವತಾರಗಳ ಗಣಪತಿ ವಿಗ್ರಹ ನನ್ನ ಬಳಿ ಇದೆ” ಎಂದು ಅವರು ಹೇಳಿದ್ದಾರೆ.

“ಬೆಳ್ಳಿ , ಬಂಗಾರ, ಕಂಚು, ಗಂಧದ ಮರ ಸೇರಿದಂತೆ ಅನೇಕ ವಸ್ತುಗಳಿಂದ ರಚಿಸಲಾದ ಗಣಪನ ವಿಗ್ರಹ  ನನ್ನ ಬಳಿ ಇದೆ. ಎಂ ಸೀಲ್, ಪ್ಲಾಸ್ಟರ್ ಆಫ್ ಪ್ಯಾರಿಸ್, ಸಿರಾಮಿಕ್ ಪೌಡರ್, ಥ್ರೆಡ್ ಇತ್ಯಾದಿಗಳಿಂದ ನಾನೇ ಗಣಪನನ್ನು ರಚನೆ ಮಾಡಿದ್ದೇನೆ. ಗಾಜಿನ ಮೇಲೆಯೂ ಗಣಪನನ್ನು ರಚನೆ ಮಾಡಿದ್ದೇನೆ” ಎಂದಿದ್ದಾರೆ.

ನನಗೆ ಮಲೇಷ್ಯಾದ ಟೆಂಪಲ್ ಆಫ್ ಫೈನ್ ಆರ್ಟ್ಸ್ ವತಿಯಿಂದ ಅತ್ಯುತ್ತಮ ಸಂಗ್ರಹ ಪ್ರಶಸ್ತಿಯೂ ಲಭಿಸಿದೆ. ಸಿಕಂದರಾಬಾದ್ ಜುಲರಿ ವೀರೇಶಲಿಂಗಮ್ ಹಾಲ್­ನಲ್ಲಿಯೂ ಎಕ್ಸಿಬಿಶನ್ ನಡೆಸಿ ಕೊಟ್ಟಿದ್ದೇನೆ. ನನ್ನ ಸ್ಟಾಲ್­ಗಳಿಂದ ಸಂಗ್ರಹವಾಗುವ ಹಣವನ್ನು ಅನಾಥಾಶ್ರಮಗಳಿಗೆ ನೀಡಲಾಗುತ್ತಿದೆ ಎನ್ನುತ್ತಾರೆ.

ಗಿನ್ನೆಸ್ ವರ್ಲ್ಡ್ ರೆಕಾರ್ಡ್ ಮತ್ತು ಲಿಮ್ಕಾ ಬುಕ್ ಆಫ್ ರೆಕಾರ್ಡ್ ಸೇರಿದಂತೆ ಹಲವು ಪುರಸ್ಕಾರಗಳು ಲಭಿಸಿವೆ ಎಂದು ಅವರು ಹೇಳಿದ್ದಾರೆ.

ಭಾರತದ ಗಣಪತಿ ಮತ್ತು ವಿಶ್ವದಲ್ಲಿರುವ ಗಣಪತಿ ದೇಗುಲಗಳ ಬಗ್ಗೆ ‘ವಿಶ್ವ ವಿನಾಯಕ’ ಎಂಬ ಪುಸ್ತಕವನ್ನು ಬರೆಯುತ್ತಿರುವುದಾಗಿ ಶೇಖರ್ ಅವರು ಹೇಳಿಕೊಂಡಿದ್ದಾರೆ.