ಭಾರತದೊಳಗೆ ನುಸುಳಲು ಸಜ್ಜಾದ ಉಗ್ರರು : ದೇಶದ ಪ್ರಮುಖ ನಗರಗಳಲ್ಲಿ ಹೈಅಲರ್ಟ್

ನವದೆಹಲಿ: ಭಾರತದೊಳಗೆ ನುಸುಳಿಸುವ ಉದ್ದೇಶದಿಂದ ವಾಸ್ತವ ಗಡಿ ರೇಖೆಯಾದ್ಯಂತದ ವಿವಿಧ ಲಾಂಚ್‌ಪ್ಯಾಡ್‌ಗಳಲ್ಲಿ ಪಾಕಿಸ್ಥಾನವು  ಅಫ್ಘಾನ್ ಪಶ್ತೂನ್ ಭಯೋತ್ಪಾದಕರನ್ನು  ಇರಿಸಿದೆ ಎಂದು ಗುಪ್ತಚರ ಮಾಹಿತಿ ತಿಳಿಸಿದೆ.

ಅಂತಾರಾಷ್ಟ್ರೀಯ ಗಮನವನ್ನು ಸೆಳೆಯುವ ಸಲುವಾಗಿ ಪಾಕಿಸ್ಥಾನವು ಗಡಿ ನಿಯಂತ್ರಣ ರೇಖೆಯಲ್ಲಿ ಉದ್ವಿಗ್ನ ಪರಿಸ್ಥಿತಿಯನ್ನು ನಿರ್ಮಾಣ ಮಾಡಲು ಪ್ರಯತ್ನಿಸುತ್ತಿದೆ ಎಂದು ರಕ್ಷಣಾ ಮೂಲಗಳು ತಿಳಿಸಿವೆ. ಸಂವಿಧಾನದ 370ನೇ ವಿಧಿಯನ್ನು ರದ್ದುಪಡಿಸಿದ ಬಳಿಕದ ಸಮಸ್ಯೆಯನ್ನು ಅಂತಾರಾಷ್ಟ್ರೀಕರಿಸುವ ಪಾಕಿಸ್ಥಾನದ  ಪ್ರಯತ್ನಗಳು ಫಲ ನೀಡದ ಹಿನ್ನಲೆಯಲ್ಲಿ ಅದು ಉಗ್ರರನ್ನು ಒಳನುಸುಳಿಸುವ ಪ್ರಯತ್ನವನ್ನು ಆರಂಭಿಸಿದೆ.

“ಪಾಕಿಸ್ಥಾನ ಮೂಲದ ಭಯೋತ್ಪಾದಕ ಸಂಘಟನೆ ಜೈಶ್-ಎ-ಮೊಹಮ್ಮದ್ (ಜೆಎಂ), 12ಕ್ಕೂ ಅಧಿಕ ಅಫ್ಘಾನ್ ಮತ್ತು ಪಶ್ತೂನ್ ಭಯೋತ್ಪಾದಕರನ್ನು  ಪಾಕಿಸ್ಥಾನ ಸೇನೆಯ  ತರಬೇತಿ ಪಡೆದ ವಿಶೇಷ ಗುಂಪುಗಳನ್ನು ಒಳಗೊಂಡ ಬಾರ್ಡರ್ ಆಕ್ಷನ್ ಟೀಮ್ (ಬಿಎಟಿ)ನಲ್ಲಿ  ನಿಯೋಜಿಸಿದೆ ಮತ್ತು  ಇವರನ್ನು ಎಲ್ ಓಸಿ ಮತ್ತು ಉತ್ತರ ಕಾಶ್ಮೀರದ ಲಿಪಾ ಕಣಿವೆಯ ಮೂಲಕ ಭಾರತಕ್ಕೆ ಒಳನುಸುಳಿಸುವ ಪ್ರಯತ್ನ ನಡೆಸಲಾಗುತ್ತಿದ ಎಂದು ರಕ್ಷಣಾ ಮೂಲಗಳು ತಿಳಿಸಿವೆ.

ಭಾರತದ ಪ್ರಮುಖ ನಗರಗಳನ್ನು ಭಯೋತ್ಪಾದಕರು ಗುರಿಯಾಗಿಸಬಹುದು ಎಂದು ಗುಪ್ತಚರ ಮಾಹಿತಿ ತಿಳಿಸಿದೆ. ಎಲ್‌ಒಸಿಯಲ್ಲಿ ನಿಯಮಿತವಾಗಿ ಉದ್ವಿಗ್ನತೆ ಸೃಷ್ಟಿಯಾಗುತ್ತಿದೆ. ಸಾಮಾನ್ಯವಾಗಿ, ಪಾಕಿಸ್ಥಾನ ಸೇನೆಯು ಭಯತ್ಪಾದಕರ ಒಳನುಸುಳುವಿಕೆಗೆ ಅನುಕೂಲ ಮಾಡಿಕೊಡಲು ಕದನ ವಿರಾಮ ಉಲ್ಲಂಘನೆಯನ್ನು ಆಶ್ರಯಿಸುತ್ತದೆ.

ಒಳನುಸುಳಿಸಲು ತರಬೇತು ಪಡೆದ ಉಗ್ರರ ಕೊರತೆ ಸೃಷ್ಟಿಯಾಗುತ್ತಿರುವುದರಿಂದಲೇ ಅಫ್ಘಾನ್ ಮತ್ತು ಪಶ್ತೂನ್ ಉಗ್ರರನ್ನು ಪಾಕ್ ಸೇನೆ ನಿಯೋಜಿಸುತ್ತಿದೆ. ಭಾರತೀಯ ಸೈನಿಕರ ಭಯೋತ್ಪಾದನಾ ವಿರೋಧಿ ಕಾರ್ಯಾಚರಣೆಯೇ ಇದಕ್ಕೆ ಕಾರಣ ಎಂದು ಅಧಿಕಾರಿಯೊಬ್ಬರು ಹೇಳಿದ್ದಾರೆ. ಅಲ್ಲದೇ, ಅಫ್ಘಾನ್, ಪಶ್ತೂನ್ ಭಯೋತ್ಪಾದಕರೂ ಹೆಚ್ಚು ಅಪಾಯಕಾರಿ ಎಂದೂ ಅವರು ಎಚ್ಚರಿಸಿದ್ದಾರೆ.

ಇನ್ನೊಂದೆಡೆ ತಮಿಳುನಾಡಿಗೆ ಉಗ್ರರು ಪ್ರವೇಶಿಸಿದ್ದಾರೆ ಎಂಬ ಬಗ್ಗೆ ಮಾಹಿತಿಗಳು ಲಭ್ಯವಾಗಿರುವ ಹಿನ್ನಲೆಯಲ್ಲಿ ಅಲ್ಲಿ ಹೈಅಲರ್ಟ್ ಘೋಷಣೆ ಮಾಡಲಾಗಿದೆ. ಹಿಂದೂಗಳಂತೆ ವೇಷ ಧರಿಸಿ ಉಗ್ರರು ಪ್ರವೇಶಿಸಿದ್ದಾರೆ ಎಂದು ಹೇಳಲಾಗಿದೆ.